置地記者:《職場易潔鑊》

置地記者:《職場易潔鑊》講個秘密畀大家知:置記係識下廚煮兩味嘅!冇錯,就係來來去去都係嗰兩味,呢味同嗰味。雖然煮得唔叻,選擇又少,但係都算累積咗少少經驗,知道不鏽鋼鍋要好好控制油溫以免黐底,而易潔鑊有易潔塗層,小心錫住用,煮嗰個同洗碗嗰個都會好舒服。

▪下載ios版本jobsDB手機app 或 下載Android版jobsDB手機app

▪用jobsDB手機app搵工,AI幫你篩好至啱筍工

廚房有隻易潔鑊好辦事,職場上遇著易潔鑊呢,就未必咁容易。呢個概念邊度嚟嘅呢?我印象中,係台灣政壇。前總統馬英九以「不沾鍋」 (易潔鑊嘅台灣稱呼) 聞名,原本意思係講佢對於唔啱規矩、污糟拿渣嘅嘢都一律不沾手、不觸碰。不過後來引伸咗另一種講法,就係話馬英九非常珍惜羽毛,乜嘢都唔會攬上身,仲會撇得一乾二淨,是為真正「不沾鍋」。

喺香港,馬英九呢種人有一個比較老派嘅講法:「 A 字膊」。卸膊丫嘛,冇膊頭冇承擔丫嘛,有咩重擔就一味向下卸,要下屬食咗佢,都真係幾繪形繪聲。套用返「易潔鑊」呢個概念呢,我就覺得,反映到辦公室呢個熱廚房嘅現實,當四方八面都係油煙、鑊氣嘅時候,易潔鑊唔可以太過熱,又唔可以用不鏽鋼鑊鏟去兜食物,更加唔可以金屬刷或者百潔布去清洗,相當之身驕肉貴。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析

 

我都當然喺職場上遇過「易潔鑊」呢個物種。其實係唔常見嘅,而且畀你見到嘅,十居其九都係老江湖或者 old seafood 。即係,都要有返咁上下道行,先可以為自己添加嗰一浸塗層。無他,行走江湖,幾時進、幾時退,真係考驗個人修為。唔係話後生仔就唔識知所進退呀,係講緊生牯仔真係比較年少氣盛,容易逞英雄、爭表現或火遮眼而不必要地孭咗黑鑊,或俗稱「拿屎上身」。

不難想像,同「職場易潔鑊」做朋輩係相當之麻煩嘅一回事,因為大家咁高咁大,樓上壓落嚟要做某件事,「易潔鑊」可以好容易推到無雷公咁遠,而你就通常成為受害者,要硬食呢啲豬頭骨。不過你唔係最慘嗰個喎,做「易潔鑊」樓下嗰個下屬,仲慘。

唔明呀?一個好老細要具備咩條件先?高大、威猛、英俊、瀟灑?通通都唔係。一個好老細,係會幫下屬頂住外來嘅壓力,唔會畀唔同部門之間嘅鬥爭,影響到自己條 team 嘅士氣。但係「易潔鑊」呢,佢先要確保自己家宅平安,某程度上會有個誘因去耍走啲唔想關自己事嘅任務,但係有更多嘅時候,「易潔鑊」係要將工作下放,美其名係提拔新晉同事、畀佢哋有更多機會發揮所長,實質上,你知啦,咪又係卸囉,你作為下屬仲要冇得托手肘,名副其實硬食呀。

▪公司三文治——中層管理最抑鬱

▪置地記者:面對老細的「意見調查」,始終相信沉默是金

隨住近年香港商業版圖物轉星移,外資同本地公司讓路畀財雄勢大嘅中資公司,大家搵工都少不免會有機會試下見中資,甚或一個唔覺意入埋去做。我同你講,咁樣你遇上「易潔鑊」嘅機會係更加大嘅。。雖然而家香港仍然有佢一套嘅法治、監管、會計制度,是以喺中層同基層嘅員工,好大部份都仍然係本地土生土長嘅地頭蟲。但係呢,位於大老闆 (CEO) 同呢啲員工之間,係需要一條橋樑,一條隨時可閉合、需要時可以打返開嘅橋樑。

於是,事關 CEO  ,都需要有一啲「親信」,去為佢保駕護航,避免文化不相容嘅下屬浪費自己太多時間。「易潔鑊」就正好係呢啲「左右護法」嘅最佳人選,一來佢哋跟 CEO 搵食多時,熟知對方脾性,有咩要講都容易開口;二來佢哋同聲同氣,大家都係講返同一種語言 (甚至同一種捲舌嘅口音) ,唔似得我哋呢啲香港仔咁,即使商務普通話勉強講得通,涉及日常生活嘅 chit chat 就搭唔上嘴。最緊要嘅係,佢哋位處高層,儼如欽差大臣,但係就唔會做實質嘅決策,只係一個往下或往上嘅傳聲筒。如果大老闆心意已決,「易潔鑊」欽差當然唔會幫你抵擋,最多只會用一個比較舒服嘅方式叫你食咗佢。

面對呢種老細,除咗「順佢者昌」之外,我諗唔到啲咩其他好提議,事關佢哋揸住嘅係尚方寶劍,見此劍如面聖咁,你唔會想同「易潔鑊」過意唔去嘅。畢竟形勢比人強,除非你有能耐去返一啲「馬房文化」冇咁濃厚嘅地方,否則,與「易潔鑊」老闆共事都係無可避免。

 

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:《職場韋小寶》

置地記者:「一味擴音的喇叭,累人累己知道嗎?」

置地記者:其實(老細)詐蠢,全為你付出的機智

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案