置地記者:唔辛苦邊得世間財

置地記者:唔辛苦邊得世間財

呢排書店有本黑色封面嘅書叫《Principles》,作者叫Ray Dalio,係世上規模最大嘅對沖基金Bridgewater嘅創辦人,管理資產超過一千五百億美元。Ray曾經準確預測2008年美國次按危機及2011年歐洲債務問題,佢堅信知古鑒今,利用數據、模型同原則去判斷經濟前景及資產價值走向。不過呢本《原則》講嘅,首先係做人處世以及工作上嘅原則。坦白講,呢本書講嘅好多嘢都十分之基本,例如話敢於夢想之餘亦要面對現實並且堅持到底,如果冇了解Ray嘅心路歷程,呢本書講嘅道理好易淪為兩毫子一公升嘅乜乜心靈雞湯系列。但正因為Ray白手興家,經歷過高低起跌,佢所學到並堅守嘅原則先至別具價值。

今日想同大家分享嘅,係一句老生常談:「No pain, no gain」。或者大家返工都係想「無驚無險、又到三點」,或者「行行企企,食飯幾味」。畢竟工作只係人生嘅一部份,冇人要求你貢獻整個人生畀公司,之不過工作係暫時嘅,職業生涯係長遠嘅,喺21世紀仲可以一成不變嘅工種同公司實在絕無僅有,於是無可避免地,大家一日未退休,大家一日都需要成長同進化,先不至於被時代淘汰。

——

借用容祖兒一首舊歌《舊日回憶的山丘》,「沒有起跌痛楚,成長怎麼過?」大家嘅成長,少不免遇過苛刻嘅上司同刻薄嘅客人。有時上天會對大家仁慈少少,洗牌之後派著一手好牌畀你,上司又友善,客人又易話為。不過問心嗰句,大家喺邊一個情況之下學到比較多嘢?以置記自己為例,多年嚟學到最多職場竅門同心法嘅時候,都係跟緊同一個既嚴謹又率直嘅老闆。當年雖則唔需要帶備娘親返工,但面皮必須有返幾尺厚先可以捱過每一日嘅質問、批評同挖苦。相反,置記從屬於絕頂好人嘅上司嘅時候,Learning curve先係最平坦。

老闆如是,客戶亦如是。或者每個銷售人員嘅願望都係啲客人懵盛盛自動波游埋嚟畀佣你賺,每個Sales嘅惡夢都係客人要求多多又態度惡劣,仲要搞一大輪都係搞搞陣、冇幫襯。但係置記都有做過Customer servicing,遇過嘅客戶奄尖腥悶有之;凡事「Okay!」、「Great!」、「Nice!」又有之;甚至遇過有啲客人問都唔問、二話不說、價都唔講就簽約科水。概括地講,「衰客」未必難湊,「好客」未必等如好結果,係我嘅體會。

先畀啲例子大家參考下,好壞每樣有啲:

「衰客」

  • 朝早Send email問你嘢,晏晝就已經追問你有回覆未
  • 開會例牌黑面兼聲大大,老實不客氣對你交嘅貨指指點點
  • 對工作嘅要求五時花、六時變,七時發花癲

「好客」

  • 唔該前、唔該後,周不時對於你表達感謝,甚至感激之情
  • 見面事必和顏悅色,甚至喺你老闆面前落足嘴頭盛讚你
  • 開會有商有量,由服務範圍、次序先後、時間表到價錢,萬事都有商量

如果換個角度睇,衰客其實係「有要求」嘅客人。有要求,意味住佢哋好清楚自己要啲乜嘢,佢哋亦勇於表達自己嘅需要,如果你火喉未夠,尚有機會畀老闆「Show Quali」安撫客人,反正合理又理性嘅老闆會知道你已經盡咗人事,要佢出手實在情非得已。如果老闆唔理解你嘅,咁就要返返去早兩段苦你身心、磨你體膚嘅Learning curve課題。及至日後呢啲「衰客」被馴服之後,你大概會有種「Mission completed」或者「Achievement unlocked」嘅感覺,呢種體驗,即使最終未必換來直接、金錢上嘅打賞,他朝你去下一個工作崗位亦肯定受用:因為再差嘅情況你都已經遇過,新嘅挑戰可能只係小菜一碟。

掉返轉,畀你湊著好客,表面上係一手好牌,好容易應付。不過,客戶關係實屬明買明賣,客人平日喺非金錢及非物質方面與你為善,多少係賣咗人情畀你。到客人真係有急事或者難題嘅時候,你可能根本唔好意思推搪或者耍太極,事關你先前多多少少欠咗佢。同埋呢,如果有個客人咁善解人意、聰明伶俐同埋平易近人,點解佢仲要畀錢你(或者你公司)賺呢?事出必有因,受得人錢財,你就預咗總有一日要替佢消災。

更加大鑊嘅情況,可能係你個客根本唔知自己需要啲乜,所以先至無論你畀咖喱味嘅屎,抑或屎味嘅咖喱畀佢,佢都會讚好食。因為佢冇嗅覺、冇味覺吖嘛。到客人真係有咩頭患身㷫要搵你幫手,佢可能都講唔出自己需要啲咩協助。咁你先前賺來嘅舒適寫意,咪又係一次過嘔凸?

——

再老套嘅說話,都有其價值。「唔辛苦邊得世間財」,我係真心相信嘅。畢竟,以經濟供求理論嚟講,長遠而言不論供應商亦或係客戶,都始終係理性嘅。有咩財富係唔使你出汗出力就到手?邊有咁大隻蛤乸隨街跳㗎。

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:講錢難免失感情,條件簽約前講清

置地記者:全城在變遷,不減你是你

置地記者:是非帶不走,唯有譽隨身

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案