置地記者:「面對 Recruiter ,要識得 Say No。」

置地記者-面對-Recruiter-要識得-Say-No

大家如果有返咁上下嘅年紀,應該會記得「多多」同「寶寶龍」。係呀,香港九十年代嘅政府宣傳片,向市民 (其實主要係小朋友) 介紹返如何「保護自己,免受傷害」。其中一招,就係「畀人侵犯,要嗌唔好」。點解置記今日要同大家提起呢個集體回憶呢?當然就係同搵工有關啦。

喺求職或者搵工跳槽嘅過程當中,一係就你搵工,一係就工搵你。你搵工,自己填表格㩒 Submit 掣,成功失敗都係你自己負責任。但如果係工搵你呢?通常就涉及一個獵頭 (Head Hunter) 或者招聘中介 (Recruitment Agent) 。

▪唔想裸辭先嚟搵工?施展3大秘技,瞞天過海去見工!

▪見工不要犯這9個尷尬位 高衣Q應對突發情況為求職者帶來的考驗

置記都算好彩,咁多年嚟遇過嘅 Recruiter 都相當之親善。友善嘅笑容,親切嘅眼神,整齊嘅西裝……Recruiter 以專業嘅形象接觸你,當然希望獲得你嘅信任,將你嘅仕途,準確啲講係 CV (個人履歷,CV 全寫係 “curriculum vitae”) ,交託畀佢。

正如落老蘭飲嘢,有人想問你叫咩名甚至攞 contact 「抄牌」,都唔會單刀直入,開門見山嘅。 Recruiter 通常都有既定嘅方式去接觸求職者,例如話喺某個網站見到你嘅 profile ,想了解多啲呀;又或者佢手頭上有若干個 openings ,想睇下有冇邊個崗位啱你。

咁你滿心歡喜,自我介紹完一大輪,連現時待遇、叫價以至通知期都講埋畀 Recruiter 聽,佢就好可能會叫你將 CV 電郵畀佢。

▪認清CV內容 IN & OUT—個人私隱要保留 加入態度、價值觀會加分﹖

▪【CV技巧】Current及Expected salary如何寫才合理不蝕底?裸辭會影響身價?

喺呢個時候,我會建議大家停一停、諗一諗嘅。除非 Recruiter 已經清晰明確地介紹咗一個特定嘅崗位畀你去嘗試應徵,否則,你就咁掉咗履歷出去,等同畀 Recruiter 空手入白刃。得來全不費功夫嘅嘢,有幾矜貴?喺呢啲情況之下,你嘅履歷會成為 Recruiter 帶出去見客嘅 showcase ,但你係咪佢最想 sell 到畀佢嘅客人 (即係僱主) 嘅貨品 (即係求職者) 呢?冇保證,而且好大機會,你唔知頭唔知路嘅情況之下,做咗墊底嘅配菜。

係㗎!乜你唔知道, Recruiter 嘅米飯班主,其實係招聘員工嘅企業,而唔係你本人咩?你諗返,你求職到返工,一個仙都唔使畀個 Recruiter 架。真正畀佣金嘅,係僱主。當你從呢個角度睇返個供求關係嘅時候,你自然知道,自己嘅身段如果放得太低,就可能平白幫咗中介,但對自己一啲幫助都冇。

即使 Recruiter 真係有備而來,連份工嘅  Job Description 都一字不漏咁讀埋畀你聽都好,我都會建議你三思而後行。最基本,你搞清楚自己有冇申請過同一個崗位先啦。無論係自己報抑或透過另一個中介申請都好,你都唔應該再透過另一個 Agent 去申請架喇。對於僱主、對於原本嗰位中介 (如有) ,都唔好睇丫嘛。

▪你有冇轉工能力?人力資源顧問解構轉工5大要素,未做滿一年要考慮……

▪ HR問:「你覺得我點?」—見工面試遇着古怪問題,是故意刁難還是……

我就當呢個 opening 你未試過,你都要考慮多一點:對於 Recruiter 嚟講,佢要為每一個崗位尋找申請人,但有時唔係每份工都湊得夠人數,咁有時候,某啲 Recruiter 可能會退而求其次,就連未必 100% 匹配嘅求職者,只要求職者心甘情願 make a try , Recruiter 都會一併送呈僱主考慮。但大家都明白,喺咁嘅情況之下搵到工嘅機會,都真係相當之有限。

試諗下,如果每一次有中介埋身,作為求職者都來者不拒,咁樣你嘅履歷都會好快傳遍整個行頭。需知道每個 function 都有專責嘅 Recruiter ,而呢個圈子本身都唔會太大,你有幾 desperate 咁搵工,真係唔難估到。若然人哋覺得你狗急跳牆,你嘅議價能力自然應聲下跌。

所以話,識得講「唔好」,喺同獵頭公司交涉嘅過程當中都相當之重要。記住喇,良禽擇木而棲,見到適合嘅僱主、同自己事業目標一致嘅 opening ,先至將自己嘅 CV 交託畀 Head Hunter 啦。

置地記者

 

原本一心想做戰地,唔覺意去錯咗置地。 原本想走在最前線,唔小心做咗文員仔。 都係寫字嘅,都係記者啫,冇乜所謂啦。

 

檢視此作者的所有文章

 

閱讀:

置地記者:「重要但往往被忽略嘅離職理由」

置地記者:《職場滅火筒》

《置地記者》:馬雲解密—996與669的因果關係

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案