置地記者:「人在中環,搵食艱難。」

置地記者-人在中環-搵食艱難

作為一個打工仔,喺中環返工,都算有辣有唔辣。我有舊同事就講過,喺中環返工,會有一份虛榮心,四方八面嘅人都著得零舍「四正」,感覺上身處核心地帶咁話。但係虛榮心就唔可以當飯食嘅,一講到食晏,喺中環嘅朋友通常都會牙痛咁聲。

jobsDB category leadership 2

無他, lunch hour 係咪都要放,有啲人可能只係得 50 分鐘,有啲幸福啲嘅就可以有兩個鐘慢慢嘆。時間嘅長短,規範咗大家嘅選擇。時間充裕的話,中環人可以坐地鐵過海去尖沙咀甚至旺角食平啲啲;留喺港島亦可以移步去灣仔甚至北角,回程徒步、搭電車或巴士都大把選擇。

▪ 【各區Lunch攻略】打工仔覓食銅鑼灣 $70以下經濟午餐優秀選

但一般嚟講,一小時嘅午飯時間都係比較普遍。唔係人人可以咁奢侈離開中環食餐晏啦,亦可能有人情願拿拿臨食完,喺公司搵個位恰陣或者快啲做埋啲嘢,免得心掛掛或夜晚要 OT 。於是,點樣「快、平、靚、正」地搵餐晏仔,成為好多打工仔逢星期一至五嘅煩惱。

正如「高大、有錢、靚仔」係搵男朋友時出現嘅 “Impossible Trinity” ,要滿足晒三個願望真係一啲都唔容易。何況四個訴求?

如果事必要取捨,「靚」基本上係我第一項馬上捨棄嘅要求。你想坐得舒舒服服喺中環食晏?一係要訂枱同埋夠早去攞位,講緊係 12:15 呢啲時間 (十二點半之後嗰種人多擠迫嘅程度係會令人馬上掉頭走) 。一係,就畀貴啲,幫襯啲平民百姓食唔起嘅食肆。你試下畀幾嚿水食個套餐,真係冇太多人有本錢同你爭。但首先你要負擔得起囉。

▪ 叮飯、蒸飯定用發熱包?五種在Office弄熱飯盒的方法 優劣大檢閱

既然大家都係諗住食平啲啲,慳返啲錢嘅話,「正」就成為下一個犧牲品。呢度我係講緊食物嘅質素。我當然知道離開中環最繁忙嘅地帶,去到蘇豪區,甚至上環,有唔少價錢親民而質素又唔錯嘅食肆。但係要快吖嘛,邊有得你慢慢行上半山,食完又慢慢行返落山?若然步行範圍東起置地、西至中環中心,北至 IFC ,南至威靈頓街,呢個框框入面嘅唔駛點等,又擺得入口嘅「平民美食」真係屈指可算。無辦法,要將就下。

要又快又平,最直覺嘅選擇當然係連鎖式快餐店。無論係美式漢堡包、港式粉麵飯、抑或日式大碗飯,喺環球大廈一路行過去都應有盡有。當然,有更加懶惰而全天候嘅選擇,就係落地鐵站幫襯專門做外賣嘅連鎖店,但可能係心理作用啦,我硬係覺得呢啲外賣舖嘅食物質素比起街舖更差,免得過都唔好搞我。

如果想坐低食啲熱辣辣嘅食物,我會選擇去利源西街嗰兩班平民茶餐廳。當然,你首先要唔介意迫夾啲,然後要唔介意食完飲完就要馬上起身讓座。食完就走嘅好處,係你可以有啲時間散下步,行去半山行人電梯「嘟」八達通慳兩蚊車費。唔好處,咪就係唔方便同朋友、同事或行家坐定定傾偈囉。咁呢個位你要自己揀喇,又或者咁講,總有啲人同你志同道合、臭味相投嘅。

▪ 【各區Lunch攻略】中環人搵餐晏仔 70元以下的午餐有甚麼選擇?

另一個選擇呢,係去一啲樓上嘅私人會所,叫個客飯,價錢真樣都係五十蚊有找、包飲品。喺租庇利街 (中環街市好多白鴿嗰邊) 都最少有兩個呢啲工會或組織,地方乾淨又光猛,客飯有菜有肉,而且一定食得你飽。

如果唔介意買個外賣返去食嘅話,昭隆街同利源東街都有啲唔錯嘅選擇,其中利源東街有間燒臘店嘅叉燒同燒腩仔都相當優質。咁你問我,點解唔索性用手機 APP 直接美食送上門?一來貴啲,二來食晏時間,點都落街行下,曬下太陽同透下氣啦,長期困住喺同一個空間,對身體同心理上都唔係幾好架。

置地記者

 

原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

 

檢視此作者的所有文章

 

 

閱讀:

置地記者:反洗錢 (AML) 的工作到底涉及甚麼?金融犯罪合規專才專監察不尋常大額交易

置地記者:「面對 Recruiter ,要識得 Say No。」

置地記者:「重要但往往被忽略嘅離職理由」

 

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案