[職場故事]做零售真係搵命博

職場故事-做零售真係搵命博

 (網絡圖片)

jobsDB於2017年8月至9月招募網友分享自己深刻的職場故事,我們在此分享一些特別又具啓發性的得獎作品,為各位職場同路人打打氣!


作者:Polly

行業:零售

幾年前,我喺某間書店擔當店務員職位。當時正值係過咗繁忙時間,大約下午四點鐘,我喺場内執緊書架嘅時候,有個其貌不揚嘅女人走過嚟問我:「邊本街道圖嘅書好啲?」

Polly2_tuned

我介紹左某本暢銷書畀佢,同埋講解當中細節,之後個女人突然粒聲唔出,拎住本書跑咗出店外!因為呢間書店係街舖嚟,所以我追出去大叫:「小姐,你未畀錢㗎喎!」佢好淡定頭也不回咁回應左一句:「我拎畀我老公睇下啱唔啱先再決定買唔買!」

此時,佢經過對面無斑馬線嘅馬路,我緊貼其後,一輛正駛緊過嚟嘅私家車差少少就撞到我。因為街道盲點太多,道路兩旁都停泊咗好多私家車,但我無理會,一心只係想叫停個女人同埋拎返本書返書店,所以我繼續追,直到我見到個女人迅速上左一架停泊喺書店對面上少少路邊嘅私家車,仲順手關埋車門。

我心諗:「呢個咩人嚟㗎?光天化日之下咁猖狂,唔係諗住偷完書揸車走人呀嘛?」原來佢係畀佢隔離個男人(應該係佢老公)睇嗰本書,個男人揭咗幾頁就話本書唔啱,然後交返本書畀我拎返書店!

事後,我心諗:估唔到做呢份工都要搵命博,仲差啲被車撞,但係職責所在唔追又唔得!同埋,點解明明係個男人要本書又唔自己過嚟睇?係咪驚抄牌?其實個女人未畀錢就拎走本書已經可以告佢盜竊,遇著呢啲所謂顧客真係當我唔好彩!

因為平時返工我部手機都放在locker冇拎到出去,所以如果嗰次佢真係攞咗本書就開車走,我都影唔到佢車牌作為罪證。此事令我深深明白到,手提電話真係要跟身,有咩事發生都可以影低保障自己,同埋就算要追「賊」都要留意身邊事物,確保自身安全,千祈唔好魯莽行事,喺可行嘅情況下告知其他同事互相幫忙。

 

你有沒有一些有趣又深刻的職場故事,想與網友分享?
歡迎將你的故事電郵至Editor@jobsDB.com

 

延伸閱讀:

[職場故事]極品客戶可以將你洗到幾盡?

[職場故事]面對蠻不講理的客戶來電,你會如何應對?

[職場故事]真誠的幫助會烙印於客人眼裡

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案