聶瞳:想做一份工但做唔到,其實只因未準備好

辦公室日報:想做一份工但做唔到,其實只因未準備好

如果你好鍾意一匹馬,唔使追,因為一定追唔到,你應該去種花種草,適當嘅時候,天時地利人和集於一身,隻馬就會自己過嚟。

我有一個做記者嘅朋友,喺細報館已經工作多年,因為人手唔夠,佢要做埋拍片、剪片、打字幕、影相……等等,而且每日稿量好多,人工冇乜點加,升職更加唔使諗,所以一直都好想轉工。

▪ 【執屋達人】不是家務助理 整理師一次性執屋減物不求回頭客

▪ 【咖啡故事】從反叛青年到中堅咖啡師 沖出個未來

希望跳出呢個行業,又冇乜公司肯比機會佢,某年嘗試應徵PR,仲豪情壯語咁話如果成功,唔介意放棄份花紅,不過佢最後都袋得穩,因為PR份工衰咗,轉行夢碎,只好繼續喺報館度日。

退而求其次,佢走去見雜誌,冇諗過一本賣幾十蚊,用高級紙印刷嘅Magazine,睇落夠潮又夠in,原來請人只係畀到最低工資咁上下,竟然唔及一份賣8蚊,油墨味道濃郁嘅報紙。其實唔出奇吖,我獵頭公司好多客人都係租中環甲級寫字樓,但請人嘅薪金,可以低過工廠區嘅公司。羊毛出自羊身上,office貴啲,支出多啲,人工咪大家減啲囉,總之個餅就得咁大,老細係畀低咁多,下面計掂條數就請,佢唔會理過程,只會睇結果。

一次又一次見工,換嚟一次又一次失望,我朋友坦言去人哋office interview,都未開始入房見,淨係填form嗰下都已經好迷失。結果尋尋覓覓,始終都要返報館繼續拍片、剪片、打字幕、影相、打稿,人工仍然係每年200、300咁加,除咗上述嘅工作技巧愈嚟愈純熟,基本上乜都冇變過。

▪ 【新出路】講夢想一樣有飯開 香港第一個自學Hyperlapse的攝影師

▪辭職信點寫?專家畀貼士

後來我有個客想請Marketing,蚊型廣告公司,薪酬畀到市價,不過請唔到太多人,所以想搵一位全能戰士,聯絡下明星、聯絡下KOL、聯絡下Foodie,有廣告幫手執圖,有片幫手加effect打字幕,間唔中要影product,人哋啲稿要校對,唔通順就執執佢,乜呢堆嘢麻煩得嚟又好似熟口熟面咁嘅?唔使講嘢啦!即刻安排我朋友去見工,據聞佢哋嘅對話係咁:

「Illustrator、Final Cut Pro呢啲都識?」

「識呀!」

「做記者唔係齋負責寫稿同出去影相咩?」

「因為公司細,唔夠人手,咩都要學,我都係咁樣學返嚟。」

「啱喇,我公司都細,你唔好介意。」

結果我朋友走咗去做Marketing,一做就兩年,最近跳槽去另一間較具規模嘅廣告公司,真係有毛有翼識飛喇!當年佢以為冇用、唔值錢,學多咗盞做多啲嘅技能,今時今日成為咗「搵食架生」同埋籌碼,諗返轉頭原來冇白過,人生每行一步,全部都有腳印。

▪【自由有價】周未freelancer你估易做㗎?看似自由 實際工時長

呃字數時間又到,如果你好鍾意一匹馬,唔使追,因為一定追唔到,你應該去種花種草,適當嘅時候,天時地利人和集於一身,隻馬就會自己過嚟。我知你想講咩!世事豈能盡如人意,隻馬老奉會再跑返嚟架?

重要咩?你到時已經為自己種咗花種咗草,唔再係兩手空空,有吸引力,有過人之處,之前隻馬唔返嚟,仲有其他馬會走近你。

正如我呢位朋友,最初唔係想做Marketing,只係不斷喺其他行業嘅interview當中團團轉,但最後都搵到出路。

聶瞳

 

曾任記者,現職獵頭,2018年推出第一本書,同FB專頁一樣叫做【辦公室日報X聶瞳】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。

 

檢視此作者的所有文章


延讀閱讀:

聶瞳:向年齡歧視說不,睇CV不如見真人

聶瞳:老細好公司好,員工照走佬?部門離職率高企要搵源頭

來自CV上的斜號 Slash一族不打工只為「遠離事非,心情好啲」

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案