置地記者:《職場韋小寶》

置地記者:《職場韋小寶》如果要挑選一個職場上最佳學習榜樣嘅話,金庸小說《鹿鼎記》入面嘅韋小寶絕對係最佳人選之一。

無論係周星馳嘅電影,抑或係張衛健、陳小春主演嘅劇集,韋小寶都係一個假太監,即係人做小桂子、佢做小桂子,韋小寶身上係比一般太監多咁啲嘢、多咁個器官嘅。問題係,要行走宮中,以小桂子身份同各方周旋,第一件事當然要戒掉「露械」,否則海大富海公公晨早令佢人頭落地。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析


另外,韋小寶喺小桂子嘅身份以外,仲肩負住紅花會「反清復明」的重任,算係早咗三百年出現嘅「無間道」。呢頭要侍奉總舵主陳近南,嗰頭就要喺宮中向康熙皇帝盡忠。呢種雙重效忠嘅處境,難度應該比起大家談情說愛嘅時候啲咩「一腳踏兩船」高出一千幾百倍。

現實中大家當然唔使淨身先至返工啦。但係職場如戰場,如果可以跟返韋小寶學返一招半式,要行走江湖,安全系數都高啲啦。

第一招,亦係最緊要嘅一招,其實頭先已經講過:扮太監,直接啲講係「自我閹割」。咩解呢?如果你相信不招人妒是庸材,咁你就明白,喺公司做一個庸材係幾咁重要。你唔係真係要打到自己變懵仔,而係,你要 seen to be dumb 。當全世界都覺得你係蠢蠢哋、冇威脅嘅時候,啲咩是非、暗箭、閒話,自然同你沾不上邊。

你哋唔好以為我吹水或者靠嚇。今時今日,好多行業都係中資背景,領導層當然少不了來自北方的佢。中資嘅文化,唔係話 stereotyping 咁講,但普遍都係分黨分派,會親疏有別。越係努力攀附權貴,越係容易從高處跌落嚟。越係想表現自己,鋒芒畢露就更容易被槍打出頭鳥,只因為你冇靠山保護。

▪如何快速消耗同事對你的信任

▪[坎坷過後]3招讓上司不得不認同你的成果

喺你未有康熙撐腰之前,低調沉潛,係最簡單嘅保命方法。其他部門有咩奇難雜症,你即使知道點樣拆解,都有權保持緘默。唔係話唔為公司利益著想,而係,你捨己為人,冇人會多謝你嗰下弊吖嘛!逞一時之英雄,種下公司內嘅仇家或禍根,值得咩?

如果咁啱咁好彩,你老闆覺得你功高蓋主,喺佢缺乏安全感之下,你坐喺 office 會唔會感受到背後有道殺氣飄過?即使你自命做好心,諗住幫老闆疏通渠道都好,小家子氣嘅老闆大可以覺得你長袖善舞,密謀裡應外合推翻佢架。既然人心難測,安守本份免招殺身之禍,韋小寶提咗大家架喇。

除咗適當嘅時候詐蠢、好好韜光養晦,另一個韋小寶生存錦囊係「好仔兩頭暪」。我知我知,原本係「好女兩頭暪」,男家娘家、你暪我暪咁丫嘛。重點唔係男定女,而係無論你做任何一個崗位,你對上總有直屬老細,然後你老細對上又有個大老細。

▪刷鞋以外impress上司的方法

▪老細攻略——「控制型老細」只佔9%?最常見嘅類型係……

正常情況下,你老細同大老細立場一致就話相安無事啫,但如果兩個人唔啱椏呢?你應該效忠你老細,抑或係效忠你大老細?同樣地,如果大家喺跨國公司工作,有 Regional Head 做你 dotted line 又有本地嘅直屬上司,呢啲矛盾同衝突又係無日無之。

面對兩個都唔得罪得嘅人,你嘅處境都咪話唔尷尬。但韋小寶就現身說法,話畀大家知,如何表面上同時向兩位老闆盡忠,又如何醒目地對真相節儉,以至如何拿捏取捨,咩時候要犧牲其中一邊,乜嘢時候要向另一邊叩頭認錯。返工當然唔使 literally 跪玻璃,但係要企啱位置,唔得罪任何一個老闆,都真係對於語言藝術、創意思維、臨場應變等技能嘅一大考驗。

已故金庸先生話齋,韋小寶未聞孔孟道德, (不擇手段地) 適應環境,但又注重義氣。喺而家嘅香港,喺而家嘅職場,靈活走位而又不忘初心,或者都係一種生存之道。

置地記者
原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

檢視此作者的所有文章

延讀閱讀:

置地記者:「一味擴音的喇叭,累人累己知道嗎?」

置地記者:做塊階磚給你墊底

置地記者:「有天才,為何我們卻是無後半?」

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案