置地記者:做塊階磚給你墊底

置地記者:《做塊階磚給你墊底》

《職場演義》呢個系列寫咗好幾篇,主角由足球明星寫到去教練,最近連一級方程式車手都寫埋。一不離二,繼拉高倫之後,我想介紹多一位車手:保達斯 (Valtteri Bottas)。

無獨有偶,保達斯同拉高倫一樣來自芬蘭。佢喺 2018 年嘅賽事入面,為平治車隊效力,以二號車手身份,為隊友咸美頓 (Lewis Hamilton) 護航,係「黑帝」第五度奪得全年總冠軍,以及平治車隊連續五年獲得車隊冠軍嘅主要功臣。

▪踏入25歲,要在職場上學懂的事

▪打工仔連環不幸事件──見工中伏篇

保達斯呢位車手本來就冇乜星味,難聽啲講係面目模糊。或者因為佢嘅光芒完全被冠軍級人馬咸美頓及維達爾 (Sebastian Vettel) 蓋過,而其他車手,例如年少氣盛嘅韋斯塔本 (Max Verstappen) 同埋平易親人嘅列卡度 (Daniel Ricciardo) ,性格上亦較諸沉實內斂嘅芬蘭人鮮明 (拉高倫表示躺著也中槍) 。

不過,由於 2018 年賽季競爭相當激烈,保達斯喺牽制法拉利車隊嘅維達爾同拉高倫方面作用就相當明顯。或者你以為賽車純粹鬥快,但係戰術上,或者駕駛技術上,都的確有所謂防守嘅概念。守得好,其他車手要用更多時間同資源 (即係車呔損耗) 先至可以追咸美頓,呢個就係保達斯嘅價值。

更加令人印象深刻嘅,係賽季中後段嘅俄羅斯站,明明保達斯表現較咸美頓更佳,排頭位出賽又一直領先,但係平治車隊為咗鞏固咸美頓喺車手榜嘅優勢,不惜落個 team order 迫令保達斯讓路,畀咸美頓揚長而去摘冠之餘,自己仲要殿後頂住如狼似虎般進逼嘅維達爾。賽後捱到第二名衝線嘅保達斯面口當然唔係好好睇,但係「顧全大局」四個字係份糧包嘅,何況保達斯晨早同車隊續咗約,大家嘅合作關係並冇受到呢次小風波影響。

▪職場上,你會說「真心話」嗎?

▪置地記者:面對老細的「意見調查」,始終相信沉默是金

保達斯對咸美頓同車隊嚟講可算係「無名英雄」,而置記亦認識一個「職場保達斯」。以年資同職銜計,佢絕對係「阿哥」級人馬。不過,佢行出嚟,無論係氣勢抑或係談吐,都反映咗佢頂多只係「二哥」:佢有足夠嘅智慧為老闆出謀獻策,但係要擔大旗去動員其他人開工呢,就欠缺咗啲領導力、威望同埋魅力。

「職場保達斯」有佢天生嘅缺點,但換個角度睇,呢啲亦都係佢嘅優點。咩角度,老闆嘅角度。老闆麾下粒粒皆星、砌到明星隊出嚟當然好爽,但係明星通常都有性格,要佢哋肯抵諗啲同你做某啲 dirty work 或者捱義氣食咁隻死貓?唔係唔得,下次你搵咩補償佢?

▪中層管理人,兩面不是人

▪升上team head,昔日戰友即刻反轉豬肚

呢個時候,老闆就會諗起「職場保達斯」。冇架,有啲咩豬頭骨「硬嘢」,就徵召「職場保達斯」嚟幫手囉。反正佢使命必達,又唔介意蝕底,怨言極少,老闆委以「重」任之後,基本上可以安枕無憂。公司早幾年要整頓內部事務,為前人積落嘅「蘇州屎」執手尾,「職場保達斯」就當仁不讓地擔任呢個「清潔大隊長」角色,乾淨俐落地完成任務。而呢啲任務,搞掂咗都唔會有掌聲架,莫講話獎金。

我諗「職場保達斯」呢種謙厚、和氣嘅性格,可能同佢本身係虔誠嘅教徒,以及佢都仕途見頂,不求上進,但求平平穩穩、賺錢供書教學,唔經唔覺就退休。如是者,歷朝老闆都知道「職場保達斯」忠心耿耿,可堪信賴。有舊咁穩陣嘅階磚墊底,業務發展先至無後顧之憂。呢個,正正係「職場保達斯」嘅價值。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:「有天才,為何我們卻是無後半?」

置地記者:是非帶不走,唯有譽隨身

置地記者:唔辛苦邊得世間財

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案