總有啲同事喜歡在辦公室「公私不分」

總有啲同事喜歡在辦公室「公私不分」

唔講你唔知!原來全香港大約有340萬名打工仔,佔總人口接近一半咁多。相信睇緊呢一篇文嘅你,好可能都係強大打工大軍其中一員!好多打工仔留係辦公室嘅時間隨時仲多過喺屋企,又好難秒秒鐘都係做公務嘅,所以唔少人都會喺辦公室做吓啲私人嘢,可能河水不犯井水,可能互惠互利,亦可能影響到其他人!


辛苦搵嚟志在食:Office好煮意

喺觀塘一間廣告公司返工嘅OL Ceci話,有一個小鮮肉同事對咖啡好有要求,唔好講話7仔樽裝罐裝咖啡,連星星連鎖店咖啡都滿足唔到佢:「佢真係好chill,每日下晝三、四點,就開始咔啦咔啦咁,用手磨咖啡豆器磨豆,仲有個私伙熱水煲煲水,校啱水溫之後就好似出面啲咖啡師咁hand drip coffee,香到呢!」

其實辦公室除咗可以沖咖啡,仲可以係煲老火湯嘅好地方!某保險公司有個勁大嘅pantry,一個做咗幾廿年上晒神檯嘅媽媽級同事超好心機,成日一大早就帶晒豬肉呀、瓜呀、紅蘿蔔咁喺pantry用電煲煲湯,同事一行去斟水就聞到勁香。到咗下晝就大家一齊飲老火湯!好有愛呀!

講起氣味,唔知大家有無食過最近淘寶大熱嘅「一人即食麻辣火鍋」?有個無飯家庭IT男買咗兩箱返屋企,有日佢喺公司食,成個office變咗海底撈咁嘅味,個鼻麻麻辣辣咁覆e-mail,都咪話唔趣緻!

總有啲同事喜歡在辦公室「公私不分」


當事人一定笑唔出:老細叫你同佢做私人嘢

同事可以變成親密好友,當然係好事;但係上司做嘢公私不分,就多數都會煩死你。最近就有graphic designer向小編大爆辛酸史:「呢一單真係記一世,話說有一日我做做吓嘢,阿頭就叫我幫佢執一執張相。咁我打開佢個file啦,點知……嗰吓我真係忍唔住爆咗粗,張相係車頭相嚟!原來佢老豆啱啱過咗身……我個mon又大,真係嚇一嚇呀大佬!」

另外一位IT同事,老細叫佢出去排隊買最新嘅平板電腦,買完返嚟幫手登記埋保養,但部平板係老細拎返屋企自己用……咁都算啦。兩星期後,老細話佢唔小心將部平板「坐爆咗」,叫IT同事趁住有保養拿拿聲拎去維修。喂老細,返工時間幫你整嘢唔係唔得,其他project做唔切係咪可以入你數先?

總有啲同事喜歡在辦公室「公私不分」


相信以上嘅辦公室奇聞,只係佔全港打工奇異風光冰山一角,如果大家都有更搞笑奇趣經歷,都不妨留言同大家分享一下啊!

 

(圖片來源:網絡圖片、WhatsCap

 

延伸閱讀:

會計仔:邊個夠我嚟?OT篇

大家都係manager,點解你人工多我一倍

姐死姐還在:打一份提升個人修養嘅工

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案