置地記者:其實(老細)詐蠢,全為你付出的機智

置地記者:其實(老細)詐蠢,全為你付出的機智

你有冇投訴過老細好蠢?你有冇埋怨過老闆是非不分?你有冇不滿腦細未有賞善罰惡?

作為一介打工仔,往往要主動/被動認同「老闆永遠是對的」。做任何事都好,硬係你講A時佢講B,你附和B嘅時候,佢又問你有冇諗過C,彷彿天和地,你攪盡腦汁都唔會啱佢心水咁。總之佢嘅心水,肯定係最佳選擇、冇得輸咁。於是呢個「唔會錯」嘅老闆,就會被下屬期許為全能、全知、全善,神聖程度直迫上帝。

不過老闆都係人,你終有一日都有機會做人老闆,輪到你揸莊嗰陣,攤路又係咪好似你以前嘅老闆咁?答案係:一係唔似,一係唔知。你死命都唔會承認自己同以前糟質你嗰條友一模一樣、如出一轍。同時,你嘅注意力已經轉移到你新嘅老闆,另一個無可挑剔嘅聖人。

咁究竟係乜嘢令到老闆呢種生物,如此自覺正確同高尚,喺人哋眼中又如此不知所謂呢?原因,通常有以下幾個⋯⋯


一、成名要趁早,出世都係

一個人可以上到位,背後總有啲原因,唔會無緣無故做到人哋上司,統領一隊人。

當然最簡單直接嘅諗法係「時勢造英雄」。八、九十年代嘅繁華盛世,令經濟規模膨脹、商機處處,連帶搵工跳糟、升職加薪嘅機會都多咗。於是,即使學歷唔高,由於水漲船高嘅關係,身價同銜頭都會隨住市況向上。往後,呢班老闆仕途到頂、宣告行人止步,就順理成章一直坐喺同一個位十幾年直至退休。

但如果你再諗深一層,其實佢哋都經歷咗金融風暴、沙士、金融海嘯等等幾許風雨。呢段時間嘅減薪、裁員、倒閉潮其實一啲都唔講得笑。多年來能夠安身立命於同一崗位,無論係湊同一個永遠唔會錯嘅老闆,抑或跨越唔同朝代、招呼幾朝至聖至高嘅天子(你老細都有老細㗎?),本身一定練得一身好武功。無論係卸膊功定係化骨棉掌,呢個老行家肯定有返多少閱歷、有返一招半式傍身,並唔係你眼中睇落咁豬兜。畢竟,佢哋嘅師傅好可能係生於二戰後嘅嬰兒潮、真正「獅子山下」嘅再上一代。

如是者,你個資深派老闆(Sorry唔覺意食咗「芝心批」個Pun)因乜解究睇落咁蠢,成日翻來覆去,又或者莫名其妙地顛倒是非?可能,呢個只係佢嘅表面,而佢裡面嗰層盤算緊嘅其實係以下第二點……


二、天知、地知、佢知、你唔知

正所謂「沒有對與錯,只有因與果」。你眼中嘅是非黑白,同你老闆眼中嘅對錯優劣,有可能係兩樣完全唔相關嘅嘢。你睇重工作嘅質素,佢可能但求準時交差;到你得過且過,佢又可能驗屍咁驗。無他,你所知嘅輕重緩急,可能只係你老闆心中Priorities嘅幾分之一。

呢個情況,我稱之為資訊不對稱。情況就好似打麻雀咁,你淨係睇到自己手牌,但係對家坐住個劉青雲,有佢啲世叔伯王天林摸面捽耳提示佢上下家要咩章,如是者你係劉華都會處於下風,嚴重啲就係畀老細睇住嚟食。

咁點解你老闆唔肯畀你知道事實嘅全部?咁就要數到第三個原因⋯⋯


三、我做主人你做狗

握握手,做個好朋友。每個新員工到職,阿老細一般都會行出嚟同新人握握手。有別於球賽開波之前嘅先禮後兵嘅,呢個揸手程序係權力高低嘅象徵,係分清莊閒嘅時刻。

理論上,老闆嘅權力來自公司同埋佢老闆,但實際上佢有冇Power有冇Say,好視乎佢踢唔踢得郁下低班馬仔。要Motivate人哋,唔係蘿蔔引誘就係用棍吽。如果係單純地一對一嘅從屬關係,情況當然好簡單。但現實通常係One-to-Many嘅將帥關係,如果班細嘅聯成一線,唔聽大佬支笛,你都咪話唔頭痕。

正因為咁,管理層有所謂分而治之嘅權術,其中一招就係老細控制資訊流通,以一個圓形大餅作比喻,四個下屬,阿甲分到三分一,阿乙分到四分一,阿丙同阿丁各自有六分一。剩低唔流通嘅資訊,完全由阿老闆掌握。如是者,甲乙丙丁四人可以互相猜忌,即使佢哋互通情報,仍然有剩餘嘅 1/12 不為人知。相比起老闆高瞻遠矚、縱觀全局,做「o靚」嘅想要作反都難有成果。承認主子嘅地位,喺有限嘅狗糧當中,付出「機智」同勞力爭取最大嗰份,係下屬競爭嘅自然結果。

咁你而家明白,點解有啲嘢,老闆會明知故問,又或者十問九唔應啦?

明白就好。因為最後一點,亦係最重要嘅一點:


四、他朝君體也相同

當你以為自己今時今日嘅遭遇好淒慘、老闆對待你嘅手法好唔公平、好奸詐嘅時候,你有冇諗過,他朝一日當你坐到你老闆個位嘅時候,你又會唔會用返同樣嘅手法去管治?學張家輝賣廣告話齋,「你而家冇,但係將來會有」,當你經歷過「做仔」或者「做女」嘅時代,輪到你當家作主,你就會知道要做啲乜嘢去鞏固自己嘅地位,同埋利用適當嘅力度去動員你嘅同事,邁向同一個目標。


到時候,面對下屬嘅諸多不滿,你或者心底裡暗暗會哼返句:「聽你説起一堆一堆關於我的是非仿似真;其實詐蠢,全為你付出的機智」。

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:唔辛苦邊得世間財

置地記者:講錢難免失感情,條件簽約前講清

置地記者:全城在變遷,不減你是你

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案