置地記者:好聚好散──離職前要做好嘅七件事

置地記者:好聚好散──離職前要做好嘅七件事

而家返緊工嘅你,仲記唔記得收到Offer嗰一刻嘅雀躍、返工第一日嗰種既興奮又期待嘅心情?如果呢份工你返咗冇耐嘅,咁就試吓回憶返對上一份工,嗰種「愛你,只如初見」嘅青澀同甜美啦。

好喇,將鏡頭從回憶片段拉返嚟現實,你喺而家嘅崗位一段時間,係咪已經漸漸將工作視作例行公事?返工嘅衣著係咪仍然好似第一日咁樣執到企企理理?仲有冇嗰份激情同熱誠?抑或,已經心思思搵工,三日唔埋兩日上求職網睇下有咩好路數?甚或者,你把心一橫,心動不如行動,連面試都完成咗、遞埋信等緊返新工?

一個辭咗職嘅員工,個心完全奔向新僱主嘅懷抱,實在係人之常情。之不過,喺通知期(Notice period)期間,你同新老闆之間嘅障礙,就只有時間同埋現任僱主。見工以及返新工第一日要點樣趨吉避凶,大家或者都耳熟能詳。之但係,如何處理同昔日嘅新歡──分離在即嘅僱主嘅關係,大家又知道幾多?置記諗到七件事,希望提醒到大家。畢竟,分手分得唔好睇,日後江湖再見難免面左左,對你嘅聲譽都會有壞影響。


1. 協議離職日期,避免Short-notice

大家成日用「遞信」呢個動作作為辭職嘅代名詞,因為正統嚟講,僱員要向僱主作出書面通知,確定辭職意向,以及離職生效日期。僱傭合約一般寫到明你嘅通知期係幾長時間,試用期內可能係一日,過咗試用期嘅就通常一至三個月不等,我見過有啲高層要半年通知期添。

通知期嘅作用,對僱主嚟講係提供緩衝,用作填補空缺及確保工作順利交接。即使你用錢可以Buy-out contract(即係買斷合約,俗稱「賠錢走人」),但除非新公司極度等人用而肯幫你出埋錢,否則一般嚟講都唔建議咁樣做。就算真係要Buy-out,當事人最好都平衡新舊僱主嘅利益,協定一個大家都接受到嘅日子,方便大家迎接呢個轉變。


2. 做好內部交接,以免倒瀉籮蟹

夾好離職日期,老闆自然知道大家仲有幾多時間從你身上取回必須嘅知識同資訊。即使你手頭上有啲工作可以喺離職前完成,但係老闆緊張嘅係客戶關係同埋內部知識嘅傳承。因此,作為一個負責任嘅員工,請你有條理咁列出有待完成嘅工作、你所知道客戶嘅訴求、有乜嘢職責係九代單傳成條Team得返你一個識,以便老細安排其他人跟進、接手同學習。呢個亦係俗稱嘅「Hand-over」。

置記見過有舊同事一辭咗職就好似聾咗同埋患咗語言障礙咁,一係十問九唔應,一係就講啲唔講啲,搞到接手嘅同事裙拉褲甩。咁冇嘅,你做初一,我做十五,你Hand-over做得差,公司一定銘記於心,如果行頭窄嘅話,隨時連行家都知道你嘅「好人好事」,影響日後嘅前途。掉返轉咁諗,如果當初你新入職時,傳授知識同技巧畀你嘅同事求其馬虎,你有冇今時今日嘅成就?己所不欲,勿施於人呀。


3. 對外認真交代,介紹繼任人選

如果你有做過客戶經理嘅話,就知道客戶係好介意換人。因為原先熟悉自己脾性同需要嘅同事走咗,新接手嘅客戶經理未必有咁醒目,隨時又要將自己所有嘢同新人講解一次,都咪話唔費時失事。唔明?試吓幻想你公司用緊嗰間IT公司、服侍開你嗰位Technician換成另一位仁兄,一切溝通從零開始,你就會明白。

易地而處,喺你離開所屬崗位之前,如果你顧念你嘅客戶,請安排一次會面、一次電話會議,或至少一封電郵,介紹頂替你嘅同事畀客戶認識,當派吓定心丸都好吖。如果你有權推介繼任人選嘅話,就按照你對客戶嘅了解,建議老闆指定適合嘅人選啦。


4. 清理檯面及電腦桌面,不留痕跡

臨近Last day,係時候諗定個人物品點樣處置。冇人想接收你啲明星相或者旅行風景名勝擺設,更加冇人想喺你櫃桶入面搵到你啲Medical claim form或者食剩半支嘅繽紛樂。都係嗰句,換轉係你坐落去一個新嘅座位度而有啲舊人遺物喺度歡迎你,你會點?

另外,通常IT部門都會喺你離職後洗機,即係將你用過嘅電腦同電話還原至出廠時狀態。不過,如果你係熱愛將一切文件儲存喺Desktop備用嘅話,請考慮呢啲文件有冇需要留傳後世。關於客戶嘅嘢,唔該擺返去Common drive。


5. 派件體面散水餅,留個好印象

我仲記得自己第一次派散水餅,係派KFC葡撻。有少少懶特別,同埋因為當時要派嘅人比較多,喺平衡返預算嘅情況下出此下策。

今時今日,十二蚊三件嘅牛油蛋糕絕對係No-no。穩陣嘅做法,係視乎公司其他人平時請食下午茶或西餅嘅時候買開啲咩價位嘅貨而定。靚少少、十零蚊件嘅西餅可能啱啱好,但遇著同事太富泰、慣性買開Cupcake或Eclair做禮嘅話,你就要醒醒定定。

記住,人總係記住啲衰嘢嘅,你派出正正常常嘅散水餅冇咩人會記得,但係派得太騎呢同寒酸,就要預咗畀人笑足幾年咯。


6. 總結自己嘅經驗,重新上路

講咗咁多公關、門面、為他人著想嘅嘢,都係時候為自己打算下。趁未返新工之前,畀少少時間自己獨處一下,沉澱一下過去呢段時間嘅成長、得著、損失同挫折,心理上將呢一段過去好好放低,清空思緒迎接下一份工,係畀自己最好嘅轉工禮物。

如果你記得自己返呢份工之前嘅模樣,記得自己面試成功之後嘅喜悅,記得當初想喺呢個崗位達成啲乜嘢目標嘅話,不妨喺離職後回顧一下,數算返自己係超額完成抑或遠遜預期,評估吓箇中因由,反思所得應該可以幫到你喺下一份工嘅發揮。


7. Update CV或社交媒體,來日備用

喺專業嘅社交網絡,久唔久就有通知話某某人轉咗工或者升咗職。但係你有冇諗過,人哋事隔幾耐先至更新資料?一般嚟講,除非急於撇清關係或發展業務,否則等過咗試用期、坐暖張凳先至公告天下,會係一個比較穩妥嘅做法。

另外,你張履歷已經隨住你轉工而變得Outdated。雖然你未必即刻再次搵工,但係如果有空閒,稍為Update一下公司名、崗位同職責,都係為未來做好準備。喺呢個過程,你都會有另一個機會,比較吓新工作同上一份工,以及總結吓上一份工嘅成就。前車之鑒,後事之師呀。


做好以上七件事,其實並不保證你嘅舊同事對你留下正面評價。不過,Do the right thing,起碼叫做過得人、過得自己。你,可以昂首離開、安睡一晚,然後下一日就喺新嘅地方重新出發。

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:搵工唔想中伏?尋找Red flag的故事

置地記者:其實(老細)詐蠢,全為你付出的機智

置地記者:唔辛苦邊得世間財

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案