置地記者:講錢難免失感情,條件簽約前講清

置地記者:講錢難免失感情,條件簽約前講清

無論你有冇讀過法律都好,有一份法律文件係生活中必然會接觸到嘅──叫「合約」。

舉個例,今時今日小朋友出世,上班族父母要請陪月員幫手照顧產婦同初生嬰兒,呢度首先有份僱傭合約。又因為陪月員嘅工作性質,僱主要幫陪月員買家傭勞工保險(偷雞唔買另計,不過唔啱嘅嘢唔好做),投保協議書又係一份合約。如果感覺太遙遠嘅話,你用緊嘅流動電話通話連數據服務,使用前一樣有份上台合約等你簽。

合約一般嚟講由律師草擬,你就當一碟小菜由廚師主理咁樣理解啦。以僱傭合約為例,律師幫僱主起好草稿,好多條文都係例湯例水,而真正要修改嘅地方其實唔多,例如話僱員、簽約日子,以及大家最關心嘅「條件」,英文可以叫做「Consideration」。

無論你係做暑期工、Freelance、畢業後搵第一份工,抑或係職場老手轉工再轉工,傾條件都係必然發生嘅程序。不過呢,呢個步驟好微妙,唔可以一開始就討論,通常留返埋門一腳、簽約之前先至攤牌談判。正如你追女仔/男仔都唔會劈頭就表白啦。不過,凡事總有例外,有啲工作崗位明碼實價,招聘廣告已經列明薪酬、年假等條件,例如置記中五考完會考之後做嘅圖書館助理暑期工。

——

又攤牌、又談判,點解啲動詞咁有張力?明明招聘過程一路情投意合、樂也融融㗎喎。Come on,先禮後兵啫,僱主同僱員經過一大輪面試、彼此增進了解同認識,確定呢間公司嘅架構同文化、呢個求職者嘅技能同性格、呢個工作崗位對雙方都適合,最後先探討僱傭關係嘅核心──學黃子華喺劇集《絕代商驕》話齋,係等價交換呀。僱員付出時間、精力同勞力,僱主以薪酬及福利作為回報。

要拆掂呢啲涉及錢銀同資源分配嘅問題,將大家同意嘅銀碼同其他條件擺上合約,求職者先可以大筆一揮簽約加盟新公司。一般嚟講,一間公司有返咁上下規模嘅話,有幾多日年假、醫療福利保障金額、係用MPF(強積金)定ORSO(公積金),呢啲福利項目都係固定嘅,最多隨住職級而變化。換句話講,冇乜空間討價還價。

於是,各位打工仔可以同僱主(或者Head hunter)爭取嘅就只有底薪、佣金(如有)同埋Sign-on bonus。底薪同佣金基本上可以拎埋一齊嚟講,兩者基本上係此消彼長嘅,老底越豐厚,佣金比率會越低,呢個係畀Sales朋友們跑大啲條數嘅動力。

問題係,你轉工嘅時候一定會攞住而家份糧(或者一啲似有還無嘅市價)作為比較。無論你心頭高定冇所謂,有一個原則係必須堅守嘅:

一切數目,以白紙黑字寫落合約為準。

好重要,所以要不厭其煩講多次:

「一切數目,以白紙黑字寫落合約為準。」


以下三個事例,都係真人真事,睇完你就明。

——

事例一:畢業生A實習期完結,獲准轉長工,老闆話試用期間人工係一萬蚊,表面良好就喺三個月試用期後加到萬一。(謎之聲:唔怕一萬、至怕萬一?)其實問題嘅核心在於合約上只係講話入職底薪一萬,冇提及試用期後嘅調整。

三個月後,A通過試用期,但老闆對於當初下巴輕輕嘅萬一蚊印象依稀,幾經爭取先至勉為其難酌情加返五舊水。最後大家當然係不歡而散啦。

——

事例二:新同事B十月入職,人工萬二蚊,冇話試用期之後會點。到咗二月,公司埋數派花紅、加人工,個個同事歡天喜地,唯獨是B被告知因為新入職,年尾未過試用期而冇份收花紅,而人工亦冇得話跟通漲調整。

