置地記者:《職場楊修》

置地記者:楊修之死每次寫《職場演義》系列,都係置記曝露年齡嘅時間。例如話,「楊修之死」曾幾何時係中學中文課程嘅範文,畀初中生認識一下文言文嘅結構、用法,順道帶出一啲寓意,畀學生順手牽羊地學識一點點待人處世嘅道理。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析


如果大家同我一樣,都畢咗業好一段時間,又已經將老師嘅教誨一五一十地還返晒嘅話,咁我就先介紹下今集嘅主人翁楊修係邊位。

有玩過電腦遊戲《三國志》系列嘅朋友,對楊修嘅印象應該係智力幾高 (近 90 左右啦, 100 分滿分) 、政治力都 OK (80 左右?) ,但魅力麻麻地 (50 都未必有) ,而武力就低得可憐 (20 咁上下)  。換句話講,楊修係一個文人,能言善道,但係唔睇得又唔打得。

唔打得好容易解釋啦,咁點為之「唔睇得」呢?我嘅意思係,楊修係嗰種你見佢一鑊,會想打佢一鑊嘅人。人緣欠佳,口舌招尤,賣弄小聰明而得失他人,都係楊修嘅寫照。

《楊修之死》交代嘅,正正係楊修點解終年只得 44 歲嘅原因。當年曹魏仲未篡奪東漢皇朝呀。雖然佢老豆楊彪都係東漢大官,但係楊修似乎就冇喺佢老豆身上學識待人處世之道,仲要明知跟住嘅老闆曹操係一代方丈,下下出言頂撞都么心么肺,或者將曹操明示暗示嘅心意,以畫公仔畫出腸嘅方式一一說穿。係呀楊修鬥嘴贏到老闆喇,但係老闆不會忘記囉。當容忍去到極限之後,曹操就藉佢擾亂軍心之名,將楊修斬首示眾。

▪置地記者:「有天才,為何我們卻是無後半?」

▪你的「主子」如何,你的日子也必如何﹗了解上司性格將事半功倍

鏡頭 pan 返嚟現代,大家有冇諗起辦公室入面曾經出現過,一啲口齒伶俐,但係唔識 (或不屑) 睇人眉頭眼額嘅「聰明人」?呢類型「職場楊修」,其實都無分男女,而且同年齡亦冇必然關係。佢哋通常都比較多口,鍾意講嘢,但係唔太識得控制把口幾時收,情緒一到嗰陣,講出嚟嘅說話仲可以相當之難聽。

雖然話喺辦公室入面,你得罪同僚最多都只係不受歡迎或者畀人排儕,但係「職場楊修」又點會唔踩到老細條尾呢?老闆嘅本質係,好多嘢唔想明言,保持一啲曖昧或神秘感,方便改變心意時有下台階。但「職場楊修」太鍾意玩篤爆喇。舉個例,如果開會傾 annual dinner 食乜嘢,老闆冇出聲表態,大家當然就覺得按兵不動最好,或者可以自由發揮啦。但係「職場楊修」呢,就會企出嚟話,「老闆唔想主導輿論,但係心入面始終想保持傳統,大家照舊訂返上年嗰間中菜啦。」

係呀,最終大家嘅行為係符合老闆嘅心意喇,但係「職場楊修」嘅說穿呢,就好似將老闆放咗喺部 X 光機度咁,將佢啲心肝脾肺腎都睇通睇透。換轉係你都覺得唔舒服啦,何況係自命高人一等,自尊心比任何人都重嘅老闆呢?只要有任何一個知情人士向老闆打小報告,「職場楊修」喺老闆心目中嘅聲譽就多一隻黑豬仔。

▪職場上,你會說「真心話」嗎?

▪置地記者:面對老細的「意見調查」,始終相信沉默是金

我見過最大鑊嘅「職場楊修」,係佢時常將老闆嘅命令或旨意放喺口邊,例如話老闆吩咐佢同傳媒老闆要打好關係,佢就真係喺大庭廣眾講,話老闆要佢諗辦法巴結邊個老總,或者用啲咩奇怪方法去做好公關公作。言語之間呢,當然就會流露出「老闆真係好傻好天真」嘅輕蔑之情。行動上呢,礙於「職場楊修」唔睇得又唔打得嘅特質,老闆嘅使命十居其九係不能達到嘅。

如是者,「職場楊修」漸漸就會同以下一大抽罪名掛勾:「講你又唔聽,聽你又唔明,明你又唔做,做你又做錯,錯你又唔認……」。老闆請個人返嚟,無非都係想做好件事啫。只有小聰明而不知分寸,又無執行力嘅「職場楊修」,人頭落地當然只係時間嘅問題。

 

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章


延讀閱讀:

置地記者:「不招人妒,不是庸才。」

置地記者:《職場易潔鑊》

置地記者:「一味擴音的喇叭,累人累己知道嗎?」

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案