【職場fresh grad】返工第一星期 時間線大拆解 8大步驟融入職場

 

職場fresh grad-返工第一星期 時間線大拆解 -8大步驟融入職場

從學生哥變成打工仔,身份唔同,無人再有義務教你做人做事,心情緊張忐忑不安吧!返工第一日,十萬個問號在心頭:點樣自我介紹好呢?係咪要同個個人打招呼?係咪有人會俾嘢我做?同事食晏講咩好?⋯⋯終於一天過去,幾點收工走人呢?緊接落去嗰幾日,係咪會日日一齊食飯?做錯野點算好?同事相處態度熱烈定平淡?小編梳理十大技巧,教你瞬間華麗轉身適應職場。

 

First Day:保持微笑  進入工作Mode

00:00. 衣服端莊整齊無臭味

前一晚記得搵定著咩衫!建議著得正式啲,即使見工當日睇到同事都係著牛仔褲波鞋,自己都係著返套裝、恤衫或連身裙。裙最好及膝,別太長也別太短。夏天呢,衣服質地多數係棉,真係好易皺,當然最好係預先燙平。整齊貼服嘅衣飾能夠營造一個良好形象!同埋,天時暑熱,行幾步路就會滿頭大汗,男仔要小心腋下汗濕,做好防汗防臭,魔鬼盡在細節裏。女仔應化淡妝,唔好大濃妝,捨棄大眼仔、假睫毛、鮮艷眼影。

08:45. 早到也要早得剛剛好

一大早,擠過人潮湧湧嘅地鐵,正式走入職場。呢日嘅要求,唔係準時到達,係要早啲到達公司。早到都有技巧,建議提早15分鐘,啱啱好可以慢慢整理個人物品,以完美笑容悠閒現身。千祈唔好早太多,萬一你早成半個鐘到,會無形中俾咗啲壓力俾現職同事。

▪ Chur盡GPA搵好工?大學生:「GPA是一張入場券 ,Hons是一個交代。」

10:00. 自我介紹唔怕尷尬唔怕多

新同事通常會先見HR同事,再由佢帶領下,來到老細(Team Head/直屬阿頭/阿姐)面前。大學年代迎新時,人人熱情主動,但來到職場社會,一切畫面截然相反。老細通常會帶你巡遊一周,繞場認識不同部門嘅同事。開場白十有八九係:「新同事XXX(指你),呢位係XXX(指同事)。」作為職場小薯一定要全程保持微笑,即使老細講咗你叫咩名,你都趁機同大家面對面打聲招呼:「Halo,我叫XXX,請大家多多指教。」嗱!聽多兩次你個名,加深對你嘅印象嘛!

13:00. Welcome Lunch圍威喂

職場習俗,第1餐多數會係迎新飯,有可能係成大條Team一齊食飯,一圍枱圍威喂;都有可能係細Team食飯,幾個將會緊密合作嘅同事一齊食飯。正常情況下,同事都會主動和傾幾句,話題離不開:邊間學校畢業?讀咩?有無去Graduation trip?趁著目光在你身上,盡量回應,啱傾就傾多兩句,唔岩就聽人講笑多啲,或者問返對方問題,有來有往。切忌口水多過浪花,應趁食飯時間多了解大家嘅話題和工作文化。話題輪流轉,大家很快會自己傾返計。

▪如何搣甩Fresh Grad味?6招讓你在職場脫穎而出

18:15. 收工睇定啲 人走你先走

朝9晚6嘅時間,話咁快就過咗啦!夠鐘收工啦,作為新同事,千萬唔好一言不發,悄悄走人。咁幾點收工呢?同事未走,你千祈唔好走。眼見同事紛紛離開,你就可以跟風走人。不過呢,大多數同事見到你剛畢業第1份工,都會提點你兩句,會主動同你講:「XXX,仲唔收工?」

First week:以不變應萬變 

第二日:

食飯時間睇定啲,呢個星期都千祈唔好帶飯。如果有同事主動叫你一齊食,咁就跟住去,了解大家平時去邊食?食咩多?食開幾錢一餐?如果無人叫你一齊食,唔好傷心和尷尬,可能佢哋本身無一齊食嘅習慣,睜大雙眼,睇吓佢地係咩玩法。係各自食?部分帶飯?Friend底出去食?要融入一個新環境唔係一朝一夕嘅事。

▪ 【職場癌細胞】看old seafood如何點金成石,將人才變庸才

第三日:

大學同職場最大分別:同學、同事嘅身份差別。大學年代,識朋友都係大學其中一個目標,同學仔好多都會變成好朋友。但係,職場世界,識朋友絕對唔係打工嘅目標,工作先係你存在嘅唯一意義,同事不等於朋友。心態一定環調整好啊!毋須急於識朋友,同事暫時都係同事,慢慢合作,慢慢認識,好彩遇到志同道合、三觀相同嘅人,俾時間將你哋嘅關係拉近。平時喺走廊、茶水間遇到人,識唔識都點頭微笑,打個簡單招呼。

第四日:

臨放工前半個鐘,不妨主動向隔離位同事問:「我手上啲野做完,有無咩野可以幫手?」進而了解公司嘅放工文化。睇吓到底同事係習慣準時走人?定係習慣真假OT?前者呢,要恭喜你喇,準時跟大隊離開,享受Work Life Balance嘅生活。後者呢,請你做好心理準備,無論真或假,短時間之內你未必可以準時收工。假OT文化歷史悠久,遍佈各大細公司,你作為職場新人,邊夠力量挑戰群眾,初時盡量學扮工,當資歷加深,正式融入公司,再慢慢「早走」。真OT就無辦法啦,唯有希望辛苦工作換來嘅果實足夠美味,能抵銷OT之苦。

▪ 黑心商店︰Office 八卦鏡,照住新嚟嗰舊新豬肉……

第五日:

畢業前,你當過組爸媽,是資歷最深嘅一群;畢業後,你就是職場資歷最淺嘅一群,唔好介意工作簡單!滿心嘅理想,同很多「你以為」,統統都無發生。上司指派俾你嘅工作都係雞毛蒜皮嘅小事,手板眼見功夫,悶到不行?Sorry!工作就係咁,唔好以為自己係重要角色,亦以為以你嘅能力喺開場就會受到重用,更唔好以為自己受到輕視同輕待。每個人都係咁樣走過來嘅,做好每一份簡單小工作,盡力投入公司,你嘅能力需要時間來認證。

 

延伸閱讀:

做記者要「鐵腳、馬眼、神仙肚」 起薪點良心價萬三 初心與正義感加持

女生拒喝人工飲品開天然果汁舖 兼任店員送貨 以水果杯打敗散水餅

【職場癌細胞】看old seafood如何點金成石,將人才變庸才