置地記者:打工仔有一種命,叫辛苦命

置地記者:打工仔有一種命,叫辛苦命

美國籃球界有「大帝」勒邦占士(LeBron James)以33歲「高齡」由東岸轉戰西岸,足球界同樣有基斯坦奴朗拿度(C朗,Cristiano Ronaldo)33歲人跳出comfort zone、離開連續三年稱霸歐洲嘅皇家馬德里,加盟意大利嘅祖雲達斯。

上述兩位球星受聘於球會,同大家一樣係打工仔。佢哋付出嘅努力有目共睹,去到呢個歲數仍然繼續挑戰自己,亦係反映佢哋對自己要求有幾高。唔信嘅,你望吓C朗喺曼聯嘅舊隊友、現年32歲嘅朗尼?佢去咗美國掘金,呀唔係,係踢波喇。

講到呢度,你會唔會以為佢哋真係所謂嘅「老驥伏櫪,志在千里」?定係話,其實大帝同C朗都只係辛苦命嘅代言人?

 

打工仔基本上分兩種

十個打工仔,九個呻辛苦。普羅打工仔捱騾仔,搵到嘅不過係三餐一宿,一旦自覺付出同收入不成正比,負面情緒投射出嚟,咪就係覺得返工辛苦,畀客鬧、畀老細針對、畀同事講是非⋯⋯任何大小事稍有唔順心,就係辛苦。好正常,人性嚟嘅。

咁第十個人發生咩事?佢唔係唔辛苦,只不過佢認咗命,接受咗自己本質上係賤骨頭,鍾意有自唔在、攞苦嚟辛。大帝同C朗從奮鬥中搵到滿足感(以及榮譽、金錢⋯⋯),算係冇咁灰嘅例子。至於打工界嘅C朗,又係咩玩法?置記可以大膽同你講,我見過,我真係見過。喺我一位舊老闆嘅身上,我見到「職場C朗」。

畀少少描述大家:「職場C朗」年過半百,身型健碩(真係有muscle,唔係肥嗰隻)但唔高大,目光如炬,同佢握手你會知道咩叫「堅實」。「職場C朗」事業曾經風光過,亦曾經高處不勝寒而喺權力遊戲之中打敗仗,離開服務多年嘅公司,喺新公司做咗置記嘅上司。

跟「職場C朗」做嘢,你會學到好多嘢,唔單止因為佢經驗好豐富,見多識廣,更重要嘅係佢身體力行話你知:嘢,係要點樣做嘅。無論前路嘅障礙係公司嘅「老屎忽」,抑或係唔同山頭嘅利害關係,「職場C朗」一於勇往直前。無論係涉及全公司嘅系統提升,抑或只係部門周年晚宴,「職場C朗」一律全力以赴。我舉個最經典嘅例子:公司聖誕搞party,循例要每team人貢獻一個才藝表演娛賓。當其他部門本身已經忙到甩碌,只可以喺lunch hour柴娃娃度下唱咩歌或者表演咩諧趣劇嘅時候,「職場C朗」動員全組人整道具、錄音樂同埋排走位,喺party當日嘅表演自然outstanding,in both good and bad ways。

 

為何要攞苦嚟辛

不過十隻手指有長短,一個有要求、自信、堅毅嘅人,喺另一啲人嘅眼中,可以係攞嚟搞、自大、固執。而喺唔認同我呢位舊上司嘅人眼中,所謂「職場C朗」美其名係希望喺工作上尋找滿足感,實際上只係希望繼續證明畀人睇佢喺職場上嘅價值,唔想淪為公司嘅寄生蟲。

Layman嘅講法,咪就係中年危機。男人嘅嘢,最忌畀人話「唔得」,咪要千方百計證明自己「仲得」囉。職場,正正係一個證明自己尚餘價值、尚有餘熱嘅好地方。證明自己本身並無問題,客觀嘅效果,係會啟迪到某啲同路人一齊逆流而上,同時影響到一啲非我族類嘅人,本來風平浪靜、優哉悠哉嘅日子。能夠同「職場C朗」拍住上嘅,固然係斆學相長,做徒弟仔嘅工作愉快得嚟仲要有金石良言袋落袋,而「職場C朗」亦能夠了解時下年輕人嘅諗法,與時並進唔怕out;但係嫌「職場C朗」做爛市、冇嗰樣整嗰樣嘅同事們,輕則冷待佢嘅熱情邀請,重則兜個圈同返「職場C朗」個老闆打小報告,罪名就莫須有啦。好可惜,呢兩類人嘅比例,應該係一比九。十個打工仔,九個呻辛苦吖嘛!叫咗你聽書㗎啦。

 

冇伯樂千里馬都只係捱騾仔

你想唔想知道呢位「職場C朗」最後點樣?其實我知嘅都係有限,因為我比佢早離開公司,去咗另一啲地方發展。不過,過年過節,我都有WhatsApp同佢問候兩句。據聞,「職場C朗」仍然喺同一間公司東征西討,事無大小都親力親為。當初搵佢返嚟嘅老闆,聞說已經退休嘆世界,而接任嘅新老闆,又好不幸地昔日同「職場C朗」有牙齒印。以前朝中有人好辦事,有人撐腰就咩都順風順水啫,家下「職場C朗」順理成章地成為在上者嘅眼中釘,被調去守水塘都係意料中事。我諗佢都心裡有數,畢竟「出得嚟行,預咗要還」。不過佢面皮夠厚又敬業樂業,都可能仲有幾年貨仔,但係好似置記咁打從心底裡敬重佢嘅同事,照計就買少見少。

或者「職場C朗」嗰一套喺「Work Smart」嘅新文化之下唔太受歡迎;或者佢嘅志向一直高企,同佢越來越渺小嘅職能差距越來越大;或者虎落平陽,佢再難接觸到其他大帝、C朗,而圍住佢嘅,只係一個又一個甘於平淡嘅朗尼。

咁樣嘅命水,你話唔係辛苦,係咩?

 

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:面對老細的「意見調查」,始終相信沉默是金

置地記者:好聚好散──離職前要做好嘅七件事

置地記者:搵工唔想中伏?尋找Red flag的故事

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案