[職場故事]90分的薯條已經交到貨(?)

職場故事-90分的薯條已經交到貨

jobsDB於2017年4月至5月招募網友分享自己深刻的職場故事,我們在此分享一些特別又具啓發性的得獎作品,為各位職場同路人打打氣!


作者:lau chik kam

行業:餐飲業

喺香港,相信好多人都做過暑期工,原因都不外乎係搵錢準備升大學交學費,或者是但打吓工等以後搵工有啲野寫吓。而我都唔例外,中學時期曾經喺某快餐店做過暑期工,嗰時真係諗住hea做,反正唔係諗住喺餐飲業發展,做完3個月就拍吓pat pat走人。但係回想返,其實嗰次既暑期工經驗,係幫我打好咗進入社會做嘢嘅思想準備。

話說嗰時我做炸薯條,因為啱啱入職,算係唔使點教嘅工作就係炸薯條。我抱住「做又36,唔做又36」、「炒我都唔驚」嘅心態去炸薯條,冇嘢嘅,係有時可能炸得慢啲,或者炸嘅時間長短不一,但都冇人投訴、冇人理嘅。如是者,做咗一個月多啲,覺得做到合埋眼都識嘅我更加hea,炸薯條都可以炸到發呆,結果搞到成盤嘅薯條overcooked。嗰吓我當然又係抱住「炒我也不怕」嘅心態,照拎啲炸得差嘅薯條上枱啦,點知真係有人投訴,令到經理注意到我……

於是,經理就約我傾偈。好快,唔使3秒,佢就洞悉到我嘅心態,然後佢就同我講咗個薯條嘅比喻。

佢話:「一條薯條,炸到最美味嘅黃金脆度可能係要exactly 30秒,如果你用10秒去炸就會太脆,用50秒去炸就會太軟;如果你用20秒或40秒去炸,佢同用30秒炸嘅效果可能只差一點點,但都算係有90分。就咁睇,其實你用10至50秒去炸呢條薯條,佢都會係炸薯條,照樣可以serve客人,只係客人會感受到味道不同,但食店已經算係交左貨。如果你用多啲心機,用20至40秒去炸條薯條,其實客人食到嘅已經係90分,甚至有機會係100分嘅製成品,咁係咪唔使咁執著一定要條條exactly 30秒呢?」

「但我話你知,做人做事,好多時你要交貨好易,隨便做做都交到;而如果你要交90分貨,都唔難㗎,畀多啲心機就得。但當個個人都輕易做到90分,咁你又有咩selling point要人地buy你嗰90分?其實就算要交100分,都係唔難㗎,難在堅持同埋清楚知道自己要做到100分!我知你唔志在呢份工,但我想提醒你喺以後嘅做人處事上,都要抱住做好100分嘅心理準備,因為當你冇呢個心嘅話,就算件事係好易100分,你都會做唔到。」

聽完佢呢番話,我真係啞左。佢其實唔使同我講咁多,亦唔需要袋錢落我個袋,可能簡單同我講句「下次炸好啲,否則就炒你」就已經夠。但從佢嘅用心,我明白到佢都係一個想做到事事100分嘅人,而所以佢想手下嘅人都做到100分嚟幫佢!

經過呢件事,我即使心知自己唔會做餐飲業,都好專心咁炸薯條,甚至去了解同學習其他崗位嘅嘢,實行充實自己、裝備自己。我而家做人做事,都一樣事事做足100分㗎!

 

你有沒有一些有趣又深刻的職場故事,想與網友分享?
歡迎將你的故事電郵至Editor@jobsDB.com

 

延伸閱讀:

[職場故事]我為何選擇「紮鐵」這條路

[職場故事]際遇真的比實力更重要?

[職場故事]能屈能伸才算是成功的上司

想搵酒店及餐飲業好工?想知唔同職位可以搵幾多?即刻上「Hospitality/F&B Frontline 前線酒店及餐飲業專頁」睇睇!

 

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案