返工枯燥到想quit?去外地做義工加添正能量

去外地做義工加添正能量

每日返工放工為口奔馳,工作枯燥冇意義,不少人都想短暫逃離take a break。旅遊網站Expedia喺多個地區訪問咗2,200名年青人1,發現28%港青曾想過辭職去旅行(南韓及台灣更分別高達40.7%及57.5%)。但除咗長途旅行、working holiday之外,原來宜家仲有唔少人會選擇去外地做一段時間義工,藉機擴闊眼界,豐富人生經歷,為自己嘅目標注入正能量,到重回工作崗位之時,更有動力在事業打拚。


服務雲南山區兒童一年 追尋工資以外的價值

80後Florence畢業後搵到份高薪政府工,手下head住百幾人,本來「錢途」一片光明,但她漸覺政府工作嘅理念不適合自己,毅然辭職前往雲南,將一年時間奉獻俾當地嘅山區兒童,改善佢哋嘅教育、衛生、經濟情況。「好慶幸能夠有一年時間做個小義工,讓我唔再需要思考工資為我工作帶來嘅價值,而係我自己能夠為工作創造啲咩價值;亦唔需要由上司嘅工作評估話我知我做過啲咩,而係憑良心問自己,我可以再付出啲咩。我發現咗我有選擇,我發現咗最真實嘅自己。」

離開香港咁長時間,住喺啲窮鄉僻壤有幾辛苦?生活開支又可否負擔得到?「頭一個月真係好唔慣,喺山區學校見到廁坑生滿肥肥白白嘅蛆蟲,一天黑啲曱甴就四處出沒。不過又會諗起自己只係喺度住一年,人哋要留喺度一世。到走嗰陣,已經對呢啲嘢免疫,同埋對人生改觀咗好多。」

Florence坦言喺漫長人生中,付出一年時間同金錢絕對值得:「其實當地物價都好低,想要咩又可以淘寶好方便。」Florence回港後,決定從事CSR(企業社會責任)相關工作,繼續付出綿力造福社會。


二至三星期海外工作營

如果覺得一年太長,可以選擇兩星期至一個月嘅義工項目,利用返新工前嘅空檔,甚至請假去。Joyce就趁長假期另加幾日年假,到尼泊爾嘅兒童中心照顧小朋友同義教英文,同貧苦孩子朝夕相對咗兩星期,體會到佢哋樂天、純真、願意與人分享嘅美德。「有次個妹妹將一包珍藏咗好耐唔捨得食,已經擺到淋哂嘅餅乾送俾我哋食。雖然包餅過期,但已經係佢僅餘嘅食物,都願意同我哋分享。佢仲要因為只有一塊,要我哋幾個義工分而覺得唔好意思,令人覺得好感動!」

現時不少非牟利機構都會提供外地義務工作機會,參加義務工作有可能需繳付報名費及交通、食宿費,有意參加者宜先咨詢詳情,了解機構背景及多作比較。

 

延伸閱讀:黑暗過後光明重現,認同感帶來快樂



資料來源:
1.     蘋果日報: 28%港青想辭職旅行 調查機構:工作壓力大 想「唞氣」 (30 Oct 2015)

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案