置地記者:佛系管治,弗係管治

 置地記者:佛系管治,弗係管治

以前讀中文科,係要讀文言文、同「之乎者也」做下朋友仔嘅。如果大家有呢個集體回憶嘅話,咁要正確理解呢篇嘅主題就唔困難。弗者,不也。唔係你可能或者大概有聯想過嘅 F 字頭英文。我講緊 Fact 咋,你諗咗去邊?

▪我做Marketing:職場交叉點:同事犯錯,你會唔會出聲?

▪14句不可對老細說的話(及老細的神邏輯)

冇錯,條題嘅意思就係,「佛系」管治,並唔係管治。好禪呢?其實唔難明白。置地舉個例子:育成類型嘅電子遊戲,由「他媽哥池」到「足球經理人」到 “Happy Farm” ,都容許大家隨心所欲,要好投入精神同時間咁每隔兩秒我都想起你又得;要抽離地自由放牧,緣份到了,自然會 check-in 睇下咩環境,又得。

梗係得啦,遊戲一場,隻雞仔餓瓜咗、球會輸波輸到降班、個農場啲瓜瓜菜菜畀人偷晒,都不過係身外事、身外物。除非你課金去玩,否則,損失真係有限公司。

呢種愛理不理、等緣份到嘅玩法,我稱之為「佛系玩法」。當然係參考早前好流行嘅「佛系脫獨法」、「佛系溫習法」、「佛系投資法」所延伸而成。盤膝打坐、燒一炷香、閉目冥想⋯⋯有志者事竟成呀下。

打機有佛系玩法,咁返工做 management ,掛住 Manager 呢個銜頭,又有冇得佛系一番?或者大家以為置記講笑,但我可以講,我真係有見過佛系經理 (以下簡稱「佛經」) 對公司施以佛系管理,即管同大家分享下。

▪置地記者:敗給我的完美主義

▪5個跡象顯示你有一個好上司

話說呢,阿「佛經」本身聰明過人,喺做人下屬嘅時候已經表現卓越,贏得公司大老闆賞識,仕途扶搖直上。喺大老闆嘅英明管治之下,阿「佛經」帶隊衝鋒陷陣,受人錢財、替人消災,贏得客戶之間良好嘅評價,生意當然陸續有來。

直到有一日,阿大老闆見「佛經」都算羽翼長成,想將一個環頭嘅業務交畀「佛經」獨立管理。咁君要臣升,臣不能不升,「佛經」自此跳出湊客嘅 comfort zone ,工作時間有起碼一半要投放喺管理方面。

湊客講嘅係你本身有幾多業內知識,以及為客人解決問題嘅能力。呢度當然都包括安撫客戶同埋匯報進度呢啲 soft skills 。不過,要管理一個環頭,即係成個 office 由租地方到 seating plan 到買文具都歸你督師嘅時候,涉及到嘅就係 people management skill 。除咗話往日帶住條 project team 出生入死,仲有恆常同你朝夕相對嘅 admin ,以及其他幫你手湊其他客人嘅下屬。

嚟到呢個位,「佛經」作出取捨:跑生意要緊,完成大老闆畀嘅任務要緊,咁辦公室內,自己麾下嘅人嘅表現問題、人際關係問題,就盡可能少理為妙。反正時間到了,問題自然解決或引爆,要走嘅同事自然會走,要留嘅同事,用錢就可以挽留。

以上當然唔係金科玉律,不過信奉佛系管治法嘅「佛經」係咁諗,你都冇佢辦法。

如是者,「佛經」喺上任之後兩年內,就將舊嘅一批員工換成新嘅一批。舊嗰批離開都不盡然關佢事嘅,畢竟承接一班成員,就好似打麻雀去到南圈尾先坐落嚟「鄧腳」咁,好好醜醜都成咗型,等到四圈完咗執過位再發圍會比較實際。

▪日日上演塞車、湊老細、開OT,打工仔:「每隔兩秒我都想轉工﹗」

▪置地記者:好聚好散──離職前要做好嘅七件事

然後,「佛經」嘅新班底運作咗一年左右,頭半年係蜜月期,較早入嚟嘅同事帶動到新嘅同事融入同埋交足功課,重質又重量,情況係相當理想嘅。「佛經」唔使講太多「佛偈」就無為而治促成各人水乳交融,自然春風得意。

不過,隨住各人都坐暖張凳,大家嘅劣根性就逐漸浮現:有人係控制狂;有人咩都收收埋埋唔畀人知;有人但求朝九晚六,最好唔使佢做;有人對人講人話、對鬼講鬼話⋯⋯發生磨擦就梗架啦。如果有人行出嚟一槌定音,為大是大非定下一個標準,咁就一勞永逸。

如果囉。問題係,「佛經」之所以係佛系經理,就在於佢唔會干涉呢啲茶杯裡的風波。喺超然脫俗嘅「佛經」當中,塵世間嘅貪嗔痴都係法國大餐 (多舊魚) ,只要大家做返個成年人,專心做好份內事,煩~惱~自然解決~ (按:有冇人聽到有聲?)

咁各位同事作為凡夫俗子,冇「佛經」睇得咁開就梗架啦。何況職場現實就係,老闆唔出聲,咪私了囉。一條細細嘅 team 都可以內鬨同分黨分派,都算奇葩。開會分坐兩邊,「佛經」仍然笑笑口視若無睹,更加係奇葩。

結果,「佛經」呢一個班底當然係分崩離析啦。頂唔順呢啲派系鬥爭嘅自行離坐;對「佛經」無法帶大家修成正果、感到失望嘅人又自己搵路走⋯⋯如是者,有能力走嘅起晒身,剩低走唔郁或者未有條件走。借用一句經常被誤用嘅經濟學術語:「劣幣驅逐良幣」,「佛經」唔好好好管治下屬,就剩低一手爛牌、百廢待興。

又再,回到起點,重頭上路。因果循環呀可?佛系管治,真係唔係路,唔係卓越管治嘅道路。如果你而家跟緊嘅老闆有佛系傾向嘅話,係時候認真考慮一下,自己係想跟佢禪修過世,抑或係追隨返一啲可以令自己進步嘅老細。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

閱讀:

置地記者:「我勸你早點歸去」

置地記者:「你說你不想歸去⋯⋯?」

聶瞳:老細好公司好,員工照走佬?部門離職率高企要搵源頭

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案