聶瞳:如果我好肯定咁同你講,呢個世界好人無好報,你仲做唔做好人?
聶瞳-如果我好肯定咁同你講-呢個世界好人無好報-你仲做唔做好人

試過有個新客要搵人,呢間公司係由一個澳洲人嚟香港開設,賣鞋嘅,office有6個員工,開咗大約半年左右,所以冇任何舊record可以追溯。我安排咗一位求職者去見工,不過佢見完第一次之後,我就收到消息話呢間公司會拖糧,因為上一手離職嘅員工,正正係由另一間headhunt搵返嚟,第一個月已經遲咗一個星期出糧,第二同第三個月直情冇糧出,上一手走咗,呢個新客亦輾轉間搵到我間headhunt再請人。

▪下載ios版本jobsDB手機app 或 下載Android版jobsDB手機app

▪【職場癌細胞】看old seafood如何點金成石,將人才變庸才

既然有行家過料,梗係要提醒求職者啦,何況佢即將要去second interview,只係求職者好鍾意呢間公司,唔止冇聽我勸告,更加向澳洲老闆講我爆佢哋拖糧,結果個客就打嚟投訴,上司都話我多事:「佢肯找數畀我哋咪得囉!可能經過上次教訓,呢個客以後請人會準時出糧呢!你嘅職責就係幫個客place人,佢以後係咪遲出糧唔關你事㗎喎,合約冇講明你要照顧埋呢方面嘅問題,總之guarantee period係四個禮拜,就係咁簡單。」

個客要請,個求職者要做,上司話我枉作小人,咁你哋鍾意點就點啦!不過四個月之後,同樣事情再度發生,呢個求職者打嚟搵我求助,又係近兩個月冇糧出,最後我要幫手call個澳洲老闆追,過程軟硬兼施,勸又勸過,勞工處又去過,呢單嘢足足搞咗半年先追返份糧。

就當客人同求職者係街外人,咁熟人會唔會好啲呀?我公司個receptionist係嬸嬸唔係姐姐,有時佢會畀Admin同事點去搬啲重嘢,例如將啲枱枱櫈櫈搬去士多房,又或者pantry冇人肯換水,佢次次都會穿過幾個部門,山長水遠嚟搵我幫手,因為坐近佢嗰班男同事比較難相處同埋態度差。我並唔抗拒幫忙,甚至會擺低晒手頭上啲嘢去做咗先,都係幾分鐘搞掂嘅事啫,速戰速決仲好啦!但係後來發現,我約求職者上嚟見工嗰陣,就算已經喺公司system mark好晒幾點鐘同埋邊間房,我嘅求職者好多時都入唔到去,要坐喺reception前面個梳化呆等,某一次我忍唔住去搵原因,發覺有啲同事唔跟規矩冇book會議室,竟然又可以安排到佢哋嘅求職者入去,點解呢?原來係receptionist驚得罪嗰班同事,見我份人易話為,寧願要我屈就同埋讓路。

再講多一件事,隔離位女同事枱底個插蘇成日鬆,由於佢著短裙高跟鞋實在唔方便,次次我都會請佢先行出嚟,然後捐落去枱底幫佢整,不過有一次要趕住3點鐘同個客con call,當時得返一分鐘唔夠,佢個插蘇又出事要我幫忙,我只係講咗句等等,佢就面露不悅,搵咗另一個人幫手,返轉頭仲要埋怨我。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析

好多人都話,對人太好,人哋會當係老馮,當係應份,次次都幫變咗一種慣性,有時仲唔及一個做開反派嘅人施予小恩小惠,如果能夠化身為一個壞人或者難相處嘅人,得到嘅方便同埋尊重其實更多,呢一點我明白,亦不得不認同,問題係我哋呢種人本性係咁,你叫我下下黑面對人,句句串人窒到應,做嘢永遠唔幫忙,唔係唔得,不過咁樣做好唔舒服,呢個唔係自己。 

如果呢個世界真係好人無好報,咁仲做唔做好人?

我相信我都係會做,遇到古怪客會提醒求職者、receptionist要搬嘢換水照幫、女同事枱底個插蘇鬆咗會幫手整,因為我相信一個人嘅磁場係點,就會吸引乜嘢人埋嚟我身邊,舉手之勞絕對冇問題,但呢班人亦只係得到我咁多,離開咗呢個範圍,彼此之間就唔會係朋友。佢哋對人嘅方式同埋態度,係影響緊而家同埋將來遇到乜嘢人同埋乜嘢事,呢個已經係最大嘅懲罰,我哋無需要被呢班人同化。

▪ 聶瞳:辭職後獲公司挽留,不代表你無法取替

▪ AI搶你份工?唔係,係幫你搵啱工﹗用得愈密命中率愈高

聶瞳

 

曾任記者,現職獵頭,2018年推出第一本書,同FB專頁一樣叫做【辦公室日報X聶瞳】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。

 

檢視此作者的所有文章

延讀閱讀:

聶瞳:想做一份工但做唔到,其實只因未準備好

聶瞳:老細好公司好,員工照走佬?部門離職率高企要搵源頭

見工必答題之「點解你想做呢份工」

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案