返shift人的悲哀 斷六親、燃燒健康

香港地唔少工作都要輪班,好似通宵營業嘅服務性行業、醫護人員、紀律部隊、航空業、傳媒、技工、熱線、保安等,當一般人喺張床度瞓到隻豬咁嘅時候,就係靠佢哋默默咁維持著城市嘅運作。返shift要犧牲正常嘅作息時間,所以人工普遍會比相同性質嘅工作高啲;但係,你又知唔知返shift有幾辛苦呢?


1. 斷絕六親關係

屋企人放工、放學,夜晚圍埋一齊食飯、睇電視嘅合家歡時間,只得你一個出咗去返工;週末、大時大節,個個朋友都約去街happy,但呢個時候偏偏係你返工最忙嘅高峰期。返shift人最痛苦莫過於斷六親!唯一好處係,如果唔想去拜年、做節、去飲,可以大條道理話唔去。

返shift人的悲哀-斷六親-燃燒健康


2. 日夜顛倒,摧毀健康

唔少返shift嘅打工仔都認同,日夜顛倒嘅生活令佢哋生理時鐘無法適應,好多時朝早返到屋企瞓三、四個鐘就會醒,之後食個飯,再瞓多兩、三個鐘又起身準備返工,根本唔能夠真正休息,久而久之身體就慢慢變差。之前仲有研究指出,長期返shift會令大腦退化速度加快添!


3. 生活冇規律

返工時間唔穩定,工餘時間根本冇可能去返學進修。就算平時想自學技能,或者去做運動,都好難劃定一個時間表,有規律咁去做。


4. 容易抑鬱

缺乏休息令身體變差,影響情緒;半夜爬起身返工時,條街又黑又冇乜人陪自己,充滿世界末日風情;就算想WhatsApp同人傾偈,啲人都瞓哂覺。如果意志唔夠堅定,隨時會覺得自己係被社會遺棄嘅一群。

返shift人的悲哀-斷六親-燃燒健康


5. 食無定時

一日三餐對你嚟講係笑話,因為根本唔知應該幾時食飯,而且會口痕不斷食零食,結果食壞哂自己腸胃。


6. 黑眼圈加深,皮膚變差

返shift人黑眼圈必定會越嚟越深,皮膚變乾、變暗啞,無一倖免;就算之後返返正常時間,個眼袋都唔會縮返。

返shift人的悲哀-斷六親-燃燒健康


7. 更表浮動,難安排社交生活

通常公司都係定期出一次更表,如果編得太早,返shift人可能喺幾個月之前,就要諗定自己要放邊幾日假,但身邊嘅親友有幾多肯同你約定幾個月後嘅事?相反,如果編得太趕,返shift人連自己下個禮拜洗唔洗返工都唔知,亦都好難安排自己嘅日程,然後就會俾人怨你遲遲都唔肯confirm。


8. 阿媽/朋友唔明你點解唔可以同人調更

如果編好哂更先嚟攞假,就要同同事調更,但好容易人俾人白眼、問長問短。人哋等咗成個月,終於輪到自己可以放週末,而家話要同我調?阻人放假尤如殺人父母㗎。


9. 放棄打扮

返shift人會放棄化個靚妝或著到型男咁返工,返正都冇人睇。

返shift人的悲哀-斷六親-燃燒健康


10. 俾人當做跑腿

因為唔係返正常返工時間,其他人就成日搵你幫佢做啲正常返工做唔到嘅嘢,好似收貨、交錢、接送、換禮物咁,但明明其實你返工時間可能仲長過佢哋。


11. 電視冇嘢好睇

朝早返到屋企瞓一陣,開電視通常都只係有得睇《X市閒情》、舊劇重播,永遠同社會熱烈談論緊嘅劇集無緣。


12.放假唔知做乜好

話就話放假可以放平日,條街少啲人,唔使同人逼,但冇屋企人、朋友陪自己,唔通自己一個去睇戲、打邊爐?都係留喺屋企睇劇、打機算啦。

返shift人的悲哀-斷六親-燃燒健康

 

圖片來源:WhatsCap

 

延伸閱讀:

一個三十幾歲男人創業失敗的故事

不能在面試時說出口的「離職理由」

工作狂7大病徵 你中幾多項

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案