置地記者:「一味擴音的喇叭,累人累己知道嗎?」

置地記者:「一味擴音的喇叭,累人累己知道嗎?」以防萬一,註明標題係陳奕迅舊歌《演唱會》副歌第一句先。

係咁嘅,有多過一個人嘅地方,就有是非。返工嘅地方,是非有大有小,低級員工固然有基層式嘅小圈子、推莊、卸膊。不過,你唔好以為上到老闆級別,人品就會變得高尚,人人目標為本、在商言商、為公司好,遠離蜚短流長呢啲「小學雞」玩意。

其實即使係 Business Heads ,大家再道貌岸然,喺日常工作期間都不免會短兵相接。最基本嘅利益衝突,當然係爭奪資源,從 headcount 到職級到人工到花紅,一切都要喺有限數入面爭取。更加 advanced 嘅,係爭寵,爭奪老闆嘅歡心。老闆企喺自己嗰邊,先至真正嘅要風得風。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析

今次故事嘅主人翁,外號「職場大喇叭」,就係當攻擊其他人係家常便飯嘅人辦。

「職場大喇叭」同「高層A」都係高層人士,佢哋兩個來自唔同嘅部門,大家嘅著眼點同出發點都唔同。佢哋對於同一件事、同一個客戶或者同一個項目嘅睇法都可以好唔同。正所謂「觀點與角度,冇話邊個好」,前線同後防嘅意見南轅北轍,都唔一定有絕對嘅對錯之分。不過,喺職場上, it’s either my way or the highway ,面子大過天嘅兩位高層,又點會輕易接受對方逆自己意呢?適逢「職場大喇叭」把口唔係好收,間唔中就同返自己嘅下屬呻兩句,將呢啲本應停留喺雲端嘅瓜葛,好容易就好似某牌子朱古力咁,落入凡間。

「職場大喇叭」同「高層A」之間嘅明爭暗鬥,喺基層員工眼中當然係花生味濃。不過,老闆看在眼內,就真係一句「成何體統」。雖然話老闆都係 management ,應該要排解下屬之間嘅糾紛,但係老闆總有更多更重要嘅事處理,例如話跑生意、見客、開會等。要老闆睇你啲所謂高層互相轟炸嘅孩子氣行為,真係情何以堪?老闆冇眼睇甚或採取駝鳥政策、冇眼屎乾淨盲的態度去規避呢對孖寶,又好似無可厚非。

▪下載ios版本jobsDB手機app 或 下載Android版jobsDB手機app

▪用jobsDB手機app搵工,AI幫你篩好至啱筍工

置記唔係身處高層,但係聽埋聽埋呢啲江湖耳語,對於以上「金枝玉孽」式嘅宮庭八婆鬧劇都略有所聞。聽講老闆最初都嘗試分別開解「職場大喇叭」及「高層A」,希望化干戈為玉帛。不過,安撫就好似退燒藥咁,時間過咗就失去效力,高層之間嘅角力好快又再開始。結果?老闆忍無可忍,索性委派一個欽差大臣,直接 head 住唔生性嘅呢兩位高層,自己就樂得清靜。

對於佢哋嚟講,欽差大臣係隔絕佢哋通往天廳 (即係老闆) 嘅一度門。喺公司嘅架構圖上面,高層甲乙由 down-one 變成 down-two ,變相被燉冬菇,都咪話唔陰公。事隔幾個月,高層A 被勸喻離職,即係 being managed-out 。呢場交,表面上係「職場大喇叭」贏咗嘅, right ?但其實,老闆同欽差大臣一早對「職場大喇叭」都動咗殺機 (唔係真係殺咗佢啦好冇?) ,「職場大喇叭」喺高層A 離職後無耐都主動遞信呈辭。畢竟關係一直已經破裂,勉強留低都冇意思。

▪有一種複雜關係…叫做辦公室關係?

▪一幅圖幫你決定辭唔辭職好

今次呢篇,你當係一個寓言故事啦,一個提醒你,「哦~~~我話畀老師知!」呢招告御狀,喺職場上冇咩好結果嘅故事。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:做塊階磚給你墊底

置地記者:「有天才,為何我們卻是無後半?」

置地記者:全城在變遷,不減你是你

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案