置地記者:搵工唔想中伏?尋找Red flag的故事

置地記者:搵工唔想中伏?尋找Red flag的故事

美國職業籃球聯盟(NBA)明星勒邦占士早前宣布離開家鄉嘅克里夫蘭騎士,轉投洛杉磯湖人,係佢長達15年嘅職業生涯中第三支效力嘅球隊。勒邦占士呢張履歷,算係比上不足、比下有餘,佢唔係從一而終嘅「One-club man」,但又唔係輾轉效力十幾間球會嘅「Journeyman」。

今時今日,喺職場上要求大家由廿歲到六十歲都只為同一個老闆打工,恐怕係強人所難。人總會成長,而魚唔過塘唔肥,所以轉工真係好正常、好等閒嘅事。之不過,轉飯鑊次數太多,或者頻率太高,對於其他人嚟講嘅觀感就唔太好。人哋未必知你跳槽背後嘅原因、藉口或者苦衷,即使你話上錯賊船,要及早跳船保平安,一次半次都仲講得通,但係三番四次嘅「遇人不淑」,就可能令人質疑你嘅眼光或智慧。

有見及此,置記同大家分享幾個斷症方法,喺面試期間及早識別有古怪嘅公司,避免凳都未坐暖就要拿拿臨起身嘅費時失事。


呢個位係點嚟?

首先,無論係自己搵工定係Recruiter引薦,都可以問問呢個招聘崗位係全新開設抑或係填補空缺。

如果係新開嘅,咁開位嘅原因係為咗配合業務擴張,抑或係另有苦衷?猶記得幾年前,監管機構要求銀行加緊打擊反洗黑錢活動,相關工序及工作量增加,自然要增聘人手。不過近來聽聞有啲工作崗位,例如話提升系統偵察可疑交易嘅Project team,就因為Project大功告成而散班,呢種有時限嘅Headcount嘅穩定性自然低啲。


上一任點解走?

如果係填補空缺嘅話,你就更加要發問:上一任做咗幾耐、點解離開?雖然人人故事唔同,但係有一個通用嘅原則:「阿婆走得快,一定有古怪」。如果上一任做唔夠半年就起身,除咗當事人貨不對辦、連試用期都過唔到之外,亦可能係公司情況太凶險要急住跳船;至於做咗介乎半年至兩年之間,當事人嘅能力應該經過考驗,但又做唔到三年呢個一般被視為較Solid嘅時限,咁間公司嘅管理或者文化就可能要深入研究一下。

進一步探討嘅方法有好多,香港本地固然有啲網站或討論區,周不時有僱員開Post討論公司嘅工作環境或前途,如果當中有負面評價嘅話就要小心啲。

向Recruiter查詢唔係唔得,不過最好留意返,獵頭族嘅角色存在利益衝突,出自佢哋口中嘅評價唔一定公允,可能經過包裝、漂白或美化。舉個例,如果你聽到「呢行近年人才好吃香,所以員工貨如輪轉」,咁你應該諗吓,間公司點解留唔到人,係因為先天不足,抑或孤寒度縮?

相比之下,向有關公司嘅現任或前任僱員了解,所得嘅答案會比較中肯,有朋友直接問就當然最好啦,否則問吓相熟友好仲有冇熟人可以代為搭路,亦不失為一個方法。即使唔方便直接回答,你從旁敲側擊了解呢位公司員工嘅效力年期同日後去向,都可能窺探到一啲蛛絲馬跡。置記就有朋友試過向舊同事探聽返未來僱主嘅虛實,一問之下就知道僱主喺面試期間講嘅嘢不盡不實。


直接抽擊

呢度亦帶出搵Red flag嘅另一個方法:珍惜面試期間發問嘅機會,並且嘗試鑒別面試官嘅神色,聽清楚對方嘅回應係老實定係含有大量水份。遇到好似Sales咁有求必應嘅Interviewer要加倍小心,因為你求職時,人哋亦可以求才若渴,飢渴到要用Too good to be true嘅言辭嚟氹你落疊。遇到「因為Team size唔大,所以冇乜是非」呢啲似是而非嘅邏輯,就要停一停、諗一諗喇。


希望以上呢啲小貼士可以幫到大家,如果有咩具體問題,歡迎留言,大家參詳一下,一切資料絕對保密。

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:其實(老細)詐蠢,全為你付出的機智

置地記者:唔辛苦邊得世間財

置地記者:講錢難免失感情,條件簽約前講清

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案