走出職場樽頸位,開心返工﹗

職場樽頸位

有很多人將工作比喻為另一半,找到新工作就好似開始一段新戀情,最初熱戀期總是甜蜜,幻想著美好的將來,但到了三數年後,就不自覺去到一個樽頸位,習以為常的工作模式令你厭倦至極,感覺眼前的工作與雞肋無異。唔想滯留喺進退失據嘅樽頸位,你可以點做?

1. 拒絕做職場怨婦/怨夫

喺一間公司做得愈耐,好自然就會樣樣睇唔順眼,好傾同事來來去去得嗰幾個,物以類聚,大家都係離不開:呻﹗呻﹗呻﹗唔想變成職場怨婦/怨夫,就要多親近開朗樂觀同事或者大方接受新人,同佢哋多啲交流,唔好淨係困於小圈子,你會慢慢擴闊眼界,話唔定仲可以改變你對某些事情或人物嘅睇法,唔會樣樣都感覺不爽。

2. 協助同事,得出重要領悟

偶爾做啲平時你冇做開嘅工作,有助轉換心情,甚至從中發掘到自己另一些專長。若然你仲未諗到想做乜,不妨跟你不同崗位的同事及上司協議,嘗試處理一些小任務,例如市務部職員可以跟銷售部同事外出見客,了解更多前線需要;行政人員可協助公關部搞吓活動。透過參與不同性質的職務,見識增廣了;而重點係,你體驗到同事嘅工作都係處處碰壁時,你就會覺得自己唔係全世界最慘果個,又可以更有team spirit。

3. 唔想一成不變,自己先行作出改變

由朝早逼地鐵巴士見到隔離個大媽超冇禮貌,返到公司成日仲要對住班麻煩友兼non-stop meeting,每日感覺度日如年,越來越厭惡公司的人和事。唔想轉工,你可以改變自己嚟轉換心情。例如返工時試吓早一個站落車,然後步行上班,期間欣賞一下沿途風景,拋開匆忙步伐,見到街上同一些人同一些事,嘗試換一個角度或心境去設身處地理解一下他人感受,你便知道大家都係為生活奮鬥,無需要將自己嘅煩惱擴大,焦慮情緒可能得以舒緩。

4. 放工後off line一至兩小時,做回自己

若然你周一至周五每日都花十多個小時在辦公室埋頭苦幹,放工後心情當然唔會好得去邊,因為你唔知咩叫quality of life﹗每天作好規劃,盡量限定工作最多九小時,放工後立刻拋開與工作有關嘅一切,決心關手機一兩個小時,完全放鬆心情做回自己,腦筋不再繃緊,明早上班又可回復精神全力衝刺﹗真係放唔到工?事在人為,努力為更健康更長遠的working-life嘗試吧!

5. 每達到一個目標,給自己小獎勵

還記得小時候讀書拿到滿分,老師或父母都會給予一個小獎勵?無論幾多歲嘅人都需要鼓勵,在工作上即便得不到上司嘉許,自我勉勵又何妨﹗你可以設定一些小目標,跟你過往嘅表現作比較,如獲得小進步,都不要吝嗇對自己作出獎勵。在別人認同前,必先相信自己,得到自我肯定後,你定能設定更多可行的目標,尋覓到工作的真正意義。