置地記者:是非帶不走,唯有譽隨身

置地記者:是非帶不走,唯有譽隨身

(The Secret Life of Walter Mitty / 20th Century Fox)

IQ題:如果股票買賣嘅地方係交易廣場;雞鴨鵝分銷場所係家禽批發市場;咁辦公室蜚短流長嘅集散地又係咩場呢?

答案係,「落場」。喂,唔好噓住,唔好掟蕃茄住。雖則返文職唔似飲食業,冇得話下午茶市之後、晚市之前拉半閘唔做生意,任由員工瞓覺打牌煲煙發夢,但係喺打字同接電話之間,唔多唔少都會take a break。

——

對於返office工嘅人嚟講,落場嘅目的地往往係茶水間,即係pantry。你有冇留意啲同事好鍾意聯群結隊集體去斟水?呢個盛況有如好姊妹出街要約埋一齊去洗手間,以彰顯當事人之間嘅親密,以及冇份參與之閒雜人等嘅孤立。

點解事必要去茶水間?現代嘅茶水間本身除咗茶同水,好多時仲有部咖啡機,令人心曠神怡。何況pantry通常位於辦公室嘅深處,遠離老闆間房同埋其他同事嘅座位,私隱度叫有啲啲保證,講開啲咩敏感話題,都唔太驚一傳六、六傳卅六嘅問題。

就係咁,茶水間多年來遺留咗無數是是非非。邊個搏上位搏到出晒面、邊個女同事做娘娘、邊個老細對下屬刻薄⋯⋯正所謂有人嘅地方就有政治,喺人工智能全面接管辦公室之前,難免會有辦公室政治、會有人久唔久就喺茶水間孵吓蛋。

茶水間孕育咗多少職場姊妹花或者兄弟幫,當中又有幾多對持續愛到幾多歲?我冇數據喺手。不過呢,置記回望過去,能夠喺工作上不打不相識,成為莫逆之交,將友誼(甚或愛情)維繫至職場以外嘅例子,通常都有個共通點:就係大家冇乜利益衝突,工作上可以合作,但唔係競爭對手,亦冇從屬關係。

正所謂講錢失感情,再要好嘅同事,喺加人工、出花紅等課題上若然都係爭緊同一筆資源,咁友情嘅考驗就真係話嚟就嚟。何況呢種情誼往往建立於同仇敵愾、槍口一致向外(或向上)嘅背景,透過講同事是非所堆砌而成嘅「策略性夥伴」關係,其實唔比沙堡壘堅固幾多。

——

是非就好似薯片、汽水呢啲零食咁,本質上冇乜營養價值,但係間唔中講吓是非又可以解悶、帶嚟多少樂趣,著實係人之常情。不過,正如大家都知發育時期要食有營養嘅食物先會快高長大,職場生涯要步步高陞,斷估都唔係單靠講是非。想要越戰越勇、無往而不利,建立自己嘅品牌同聲譽先係重點。

有趣嘅係,是非同個人聲譽息息相關。正所謂「把口生喺人哋度」,人哋點對你嘅衣著造型、談吐舉止評頭品足,你真係控制唔到。你可以控制嘅,係客觀可量度嘅工作表現,以及每個拍檔對你嘅評價。留意返,係拍檔,大家保持one arm’s length,返工一齊做嘢、喺老細同死線面前出生入死;放工各自返歸,休閒生活中嘅交集可能只限於Facebook互相派like。

重點係,只要同你共事嘅拍檔感到愜意暢快,你嘅聲譽就會慢慢建立起嚟。你諗吓,你工作上唔會永遠都只得嗰一兩個拍檔,唔同部門、唔同客戶可能都有兩三個人要同你一齊趕project或者砌deal。即使話人夾人緣都好,但十個人入面總有幾個可以對你合理又公正地作出評價。風評呢樣嘢同樣係有傳染性嘅,你對人差、得罪人,人哋有機會咪同自己老闆甚或同你老闆申訴;反之亦然。如果你試過畀客人稱讚,或者老闆話喺人哋口中聽到你嘅好評,你會知道我講咩。

世界好大,職涯很長。冇人知道你喺一個公司踎咗兩三年之後出走,他朝會唔會喺另一個地方遇見昔日嘅戰友或對頭人,亦難保有日你會食回頭草返舊舖養老。你估吓,到時候嘅故人,係記住你當年嘅是非,抑或憑功過留下對你依稀嘅印象?花邊新聞偶有少許永垂不朽,但置記相信,你做過嘅實事,喺客人、夥伴同老闆心目中所累積嘅信譽,先至係歷久不衰。

記住,鐵打嘅衙門、流水嘅官。仕途上嘅無盡旅途,可以陪著你走嘅只有你嘅聲譽。謹此同每位曾經,或者正常受到是非困擾嘅打工仔朋友分享 — —聽朝返工,你知道要專心做啲咩啦?

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

葉朗程:絕細

「工作很悶,學不到東西」是你的轉職理由嗎?

會計仔:邊個夠我嚟?OT篇

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案