置地記者:敗給我的完美主義

置地記者_完美主義_摩連奴_老細

不下一次,置記被問到「我最喜愛的領袖」嘅時候,都會選擇喺足球界享負盛名,既自負又(接近)戰無不勝嘅「寸皇領隊」摩連奴(Jose Mourinho)。論偉大,摩連奴未必及得上曼聯傳奇領隊費格遜,但係佢以前對待球員軟硬兼施、喺傳媒面前搶盡鋒頭,令自己成為眾矢之的,掩護陣中球員,等佢哋可以專心作賽,呢種態度,我欣賞。

當然,摩連奴不無缺點,例如持久力不足。喂,我講緊嘅係佢能夠喺一兩年內就為球隊贏取榮譽,將實用主義及即食文化發揮得淋漓盡致,不過就成日「富不過三年」,帶領球隊去到第三、四季就例必軍心散渙、眾叛親離。無法建立長期稱霸嘅皇朝,可算係「摩佬」執教生涯嘅最大敗筆。

凡事力求完美的「職場摩佬」

職場上,置記咁啱得咁橋又見過好似摩連奴呢種老細。姑且稱呼佢做「職場摩佬」。「職場摩佬」係一個完美主義者,對於自己、下屬以至其他部門嘅同事都有好高要求。從最基本嘅溝通清晰(你一講個「佢」字,「職場摩佬」就必定問你「邊個佢?」);到文件處理嘅手勢同準繩度(寫封email係用表列定係bullet point交代事故,都係一門大學問);以至高層次啲嘅project management(出現問題嘅時候,有冇運用適當嘅手腕、向適當嘅話事人反映?),「職場摩佬」都有佢一套嘅嚴謹準則,堪稱係market best practice。而家諗返,置記喺佢身上都真係獲益良多,雖然亦好學唔學,學埋佢啲mean爆嘅口吻同埋長氣。 

呢種完美主義,同摩連奴嘅媽媽Maria Julia口中嘅童年摩連奴何其相似:「我個仔五歲嗰陣,返學已經要將所有筆、蠟筆同間尺齊齊整整咁排列喺書包仔入面,佢真係細細個就已經係完美主義者嚟㗎。」摩連奴嘅舊下屬卡蘭卡亦都話:「所有你諗得到、佢可以控制嘅嘢,從練習場嘅草地,到球員出埠搭車又搭船嘅時候著嘅皮鞋,摩連奴都力臻完美。」

摩連奴又好,「職場摩佬」又好,佢哋嘅要求能夠付諸實行當然係最理想;但現實中往往係,大家都忙著去護送,來不及拆開裡面完美的世界。置記親眼見過「職場摩佬」嘅堅持同執著,令佢搞到心力交瘁要睇醫生;另一方面,一齊做嘢嘅同事亦吃不消。

話說有一次,一位擁有廿年行內經驗嘅新同事嚟到,同「職場摩佬」開會討論某單客戶投訴應該點樣處理,明明只係茶杯裡的風波,「職場摩佬」可以由五六七個角度去分析件事嘅起因,並歸咎於同事手勢唔好、心態唔夠積極、溝通唔夠清晰、匯報唔夠及時⋯⋯(下刪二百字)新同事冇有識死駁咀話:「外面啲行家唔會好似你咁做㗎喎。」結果,咪就係Not literally,but 新同事未過試用期就劈炮唔撈。於是,同事無論新舊,頂唔順都只係時間嘅問題,只有少數刻苦耐勞兼且性情溫馴嘅同事一直追隨「職場摩佬」。

 ▪ 追求事業突破?立即睇Project Management熱門空缺

 ▪ 重新規劃職涯,轉工是第一步,快啲update下封CV/Resume

 再鋒利嘅刀都有生銹嘅一日

「職場摩佬」捍衛到自己嘅底線,堅守崗位近廿年,歷盡幾許風雨而保持部門營運水準喺最高嘅水平,喺行內都算老行尊,街外人聽到佢大名都會畀返兩分薄面。不過,「職場摩佬」麾下「貨如輪轉」,最甘嗰段時期試過全部起晒身,要夾硬秤高第二梯隊去頂住先,搞到咁大老闆都好難唔看在眼內。雖然「職場摩佬」喺佢嘅崗位表現無可挑剔,但係再鋒利嘅刀都有生銹嘅一日,管理層總要安排傳承、繼任嘅安排。如果「職場摩佬」down-one level持續玩走馬燈,第時佢老人家退落嚟,部門嘅運作就可能全面癱瘓。

結果,唔知係咪聞到陣味定係有預知能力,「職場摩佬」未到退休年齡,就決定急流勇退。呢個決定其實都係締造咗一個「三贏」嘅局面,首先「職場摩佬」嘅下屬唔使再受難,士氣高咗好多,精神好咗,人都靚咗,考試仲攞一百分添⋯⋯;大老闆嘅煩惱迎刃而難,頭髮又甩少咗;至於「職場摩佬」退休之後,生活逍遙快活。我最近喺街見到佢,相貌係祥和咗嘅,唔使為咗返工呢啲俗務么心么肺吖嘛。

「職場摩佬」揀選咗及早離去,輸咗份工,但係贏返人生。至於球壇嘅摩連奴本尊,執筆之時正值球隊表現低潮,傳媒瘋傳球隊內部分崩離析,球星普巴揚言「有佢冇我」,摩連奴唔走,普巴一到冬季轉會窗重開就會離隊。曾經風光嘅摩連奴,去到55歲呢個天命已知、耳已半順嘅年紀,究竟係繼續奮戰,抑或識相下台,歷史自有公論。兩位完美主義者嘅故事話畀大家聽,錢財身外物,返工身外事,擇善固執都有個限度,畢竟凡事去得太盡,緣份定必早盡。

置地記者

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:其實(老細)詐蠢,全為你付出的機智

老細攻略——「控制型老細」只佔9%?最常見嘅類型係……

5個跡象顯示你有一個好上司

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案