辦公室日報:與其批評新一代,公司不如檢視管理方式同人工有冇過時

辦公室日報-與其批評新一代公司不如檢視管理方式同人工有冇過時

我做過一間公司嘅In House HR,佢哋請我嗰陣咁講:「公司好肯畀機會啲後生仔㗎,而且老細對我哋真心唔差,周不時請我哋食好嘢,就上個禮拜之嘛,成班人先去食完buffet,可惜吖,班90後都係郁啲就劈炮,所以head count都唔少,以後辛苦你喇。」

做得招聘都預咗㗎啦,你公司冇人離職,咁請我返嚟做乜先?

入職之後頭3個星期,公司已經搞咗3次飯局,一次係卡拉OK,一次係打邊爐,一次係唔知咩極上和牛,本身我就唔多鍾意應酬,不過新入職又費事咁寸啦,以免人哋以為我middle level都擺架子,所以全數出席咗,但自此之後就全部飯局推晒~~放過我啦,星期一至五返工仲見唔夠咩?

好記得食極上和牛嗰一日,我喺公司有九萬幾樣嘢未做完,班高層6點鬆啲已經係咁催我走,話call咗車一齊去餐廳。咁好啦,終於去到喇,成班友坐低之後係咁講是非,侍應拎咗個牛型嘅盤出嚟,原來係將唔同部位嘅肉放返落個盤度,對應屬於牛嘅咩位置,再逐嚿逐嚿講解。我已經由朝早9點做到6點冇停過手,當時又攰又餓,仲想偷少少時間返屋企打機輕鬆下,唔想人生只有返工放工瞓覺,然後第二朝起身又返工放工瞓覺,所以唔想喺office hour以外聽同事講是非,更加唔想聽侍應解釋啲牛肉,理得佢係牛頸脊定牛歡喜吖,我淨係想快啲食完返屋企咋。

飯局再貴,似乎都阻止唔到一封又一封嘅辭職信,某次要同一位90後搞離職安排,拎返佢啲staff card,畀幾份文件佢簽,我忍唔住同佢傾咗幾句:「介唔介意講點解要resign嘅?」

「頂唔緊呀,晚晚要應酬老頂咁滯,上星期食和牛係大棚人一齊去,但我哋team仲有其他活動,噚晚落咗bar happy hour,我老頂好似唔願返屋企咁,明明結咗婚㗎喎,佢係咪好唔鍾意個老婆呢?晚晚都好似想成班下屬陪佢食飯。」

▪ 老臣子即老海鮮 八、九十後太自我?各世代難逃被定型 正反兩面都要睇

▪ 【90後揀工】公司規模不重要 抗拒淪為任意差譴的「勞工」

我望一望呢位離職90後嘅人工,HK$12,000,真係fresh grad價,而上次個極上和牛就要成2,000一盤,冇錯係一個好體驗,但我更加明白好多後生仔唔係想要呢啲,你請佢食貴嘢,不如實際啲加佢人工仲好啦!起碼佢可以拎啲錢同朋友或者另一半去食鍾意嘅嘢,睇一齣想睇嘅戲,去一個恨咗好耐嘅地方旅行,又其實唔止90後,即使係80後同70後亦一樣,大家出嚟返工賺錢,都係想同自己重視嘅人過一啲好生活,如果冇咗生活,人工又提升唔到生活質素,打工又係為咗咩呢?

搞掂晒手續之後,我拎咗封reference letter畀佢老頂簽名,佢老頂捉住我呻:「真係唔明啲後生,個個做唔夠一年就走,唔似我哋以前喇,咁樣盞一世買唔到車買唔到樓。」

咩你哋我哋呀,我好後生㗎咋,講還講唔好拉埋我落水。不過我好明白嗰位90後諗咩,呢個年紀應該有更精彩嘅人生,有更多事值得花時間,一係你就提供可觀嘅薪金,令佢無後顧之憂,甘心幫你賣命;一係你就畀適當嘅空間同埋自由,令佢唔使為呢份待遇普通嘅工作埋葬咗青春。

仲有一次,其中一位新同事戰戰兢兢走入人事部話我知mouse壞咗:「唔好意思呀,想問下可唔可以換一隻?」

我:「當然可以啦,你下次直接問Admin得喇,我而家幫你打去畀Susan講聲。」

幫佢解決咗之後,我行出去pantry斟水,經過Admin附近嗰陣,頭先喺電話度好好態度嘅Susan,以一副好唔耐煩嘅嘴臉招呼嗰位新同事:「麻鬼煩!返咗個幾星期又話mouse壞,你等等啦!」

吓!我睇到一頭霧水,後來先發現原來有一班同事對住我,或者對住其他更高層嘅人,嗰啲態度同埋嘴臉同對住junior員工係唔一樣,所以有啲老細同埋部門主管用自己嘅角度睇大世界,彼此嘅位置同待遇都唔同,未必可以準繩地掌握後生一代或者junior嘅心態,仲有工作起上嚟所遇到嘅難題。

▪ 【職場媽寶】為何我們的社會愈進步,年輕人卻愈想靠父幹母蔭?

而家嘅後生仔唔係冇以前咁受得苦,只係呢一代嘅人已經冇咁好呃,佢哋唔係唔可以捱,只係識得衡量值唔值得捱。冇車冇樓喺某啲人眼中可能生存唔到,但對於部分人嚟講或者係一個「優勢」,冇包袱冇枷鎖,自然唔會屈就,搵到啱為止絕對係人之常情。

當回報追唔上付出,當人工追唔上通脹,仲要浪費咁多office hour以外嘅時間,又要應付複雜嘅人事關係,無心戀戰係預期之內嘅事,所以批評緊新一代嘅同時,老闆同埋高層唔該檢視下公司嘅管理方式、文化,仲有人工福利待遇係咪已經過時?好多嘢係相對嘅,如果份工值得長做,又有發展空間,試問邊個會貪得意成日轉工?你估搵工見工好過癮咩?

 

延伸閱讀:

【移民日本篇 】工作簽證及經營管理簽證 滿10年可獲得永住權

又爆mon?手機維修師傅靠YouTube自學接job 坐鎮快餐店 10分鐘救機

【追夢者聯盟】:港人快樂指數創新低?90後義工到汶淶「交換情緒」

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案