衰咗都唔知?騎呢CV秒殺見工機會﹗

Resume無論任何時候搵工,一紙履歷基本上不可或缺,亦代表應徵者嘅個人品牌,有時應徵者好俾心機「砌」靚張CV,點解連一個見工機會都冇?以下係一啲容易忽略嘅危險「地雷」,睇睇你有冇試過唔小心踩中咗:—

1. 帶人遊花園或毫無重點

一則招聘廣告可吸引數百甚至數千名應徵者申請,招聘者初步會速讀每份CV,以篩選較合適人選。因此,CV要意簡言精,列出的工作經驗均要與招聘職位相關。例如申請時裝雜誌編輯,須列明曾編輯過什麼相關刊物,目標讀者是哪類型等。切勿列出非關重要的職務,如協助運送服裝樣辦。招聘者睇唔到重點,自然就會睇下一份CV。

2. 叫價模棱兩可

好多招聘機構都需要應徵者列出要求待遇,因大部分公司就每個職位設定薪金上限,但係有唔少應徵者誤以為列出薪金範圍越闊,如8K-15K,中標嘅機會越大,個range闊成咁,你叫招聘機構點篩選呢?就係一個簡單數字,就足以令你份CV石沉大海。

3. 資歷風馬牛不相及

假設你應徵行政主任,卻只列出做過營業員或市務助理,又冇相關學歷證明,見工嘅機會認真凍過水。即便你係剛畢業或想決心轉行,毫無類似工作經驗,都至少列出曾(或正在)修讀與申請職位相關嘅課程或課外活動經驗。列些離行離迾嘅資歷,即等同毫無誠意,招聘者唔駛九秒九就同你份CV講bye bye!

4. 事業目標浮誇兼離題

應徵者除咗喺求職信簡介資歷同職業取向外,一份完整CV,應列明應徵者的事業目標,但如果將目標寫成:「十年內成為商界CEO」、「榮登全球50位最具影響力人物」等浮誇虛榮嘅字眼,會俾人感覺應徵者唔夠穩重,所以最好寫實實在在嘅目標,例如:「五年內在某行業取得認可專業資格,成為管理人才。」

5. 神秘莫測的空窗期

有打工仔未必工駁工咁做,基於突發事故或私人理由,例如公司倒閉、升學、家事、生病、意外受傷而有一段就業空窗期,一至兩星期當然係冇乜問題,但如果空窗期長達半年至好幾年,而你又冇交代去向,人事部一般都會好疑惑,到底你有咩隱憂冇詳細交代?如有上述情況,請列明空窗期做過什麼,若然係因短期工作後離職覺得難以啟齒,也可坦白從寬,說明該工作與自己的職業取向不相符,所以決心離職以盡快找尋另一份更合適的工作。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案