置地記者:面對老細的「意見調查」,始終相信沉默是金

置地記者:面對老細的「意見調查」,始終相信沉默是金

「各位同事,公司希望了解同事嘅意見,方便日後制訂政策,為同事締造更理想嘅工作環境⋯⋯」

以上開場白,各位打工仔應該唔會陌生。無論公司大小,大規模至「員工意見調查」、「員工大會」;小規模至老闆與員工茶敘,都係常見嘅收集意見方式。

基本上,以上活動嘅動機或出發點都可能係單純而良好嘅。無他,老闆或公司嘅管理層即使有三頭六臂,都唔可能係大家肚入面嗰條蟲,只能夠從高層次、高角度鳥瞰公司情況。所以從基層或前線員工口中了解現實嘅另一面,都係有需要而且有用嘅。


直接或間接抽擊

唔少公司會透過大型嘅調查問卷收集資料,好處當然係慳水慳力,而且好多服務供應商會提供數據分析同報告,向好處諗係提供Insights,現實地講係交足功課,名副其實係「Seen to be done」,交差是也。「公司有聆聽員工嘅意見」,呢啲調查問卷同報告就係證據咯。當然,調查一般係不記名形式進行,員工喺匿名嘅情況下會講真話定係馬虎了事,其實都係無保證嘅。

至於面對面嘅訪談,無論係正式抑或隨意、喺會議室內抑或喺咖啡室內,都可以畀老闆正面而直接地了解員工嘅想法。當然,人力資源顧問都會「提醒」大家,話老細喺員工溝通嘅過程當中應該多聆聽、少說話,了解同事嘅心聲。一個常用嘅講法係,人與生俱來有兩隻耳仔、一張嘴,因此人喺聆聽同表達呢兩方面所花費嘅時間同精力嘅比例應該就係二比一。

不過現實上,坐喺老闆面前嘅各位,通常唔係如坐針氈,就係靜若處子(定係鵪鶉?)。越係傳統華資嘅公司,老闆同員工嘅關係越似家長同子女,員工溝通環節越係不著邊際或者流於表面。大概員工都知道老闆如方丈,「真嘢唔好攞出嚟講」,否則講完有手尾跟就麻煩。

你有張良計,老闆當然有過牆梯。除咗多聆聽,擺出開放、親民嘅姿態去紓緩緊張嘅氣氛,都有助促進溝通成效。聰明嘅老闆會安排單對單嘅見面,而且形式盡可能唔拘束,等員工放鬆心情之後可以暢所欲言,甚或唔覺意洩露咗兩句真心說話,例如話同事之間嘅蜚短流長,邊個同事對老細心懷不滿,之類。呢啲是非八卦未必有咩營養,但係對於老闆嚟講都係有用嘅資訊。

或者有讀者自命身手不凡,一方面可以飾演老細支針去提供線報,另一方面又可以喺同事面前面面俱圓。不過這些機會通常不屬於你的。呢種高風險玩意猶如踩鋼線,稍一平慎失去平衡就會跌個粉身碎骨。返工啫,唔使搵命搏嘅,係咪?


老闆往往唔係想像中咁Open

作為一個交過學費上過堂嘅打工仔,置記喺呢啲場面,都係相信沉默是金,保持微笑去回應老闆尖銳嘅問題,先係最安全嘅做法。即使你相信某個觀點,例如話「公司應該畀同事星期五Casual wear」或者「老闆唔應該計較同事幾點收工」,本質上係啱、對同事係有好處,但係老闆嘅喜好同Agenda你好少可完全掌握,口快快拋個建議出嚟,或者將一啲管理上嘅流弊一針見血地指出,風險係刺中老闆嘅痛處。

對於老闆嚟講,如果一個問題係容易解決嘅話,可能佢已經喺你發現之前解決咗。至於解決唔到嘅問題,老闆要採取容忍或鴕鳥政策處理,亦唔到你去管。更加弊嘅係,解決提出問題嘅人,絕對係更容易嘅Easy way out。除非你斷定此地不宜久留,或者手上有幾千萬未開頭,否則,未必值得為咗一啲公事上嘅問題而危及自己嘅飯碗。對於普通打工仔嚟講,安身立命、準時出糧,先至係重點,係咪?

 

置地記者

 

原本一心想做戰地,唔覺意去錯咗置地。
原本想走在最前線,唔小心做咗文員仔。
都係寫字嘅,都係記者啫,冇乜所謂啦。Facebook專頁

 

檢視此作者的所有文章

 

延讀閱讀:

置地記者:好聚好散──離職前要做好嘅七件事

置地記者:搵工唔想中伏?尋找Red flag的故事

置地記者:其實(老細)詐蠢,全為你付出的機智

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案