辦公桌與電腦desktop 同事性格睇真啲

加入新公司,想迅速了解同事個性,小編精選兩大細微處,教你三秒分清楚:第一處:辦公桌,有啲枱亂七八糟,有啲就一塵不染;第二處:電腦桌面,同枱面有異曲同工之妙,邊個係迷糊蛋、邊個有強逼症、邊位係好好先生、歡樂小姐……通通都可以流露出用家嘅性格同喜好。


強逼症:枱+電腦=100%整齊

辦公桌與電腦desktop  同事性格睇真啲

點睇:枱面上所有嘢都擺得有條不紊,整齊乾淨,每份文件都有專門嘅分類,每格櫃桶都有指定用途;而電腦桌面上面嘅「文件夾」數量唔多,維持喺兩三行之間,分門別類勁仔細。

分析:呢類同事係分類控,工作認真,條理分明,講求效率。之但係,如果整齊程度過咗火位,例如:間尺指定插喺筆筒最右位置,甚至連水杯閂蓋都要求45度角,下班前所有嘢要物歸原位,要求百分百整齊,接受唔到分毫相差。咁你要小心啦!佢可能有強逼症,合作起上嚟可能會逼埋你跟佢嗰套;所以最好開宗明義就分好工,大家各自各精彩,千祈唔好冒犯佢神聖嘅領土呀。


可能就快辭職:0%私人物件

辦公桌與電腦desktop  同事性格睇真啲

(Seth Werkheiser / flickr)

點睇:有時會見到一種好整齊嘅枱面,只有公司原本配置嘅電腦、文具,冇乜私人物品,甚至只係得隻印住公司logo嘅水杯。電腦桌面上嘅file少得可憐,只有「我的電腦」、「我的文件」等幾個原裝文件,連wallpaper都只係用預設嗰啲款式。

分析:呢位同事如果唔係新嚟幾日,即係佢好有可能根本唔諗住喺度長做,連起靚自己個壇嘅力都慳返!輕輕咁來,輕輕咁走,枱面不帶半點雲彩。


自由靈魂:亂中有序

辦公桌與電腦desktop  同事性格睇真啲

(Jeffrey Beall / flickr)

點睇:枱面雖然堆滿紙,文具散落四周,外人睇落亂到爆炸,但佢哋自己就好清楚張枱有咩,好快就搵到要用嘅嘢,頭腦好清晰。而電腦桌面都是亂中有序,左右兩邊擺唔同類別嘅file。

分析:呢個情況好多時出現喺設計同市場部嘅同事身上,平常人睇唔出佢哋擺野嘅邏輯,鬼叫人哋擁有自由靈魂,唔受規條限制,自有一套freestyle同工作準則。仲有IT同事,佢哋桌面通常開滿幾十個視窗,你會睇到頭暈暈,佢就完全游刃有餘,左一下右一下,來去自如,人機合一。


大情大性:混亂滿分 乜都搵唔到

辦公桌與電腦desktop  同事性格睇真啲

點睇:有啲同事張枱極混亂,食物、紙張、文件、書籍、便利貼、名片、日曆、各種充電線……總之你想像到同想像不到嘅,通通都交錯纏繞住。無論係佢本人定其他人,都好難喺呢個亂局裡面搵到想要嘅嘢。而佢部電腦呢?啲file爆滿成個mon,睇到人眼花!如果你問佢拎野,佢會開咗一個又一個嘅視窗,等咗十幾分鐘,終於喺私人相片folder裡面搵到屬於公司的「文字file」。

分析:呢類同事大情大性,不拘小節,無記性亦唔記仇,好多事情都無所謂,有時仲有啲迷迷糊糊,為人好容易相處;不過工作上如果同佢合作,你就預咗要不斷提點佢啲甩漏嘢。


小細節流露喜好 打開話匣子

辦公桌與電腦desktop  同事性格睇真啲

(Merlin Alexander Cheng / flickr)

除咗上述各大性格,留意同事枱上特別擺設,都有助了解佢喜好,方便大家打開話題!

例如張枱擺滿植物,好有可能係綠色之友,傾下種植心得、綠色生活,實冇得輸。至於張枱擺滿零食,有人行過路過就開心share,呢位仲唔係零食大使、歡樂小姐?嗱,張枱擺滿個人獎牌、獎盃,佢真心係等緊你嘅讚美語。

再睇電腦桌布,圖案通常都係擺當事人最喜愛嘅嘢。例如桌布係啲淘氣小狗、可愛貓咪、溫純白兔……呢類同事好可能養緊寵物,或者好鍾意動物,如果你咁啱都鍾意動物,分分鐘可以透過講動物經變成好盟友。如果桌布係風景圖,尤其係同事自己影嘅相,咁佢應該鐘意旅行玩樂,話題梗係離唔開休閒娛樂、旅遊趣聞。如果桌布係動漫圖,多數代表呢個同事有顆少男少女心,未必好擅長複雜嘅人際關係,大家傾吓動漫就瞬間變好朋友。


人在職場,枱面桌面佔據咗生活大部分時間,擺位佈置理所當然會流露出個人性格喜好。記得要保持警覺,唔好將屋企嘅私人物品,隨心所欲亂咁擺,免得老細經過瞟完一眼,就對你留低咗主觀嘅既定印象啊!

 

延伸閱讀:

會計仔:邊個夠我嚟?自閉篇

一次過解答Fresh Grad今年搵工嘅疑難

[生財有道]Top 5公司逗利是惡劣行徑

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案