[職場故事]極品客戶可以將你洗到幾盡?

[職場故事]極品客戶可以將你洗到幾盡?

jobsDB於2017年8月至9月招募網友分享自己深刻的職場故事,我們在此分享一些特別又具啓發性的得獎作品,為各位職場同路人打打氣!


作者:TK

行業:客戶服務

話說敝公司係提供一啲同網絡有關嘅服務,之前接手咗一批客,其中有部份又惡又諸多奇怪要求。畀得起錢,有要求本來都好正常,咁咪忍讓吓囉,揾食艱難嘛;但後來有啲要求越來越離譜,甚至去到忍無可忍嘅地步,真係衰到無朋友。

——

話說公司同某大iBank簽咗約,買產品同服務之餘,仲要求我地畀一個技術員駐場支援,事關可以即 call 即到,有乜突發事情都可以第一時間去幫佢地解決。咁既然以客為尊,我哋就安排咗個資深技術員駐場。

最初都正正常常做嘢,但後來個客就越來越離譜,完美演繹「洗人唔洗本」。點洗?我個同事係負責維修、problem solving,同教個客啲同事用個system,工作本來好清楚,但個客好似當自己係貴族,我同事就係「下人」同「打雜」咁,一時就叫我個同事去執紙皮、執垃圾,一時又要佢幫手入人事部資料(真係咁都得?)。個receptionist放飯,仲竟然叫佢坐喺reception聽電話。

佢曾經諗住好言相向同個客傾,點知個客話:啲秘書姐姐唔肯坐reception嘛,又話請咗part-time啦,但係個part-time又唔係成日返,所以咪要你坐reception幫吓手囉,講到好似係理所當然咁。人哋出去食飯,我同事就要喺reception一邊食飯,一邊接電話;有時仲早少少叫飯喺寄信房偷偷地快食,食完去坐reception。因為佢本身唔係個客間公司嘅員工,所以連位都無,佢每日只能夠等啲司機出咗車先可以有位坐,有如活在食物鏈最底層嘅浮游生物,真係慘慘豬!

——

做account review時,曾經同公司高層人士反映呢個問題,答案係:「咁你咪當幫吓個客囉!」我心諗:「大佬呀,個同事係麻甩佬,英文又唔係叻,又唔識操作個電話總機系統,有外籍客人打電話問嘢佢又唔識答,接線又手忙腳亂,system有事時佢又唔知去整機先定等個receptionist食完飯返嚟先去整,收call唔去整又比人鬧,啲街客上到去問開戶口佢又唔識答。」就因為咁,個同事成日無辜辜比人勁。喺我接手呢個account之前,呢位同事已經度過咗年幾咁嘅工作生活,直情灰到爆,比人到傻咗,搞到佢勁迷失,唔知自己做緊乜!

於是,我哋膽粗粗再同個客講,今次轉一吓方式,先問個客通常乜嘢人會去開戶,最低開戶要幾錢,佢答起碼要有幾多百萬,咁我就扮傻問:「如果啲客人上到去見到有個麻甩佬坐喺reception度,又著住我哋公司制服(注意:唔係間 Bank 嘅制服喎!)接緊電話,成個畫面好似唔太好,有失佢哋尊貴形象喎(其實已經好婉轉好客氣)。」聽完之後,佢就死死地氣唔再叫我同事坐reception,但跟住就成日360度搵嘢投訴發難渣,明明係佢哋自己IT個server死咗,就打去地球另一端嘅總公司投訴我哋;做customer satisfaction survey時又比好低分個同事,務求要佢無人工加,真係比佢搞到人都癲……

——

總結:遇上頂級衰客,令我深深明白到……「衰客如同邪靈,一旦附上,就好難搞!」願主祝福大家唔好遇上衰客,阿門!

(image via freepik)

 

你有沒有一些有趣又深刻的職場故事,想與網友分享?
歡迎將你的故事電郵至Editor@jobsDB.com

 

延伸閱讀:

[職場故事]面對蠻不講理的客戶來電,你會如何應對?

[職場故事]真誠的幫助會烙印於客人眼裡

[職場故事]90分的薯條已經交到貨(?)

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案