聶瞳:向年齡歧視說不,睇CV不如見真人

聶瞳:向年齡歧視說不,睇CV不如見真人

幾年前我個客想搵一位Manager管住條Sales team,講明要有經驗,又要有幹勁;要識得衝,又要冷靜地幫公司訂立長遠目標。老實講,我見咗幾個求職者都未搵到人擁有晒呢啲條件,直到我收到Elaine嘅CV,當年佢55歲,過往嘅經驗非常適合,只係再睇真啲,原來已經接近一年冇工作。

作為一個Recruiter,睇CV不如見真人,有咩好得過面對面互相了解?如果單憑幾張紙去判斷一個人,其實電腦都可以取替我哋。但現實中,信自己嘅感覺同眼光先至唔會走寶。

——

坦白講,我同Elaine嘅年紀有啲距離,加上佢的確有一種做阿姐嘅霸氣,Interview初期我都覺得有壓力。不過一路傾落去,我發現佢其實好有料,而失業一年只係因為舊公司要佢長駐海外,唯有忍痛辭職,其後歲數同埋薪酬就成為咗佢呢一年搵工嘅絆腳石。後來大家傾得熟絡,佢甚至透露自己搵工已經搵到好灰,最近想攞保安牌轉行。

保安唔係唔好,行行出狀元,只係我覺得Elaine嘅技能同專長實在係佢不可多得嘅本錢,所以我力勸個客見一見Elaine。唔使估都知,當中一定會遇到唔少阻力,包括年紀大同失業咗接近一年呢啲標籤。我唯有同個客解釋,大家都會有50歲呢一日,冇人可以青春常駐,如果我哋到時都失業呢?每一個人都需要一個公平嘅機會,包括你、我,同埋Elaine,更何況Elaine喺經驗、學歷、談吐舉止,以至思想應對方面都完全符合呢份工作。

「你見咗先啦!」我同個客喺電話入面講得最多就係呢句說話,重覆又重覆。

——

好高興客人最後都有見,一共兩次Interview,Elaine一如我所料被錄用,結果並唔意外。最意外嘅反而係呢個客之後幾年不斷搵我幫佢請人,每次嘅開場白都係:「幫我請啲好似Elaine呢類質素嘅人!」

其實每個Recruiter都可以請到一個好似Elaine咁嘅人,只要唔好喺年齡上面貼標籤,要記住經驗係無價,唔係讀書可以讀返嚟,呢樣嘢可以為公司帶嚟巨大貢獻。至於失業咗一段時間或者其他嘅問題,其實應該嘗試面對面了解清楚,都係嗰句,睇CV不如見真人,唔好太快就將人哋定位,親身去判斷先至係最準確。

作為求職者,三十而立,四十而不惑,五十而知天命,無論你去到任何一個階段,請堅信自己嘅經驗同價值,就好似Elaine咁,唔好被輕易擊倒,共勉之!

 

聶瞳

 

曾任記者,現職獵頭,2018年推出第一本書,同FB專頁一樣叫做【辦公室日報X聶瞳】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。

 

檢視此作者的所有文章

 

延讀閱讀:

Son姐教路:七日通知期、無醫療保險是伏工嗎?

乞客:小費去哪兒?

[職場故事]90分的薯條已經交到貨(?)

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案