「十月入職嗰陣考慮咗呢個因素㗎喇。」老闆咁講。

你話B畀公司同老闆跣咗一鑊咩?理論上係唔可以咁講嘅,好多公司嘅政策都列明咩月份之後入職,或者未過試用期嘅同事,新一年係不獲薪酬調整或分派花紅嘅。當然,如果HR喺同事入職嘅時候清楚交代有關安排,同事自然冇得好拗,或者最多要求入職薪水酌量加返啲,以補償呢個Bad timing引致嘅Hard feeling。

——

事例三:求職者C透過獵頭公司搵工,好均真地計算好薪酬調整、轉工時期踏正年頭會冇咗舊公司份花紅,有主動要求Sign-on bonus補數。不過呢,求職者只能夠透過獵頭公司口頭覆述安排,白紙黑字寫明嘅只有入職薪酬同簽約獎金,日後嘅調整並無寫喺合約入面。

係咪好似事例一呢?今次分別在於出問題嘅係Head hunter,類似俗語講嘅「好女兩頭瞞」,同一個情況,向僱主及求職者作出充滿語言藝術嘅各自表述。無錯,交易係促成咗,不過僱主同僱員日後嘅跟進功夫,就已經超出咗獵頭公司嘅服務範圍。

——

以上案例話畀大家聽,即使老細可能都只係打份工,但條Team嘅Budget始終要由老細負責,任何唔喺合約出現嘅承諾或安排,基本上都係空頭支票,連參考價值都未必有。要排除呢啲不確定因素,一方面你可以選擇爭取到底,直至所有合約外嘅因素消失;另一方面,如果份工值得你放低對於金錢嘅堅持,能夠單純考慮合約上列出嘅條件而不作他想,咁就唔好喺返咗工之後苦苦思念嗰啲虛無飄渺嘅願景喇。

頭先有講過合約上關於金錢報酬嘅三個項目,第三個Sign-on bonus係比較特殊嘅,通常都係你有所捨棄、犧牲(例如事例三嘅舊公司年度花紅)先可以爭取新公司補償畀你,畢業生好少可有份。呢舊錢通常附帶條件,就係你要承諾做滿一段時間,通常係一年至兩年,否則一旦你喺Lock-up period期間劈炮或者被炒魷,就要將Sign-on bonus全額退回。呢個安排係均真嘅,接唔接受被綁,就如你零機價出新手機上台簽兩年合約咁,明買明賣,計返條數你就知道公司綁住你都係為咗保障自己。

其實轉工嘅時候有時會出現第四同第五個選項,分別係約滿酬金(Gratuity)同埋買斷舊合約(Buy-out)。約滿酬金顧名思義就係做滿一段數以年計嘅時間,公司就會付出合約總薪酬嘅若干百分比作為獎金。

至於Buy-out就係新公司畀錢你,等你喺舊公司Short-notice走人,早啲返新工──呢個對於舊公司嚟講固然係會打亂陣腳,對於你本人嘅聲譽亦冇好處,同埋記得要考慮埋報稅嘅問題,事關新公司會將呢舊錢當係你嘅收入一部份,而你就要為呢舊實質上唔係你袋嘅錢而交薪俸稅,計掂條數先好制。

正所謂「人情還人情,數目要分明」。大家打份工、出份糧,無非都係求財,唔係求氣。返工之前講清楚所有條件,返工之後就專心踏實咁做嘢,總好過返工之後心裡面有條刺。若然懷著悔恨或者被賣豬仔嘅感覺,呢份工你都好難打得長啦,係咪?

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:全城在變遷,不減你是你

置地記者:是非帶不走,唯有譽隨身

葉朗程:絕細

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案