[行業秘聞]精神科護士大剖白:先要過三關

[行業秘聞]精神科護士大剖白:先要過三關
Jobsdb content teamupdated on 29 December, 2017
Share

一講起護士,大家都會即刻諗起平時喺醫院嗰啲戴住口罩嘅姑娘。今次小編專訪咗兩位精神科猛男護士:楊Sir同佛哥,分享佢哋工作嘅點滴。呢個職業好似好神秘咁,其實同普通護士有樣嘢類似,都要經歷「屎、血、死」三大關。但最大分別係:病人基本上唔會康復,工作上會無乜滿足感。



屎、血、死三大難關  過到先做到護士

普通科護士多數係女性照顧晒男女病人,但喺精神科,男病人房嘅護士就基本上都係男性,冇返啲體力,點應付到突然發狂嘅病人呢?佛哥笑住講:「不過大家都一樣有三大難關:屎、血、死,要過到先可以做護士。呢三樣嘢除咗得人驚,仲好難搞又好麻煩,尤其是精神科,病人一般身體無咩問題,如果突然死亡,就要寫好多好多report,交代發生咩事,仲會俾腦細煩死!」

另一方面,精神病唔會好似一般病咁,可以明顯見到病人好返晒,一個病人隨時入院幾個月、幾年,情況都係差不多,就算佢地出咗院,都可能狀態時好時壞,仲要keep住食藥同定時返醫院較藥。楊Sir補充:「大部分病人喺我哋長期照顧之下都無咩好轉,感覺好似幫唔到佢哋咁,好多同事喺工作上得唔到滿足感,都做到冇晒癮。人手方面又只係啱啱好做到要做嘅嘢,做唔到extra嘅嘢去幫多啲病人,我見到佢哋俾人誤解、歧視,都好心酸㗎……」精神科工作咁神秘,唔講唔知醫護人員咁辛苦。



缺點就是優點  返shift都有好處

咁到底佢哋滿唔滿意自己份工呢?佛哥略有所思地回答:「如果你接受到幫病人換尿片沖涼,又唔驚病人突然做出好有新鮮感嘅舉動,例如無啦啦打隔離個病人,或者你,哈哈!仲有要唔怕on shift看夜,我啲女同事就話自己殘得好快……做護士同返朝九晚五嘅工好唔同,大時大節未必放到假,幾年都固定守一間病房,同事及工作環境又唔會大變……更唔存在貼近市場嘅講法!」

至於楊sir就毫無懸念,不知幾滿意呢份工:「想當年護士學校招生嗰陣,已經講明係一邊讀一邊有人工收,讀完出嚟之後人工仲要唔錯,生活穩定,呢樣嘢已經好多人都渴望啦。再加上返Shift,放平日其實好多好處呀!嗱,食飯平過weekend就大家都明啦,更爽嘅係唔使同人迫,唔使點排隊,避開晒所有人潮!我哋一更返七個鐘,一星期返六日,其實計返,係比一般返九五嘅人多好多時間做自己嘢,尤其是返早,放工都只係兩點幾。」

[職場秘聞]精神科護士大剖白:先要過三關

(image via Commons)

放工就乜都唔使理,交畀下一更同事

不過對於一心喺職場上拚搏一番嘅人,就未必適合做呢行啦。楊sir話佢喺病房做咁多年,日日都係咁上下,收症、病人出院轉院、醫生巡房嗰時就忙啲,多同事返工又冇新症就得閒啲,做耐咗所有嘢都變成手板眼見工夫,真係無咩位可以上。「呢行一入職,如果係登記護士,就要先進修,成為註冊護士,然後再根據經驗同工作表現升為資深護師、病房經理等一路升上去,每一步都循規蹈矩。就算有位上,都唔係個個都想升做病房經理,因為人工唔會多好多,但又要做多啲行政野。其實護士嘅晉升階梯明確,前題係如果想升的話。」佢就話自己冇乜博出位,一動不如一靜,唔少同事都寧願穩穩定定,用自由時間搞副業,仲開心咁話!

小編最後問咗句,身為精神科護士,咪好識處理情緒?佛哥大笑咁話:「哈哈,做精神科護士真係好少OT,啲嘢做唔晒就留畀下一更同事做,就係咁簡單。收工就收工,無咩壓力,唔會收到腦細或者個客嘅WhatsApp,咁就自然精神健康100分啦!」其實呢,每份工作都有好與壞,最重要係認清自己想行嘅路,想要嘅生活,咁就可以選擇適合自己嘅工作。

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Industry stories

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.