置地記者:「有天才,為何我們卻是無後半?」

置地記者:「有天才,為何我們卻是無後半?」如果你聽過一篇文章叫《傷仲永》的話,恭喜你,你同置記應該係同一個年代讀書嘅。如果你未聽過嘅話,我真係恭喜你呀,你大把青春吖嘛。同埋,我都唔介意講你聽,《傷仲永》呢個故事,係講一個天才橫溢嘅小朋友,喺缺乏後天栽培之下,才華逐漸消耗怠盡,最終與凡人無異。

▪ 置地記者:唔辛苦邊得世間財

▪ 置地記者:其實(老細)詐蠢,全為你付出的機智

咁今時今日,大家都唔會話冇書讀嘅,唔讀到上 Master Degree ,都起碼大學畢業或者有張沙紙啦。不過,即使你 GPA 爆 4 ,即使你又 Dean’s List 又 First Hon 畢業,往後仕途是否一帆風順,始終都係未知之數。

足球場上,有天份嘅球員當然多不勝數。能夠靠踢天才波而踢到出晒名嘅,都有唔少。但係,講到腳底功夫同腦筋發達程度不成正比嘅,意大利球員巴洛迪利 (Mario Balotelli) 都可以話係一個經典。球場外,巴洛迪利多次同教練鬧不和,紀律欠佳,更加試過喺屋企放煙花導致火警;球場上,佢唔識著龜背 (背心練習球衣) 、會同隊友打交、仲會單人埋門嘅時候思考人生,浪費大好機會。

巴洛迪利都曾經跟過一啲著名教練。其中,曼城前領隊文仙尼 (Roberto Mancini) 就對佢愛護有加,二人情同父子,時而攬頭攬頸,時而惡言相向。儘管文仙尼真係當「巴神」仔咁湊,奈何巴洛迪利屢勸不改,球會以紀律理由扣佢人工都毫無作用。最終,文仙尼決定放手畀「巴神」離隊,而巴洛迪利亦展開佢嘅浪人生涯,輾轉去咗法國搵食,但係表現依然飄忽,現年 28 歲、正值球員黃金時期嘅巴洛迪利,始終無法達到文仙尼口中「世上其中一個最優秀球員」嘅期望。

▪ 踏入25歲,要在職場上學懂的事

▪ 置地記者:面對老細的「意見調查」,始終相信沉默是金

《傷仲永》同巴洛迪利嘅故事,都係講緊有天才,但缺乏後天恰當嘅栽培嘅弊處。放諸職場,天才係講緊大家讀書學識嘅知識 (knowledge) ,但係真正需要在職培訓嘅,係手腕同心態。中文,我譯做 Soft-skills 同 Mindset 。而最攞命嘅,係你老細並無義務當你親生仔女咁教,肯提點下你咪算好囉,更加普遍嘅情景可能係:等到你自己撞晒板先至踩多一腳,煞有介事咁話「都叫咗你唔好咁做架啦!而家出事喇,你話點收科?

咁大家點樣避免自己成為另一個「職場巴洛迪利」?好簡單,唔好畀自己天才橫溢囉。你冇睇錯,我真係話,收埋自己啲才華、忘記自己 GPA 幾多分、 DSE 咩分數。只有咁樣,你先至去得到謙卑嘅入口。當成個 office 其他人都做咗若干年/月嘅嘢嘅時候,你邊科攞 A 又算老幾?你越係十項全能,身邊肯提點或者幫手嘅人就越少。掉返轉,如果你入到去成隻鵪鶉、咩都唔識咁嘅款,總有啲有同情心或者英雄主義上身嘅同事會出手幫幫手。

▪ 第一個星期上班,極速適應有方法!

▪ 14句不可對老細說的話(及老細的神邏輯)

如果態度正確,同事受落,老細見你漸漸融入團隊當中,或者就有誘因提攜一下。前人嘅經驗未必完全適用於今時今日嘅你,但係畀返多少規範你,知道多少 Dos & Don’ts ,就至少唔會好似「巴神」咁犯下無腦筋嘅錯誤。喺職場上被稱為「腦殘」,真係一個非同小可嘅侮辱呀。

希望大家都行穩職涯上嘅每一步,兌現到自己嘅潛能,而唔係終身做隻「潛力股」,或自嘆「懷才不遇」。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:佛系管治,弗係管治

置地記者:「我勸你早點歸去」

置地記者:「你說你不想歸去⋯⋯?」

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案