聶瞳:老細好公司好,員工照走佬?部門離職率高企要搵源頭

老細好公司好,員工照走佬?部門離職率高企要搵源頭

客人叫我哋獵頭公司幫手請人,背後原因不外乎嗰幾個,其中一種係部門同事不斷流失,離職率高企,呢啲單真係金礦嚟㗎,簡單講句就係長做長有,兩三個月後梗會再幫襯你,長極都係半年,驚冇生意呀?不如驚搵唔切求職者畀個客仲好啦!

好多人一定會講:「抵死!間公司衰咪留唔住人囉!」其實呢句又啱唔晒,唔知大家有冇親身經歷,有時同一間公司入面,唔同部門都有唔同文化同埋氣氛,我間獵頭公司亦唔例外,自己嗰組啲人做得好穩定,個個有講有笑,工餘亦唔介意一齊玩,不過隔離組就係另一個世界,粗略估計平均兩個月有一次散水餅食,不歡而散嘅故事亦周不時上演,仲試過有新同事返咗四日工之後失蹤,冇正面辭職但就寄返啲員工證同埋櫃桶鎖匙去人事部。

老細好,公司好,但都有員工捱唔到。其中一次係個客搵我做招聘,我幫過佢哋唔同部門請人,Junior有CS,Senior有HRAccountSales Manager等等,個個都係請完之後冇走過,仲成日畀Staff Price我買公司產品,唯獨係Marketing部門反數據,同一個Position一年幫佢請咗四次人,呢間公司完全冇問題,福利好,薪高糧準,個brand又靚,而個老細亦好親民,每逢有新人返工都紆尊降貴請食飯,我相信自己同HR都唔係癥結所在,彼此合作過N次,我知佢要乜,佢亦從來唔會刻意留難。

講到咁好,Marketing部門一年走四個又點解釋呀?問題就係佢哋個阿姐,當其他部門都係朝九晚六準時收工嘅時候,Marketing同事係有潛規則要加班,唔OT就有面色睇、有說話聽、有手尾跟,人哋部門溝通良好,工作可以一兩Take OK,Marketing個阿姐就為改而改,營造畀老細知道佢好高要求,不過當啲嘢改到第Z個Version嗰陣,佢就返轉頭要返A Version,當然仲唔少得平時工作上嘅冷言冷語同苛刻作風啦!

以上資料係嗰四位離職嘅「過客」提供,四個人互不相識,性格亦好唔同,但口徑一致,所以唔係生安白造,加上我同HR好熟,某次膽粗粗同佢傾呢個問題:「我係咪得罪咗你而自己唔知呀?聽講呢個阿姐好極品喎,你仲係咁叫我請人?」

HR:「所以啲人係咁走我都冇詐你型,無窮無盡嘅生意呀!」

我:「既然知道呢個部門咁惡劣,我唔想害求職者喇,不如咁啦,炒咗個阿姐,我幫你從頭到尾請過晒啦,小數怕長計,包你慳一大筆。」

雖然隔住個電話,但我彷彿聽到HR姐姐嘅呼吸聲同心跳聲,嗰種好想Say Yes又唔可以講出口嘅複雜情緒,容許我用「淒美」呢個詞語去形容,最後我哋講咗另一啲話題匆匆帶過,係一種想炒又不能炒,想認同又不能認同嘅傷痛。

全公司離職率高企冇嘢好講,但如果係某一個部門嘅員工好似走馬燈咁轉,其實應該好似病毒咁,搵出個源頭先可以解決,否則請幾多人都係治標唔治本,試想像市場上嘅人就係得咁多,好嘅唔肯嚟、聽過間公司惡頂嘅人又拒絕過檔、肯試肯捱嘅人又嚇走晒,最後退而求其次請啲聽話但未夠班嘅人,最大嘅損失咪又係老細同間公司。

聶瞳

 

曾任記者,現職獵頭,2018年推出第一本書,同FB專頁一樣叫做【辦公室日報X聶瞳】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。

 

檢視此作者的所有文章


延讀閱讀:

聶瞳:向年齡歧視說不,睇CV不如見真人

Son姐教路:七日通知期、無醫療保險是伏工嗎?

乞客:小費去哪兒?

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案