置地記者:「你說你不想歸去⋯⋯?」

置地記者:「你說不想歸去⋯⋯?」

上回講到,「職場雲加」喺事業嘅黃昏,不但冇得到公司高層善待,反而面對被一個黃毛小子騎住、面臨被 manage out 嘅厄運。

置記當時喺呢台大戲作壁上觀,間唔中都聽到「職場雲加」呻到樹葉都落埋。佢時而晦氣話計過數,淨係計退休金都夠買返兩個單位收租;時而又躊躇滿志咁,話外面嘅老友叫佢出去再戰江湖。係可以理解嘅,堂堂男子漢大丈夫,喺被羞辱嘅邊緣,自尊心作祟平衡返下,有助心理健康。

▪置地記者:「我勸你早點歸去」

▪OKR踢走KPI成管理新模式﹗後者只重結果令員工變短視 不擇手段為跑數

事實上,喺職場上,如果身處逆境,形勢比人強,要求生就唔能夠單靠自己。正所謂「一命二運三風水,四積陰德五讀書」,「職場雲加」曾經建立嘅人脈、種過嘅善因,都係時候上用場。佢積落嘅陰德,最終喺佢事業上嘅最後一個十字路口,亮起照耀前路嘅綠燈。

嚟到呢度,「職場雲加」蛻變成 「職場拉高倫」。

為咗方便大家睇落去,我有必要介紹一下拉高倫係乜水。

Kimi Räikkönen ,你睇下佢個姓氏咁多「點」都知道佢係北歐人。準確啲講,拉高倫一位芬蘭賽車手。佢由 2001 年開始已經涉足一級方程式 (Formula 1) ,並曾經喺 2007 年贏得一級方程式全年總冠軍。 2018 年, 39 歲嘅拉高倫仍然效力一線車隊法拉利,成績仍然相當亮麗。

當外界都以為拉高倫會解甲歸田、弄兒為樂之際,拉高倫決定重返沙巴車隊,呢支佢喺 2001 年處女賽季時效力嘅中游份子。

被問及點解佢會回歸母會,拉高倫並無太多解釋或藉口。佢只係話,當佢喺 2018 年 7 月、意大利賽站後被告知下年「冇得留低」喺法拉利之後,佢就同一啲故人聯絡,最終達成協議,回到沙巴車隊,呢個標誌住佢事業起點嘅老地方。

一級方程式賽車同職場一樣,同是英雄地。無論昔日有幾風光,只要年華老去,體能同專注力不及往時,表現跌 watt 就成為失業嘅最大理想。好就好在,拉高倫有江湖地位亦有舊相識關照,當沙巴車隊畀法拉利撬走陸克萊,空出嘅一個駕駛座就剛好可以畀拉高倫容身,以 40 歲之齡征戰頂級賽車場,絕對唔少嘢。

「職場雲加」之所以能夠搖身一變成為「職場拉高倫」,靠嘅同樣係行走江湖多年所建立嘅威信同聲譽。雖然話管理層唔鍾意佢老人家「無速度、唔夠快、跑得慢」啫,但係喺其他部門嘅人眼中,「職場拉高倫」都算德高望重、經驗豐富而且善於提攜後輩。佢或者冇辦法喺瞬息萬望嘅前線為公司帶來創意或者新嘅生意,但係要佢坐鎮後方、統籌一啲 project work ,其實仍然游刃有餘。

當「職場拉高倫」盤算緊幾時遞信執包袱嘅時候,一次電話對話,就將戲軌扭轉。

「喂,拉高倫呀?」 Middle Office 嘅主管阿姐打嚟。

「係,有咩關照呀?」好係一貫 80 年代 oldies 黃百鳴式嘅回應。

「我哋呢邊等緊人用,需要幫手睇住一堆 Project 嘅進度,同埋帶住幾個 Junior Manager 一齊去做呢啲 Project 。你有冇興趣過嚟?」阿姐都幾唔轉彎抹角。

「吓?咁呀?我考慮下再答覆你丫。」雖然係人都知呢個 offer 遠比含恨辭職為佳,但係審慎地考慮下利弊,會唔會再次畀擺上三煞位要嚟祭旗,都係對自己負責任嘅表現。

結果,三個月後,當「職場拉高倫」一五一十交代手頭上嘅所有工作,佢就正式加盟 Middle Officer ,為阿姐服務。阿姐當然唔會無緣無故搵上「職場拉高倫」。二人相識多年,「職場拉高倫」雖然年長,但係職級上大家份屬平輩,相敬總算如賓,是以「職場拉高倫」冇乜點得罪過阿姐,而阿姐嘅崗位亦同佢冇乜衝突,甚少出現打交或互片嘅場面。種種機緣巧合,令阿姐成為「職場拉高倫」嘅救命草。

「職場拉高倫」最終喺 Middle Office 做多兩年先至正式退休,比原本預算嘅三個月至半年,長咗好多。佢話被要求「再坐一會」,反正堆 Project 都未有耐埋尾,自己又幫到手,就唔介意推遲退休大計咁話。照我睇,「職場拉高倫」同好多打工仔一樣,雖然年事已高,但係壯志不減,而且身體狀況良好,唔返工無所事事反而唔太好。

至於幾乎逼宮成功嘅「明日之星」呢,喺「職場拉高倫」轉投阿姐陣營之後,自己亦另有任命,大家不約而同地離開咗呢個「下欄業務部門」。「國家有任務畀你」丫嘛。不過剃人頭者,人亦剃其頭。儘管「明日之星」未有耐到退休年齡,但係曾經執行 manage out 計劃嘅事跡,歷史總會記住,佢自己會否臨老先嚟擔心「他朝君體也相同」呢,就佢自己嘅事咯。都話做人要積下陰德架啦。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:敗給我的完美主義

置地記者:好聚好散──離職前要做好嘅七件事

Son姐教路:完勝搵工Interview、Exit Interview大原則

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案