老闆飯局心慌慌?留心Dos and Don’ts

老闆飯局心慌慌?留心Dos and Don’ts打工仔每次聽到「今晚老闆請食飯﹗」,相信悲多於喜。「有幸」加入老闆飯局,係咪感覺如坐針氈?太拘謹又驚佢唔自在,太放鬆太Hyper又驚佢以為你唔尊重佢,想安心過渡慌心飯局,有咩細節要留意?

鎖定最佳位置

無論係幾多人嘅飯局,坐啱位置好緊要,睇清楚飯局嘅勢力範圍,如果你仲係處於新人階段,或非高層人士,你最好等老闆同管理層就坐後先坐低,以表尊重。最好跟同部門或職級相近嘅同事一齊坐,因為隔離嗰個撩你傾偈,你都唔需要裝出一副「應酬戰鬥格」,心情可以放鬆啲。

適時主動和應

飯局嘅重點都係離唔開吹水。好多老闆會搵話題閒聊,想同員工拉近距離。如果係無關痛癢嘅話題,例如去邊度旅行好玩,你大可主動加入閒聊行列,唔好一味沉默,但亦唔好講太私人嘅事情。萬一話題比較正經,或者係你唔在行嘅嘢,就要樂於聆聽,並適時展現微笑。

切忌小圈子自High

有相熟嘅同事坐隔離當然好,但如果你哋掛住起勢傾,笑到忘晒形,或攞晒手機出嚟玩Selfie,氣氛情緒高漲,對於其他部門同事,特別係老闆嚟講,會覺得你哋似小圈子飯聚,瞬間存在感冇晒。始終有老闆在場,點都要顧全大局,大方得體,不時同在場其他同事保持眼神交流。

老闆唔係老馮請客

食完飯唔好以為一定係老闆找數(除非佢事先講明),如果侍應遞張單埋嚟你度,都要大方找數(最多問同事夾番錢);如果老闆或上司埋單,唔好咁快講多謝,應該問一聲:「每人夾番幾多?」如對方表明請客,你先講多謝。咁樣就唔會俾人覺得你老馮要人請,尷尬都少啲啦。 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案