置地記者:「我勸你早點歸去」

置地記者:「我勸你早點歸去」

你說你不想歸去。

通常都係咁架啦。一個送客,另一個想要再坐一會。莫講話啲咩婆媽感情戲份,即使喺職場,即使涉事雙方都係男子漢大丈夫,都會有呢種拖拖拉拉嘅尷尬場面。今次故事嘅主人翁,我稱之為「職場雲加」。

先介紹一下雲加本尊。佢本名 Arsène Wenger ,綽號「教授」,現年 69 歲,花咗半生時間任職足球隊教練或助教。雲加首先喺法國開始教波,到上世紀九十年代遠赴日本執教鞭,但係佢真係揚名立萬嘅地方,當數英超球會阿仙奴。雲加執掌「兵工廠」帥印接近 22 年,七次贏得足總盃冠軍,三次捧走聯賽冠軍,其中一次更加係全季保持不敗,被譽為 “the Invincibles” 。

論成就輝煌,雲加比起歡喜冤家摩連奴有過之而無不及,僅次於曼聯領隊費格遜。不過如果你係近三至五年先至留意阿仙奴嘅話,大概會對雲加有另一種印象:以保住聯賽前四名為目標、守財奴、風格一成不變⋯⋯自費格遜喺 2013 年退休之後,雲加作為在位最長時間嘅英超領隊,居然被加諸賴死唔走、戀棧權位嘅罪名,甚至出現「永續雲加」嘅反諷,「教授」看在眼內,可謂百般滋味在心頭。

▪男人唔可以窮?N個「29+1 」香港男性面對的財政壓力

▪【2019年請假攻略】放邊個紅日性價比最高?

置記所認識嘅呢一位「職場雲加」同樣曾經風光;同樣為所任職嘅公司鞠躬盡瘁。同雲加一樣,「職場雲加」擔任嘅崗位絕對唔係一份優差,佢喺公司所屬嘅部門,接近係各業務入面最「下欄」嘅。意思即係,業務本質傳統保守、產品早已成熟而缺乏創新空間,行家之間除咗打下價格戰 (以及牙骹) 之外,基本上冇太多競爭手段。

「職場雲加」望住眼前呢碗「限米煮限飯」,當然有苦自己知。問題係老闆會唔會體諒,從而放你一馬?「職場雲加」任職上市公司,大老闆始終要向股東交代,數,總係要捽嘅,花臣,總係要搞嘅,哪管石頭鑽唔出血。同樣地,雲加執教阿仙奴,受制於球會遷往酋長球場而必須審慎理財,無法仿傚其他財大氣粗嘅球會大灑金錢盡收天下兵器 — — 但係球迷只着眼比賽成績同聯賽排名,雲加量入為出背後嘅苦衷,實在唔係人人明白。

好在人老精、鬼老靈。「職場雲加」喺江湖打滾幾十年,一直睇穿咗好多無無謂謂嘅大龍鳳,都不過係戲一場,老闆有老闆嘅角色要演,作為下屬嘅,加以配合去完成呢一場戲,好等老闆有個交代,便是功德無量。所以「職場雲加」都唔介意飾演「下靶位」,每逢遇上苦難,都總會放開懷抱,諗條好橋出嚟交差,老闆滿意收貨,自己可以安全收工。佢嘅格言係,唔好向老闆提出問題,要向老闆提出解決問題嘅方案。如果大家同老闆匯報嘅時候能夠套用呢一套心法,老闆應該會對你更加好。

無論順流逆流,雲加帶領阿仙奴連續 19 年出席歐聯賽事,確保球會收入穩定,長期維持歐洲一線勁旅地位,殊不容易。可惜超過十年無法問鼎聯賽冠軍,甚至出現被其他勁敵拋離嘅現象,都令球迷對雲加生厭,認定雲加因循守舊、無法與時並進。早幾年,「職場雲加」喺公司領導層預備交接嘅時候,亦被視為難以適應新時代嘅「老古董」、「老頑固」。接近退休年齡嘅「職場雲加」,單係交差、交戲已經無法滿足外界嘅期望。

隨住公司架構轉變,「職場雲加」被一個比佢年輕廿幾年嘅「明日之星」 head 住,幾乎就係胯下之辱。事到如今,已經唔係「勸退」咁簡單,公司接近係要「迫退」呢位曾經立下汗馬功勞嘅老臣子。如果你係「職場雲加」,你會如何自處?

欲知後事如何,留意下一篇《職場演義》。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。Facebook專頁

檢視此作者的所有文章

延讀閱讀:

置地記者:敗給我的完美主義

置地記者:好聚好散──離職前要做好嘅七件事

聶瞳:向年齡歧視說不,睇CV不如見真人

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案