[那些年]學生Part-time點評:識做一定係做……

想當年讀U,小編同一眾損友最勤力嘅一定唔係上堂:Year 1忙上莊、Year 2忙拍拖,到咗Final year(係,當年大學仲係三年制)就梗係忙住返Part-time儲錢去Grad trip啦。當時有啲勁人一邊返學一邊打三份工,真係儲到唔少錢㗎!

不過每份工都有唔同嘅好處同壞處:做私補賺到錢但係好悶、做快餐時薪低但係識到班勁夾嘅Friend、做Event helper就齋坐無咩意義⋯⋯小編今次逐一點評那些年嘅常見Part-time,一齊睇吓你有無做過以下嘅工啦!


【最好搵】私人上門補習:以知識換高薪

[那些年]學生Part-time點評:識做一定係做……

唔少人喺大學時代都有幫小學雞、中學雞做私人補習,除咗人工高,時間亦最有彈性,只要同學生夾到時間就有工開;如果補習地點唔遠,喺正天地堂中間補習,其他時間仲可以用嚟做Project。所以私補喺性價比上,絕對完勝其他Part-time,識做一定係做呢樣!

不過,凡事都有唔完美。有大學同學就試過同個住天水圍嘅學生補習,點知有次佢搭到去元朗站,個學生先話:「突然有嘢做唔補啦。」浪費晒時間同車錢。所以話,搵到好學生同家長真係最重要!

艱辛指數:★★☆☆☆(基本上都係教自己以前叻嘅科,坐喺度就有錢收)
快樂指數:★★★☆☆(睇住細路做功課都咪話唔悶)
搵錢指數:★★★★★(睇成績同補咩科,一般都有$80-$150一個鐘)
學嘢指數:★☆☆☆☆(可以學吓點同細路溝通嘅)


【最快樂】青春時代快餐工:同事成為老友

[那些年]學生Part-time點評:識做一定係做……

小編有個中學同學,中三就開始係某快餐店做Part-time,做做下仲做到公關姐姐,幫小朋友開生日Party!佢話嗰陣返工真係好開心,雖然人工超級低,但係同事都係後生仔,無咩客時可以係咁傾計,Friend到放工都會約行街、唱K;肚餓又可以一齊發揮創意亂咁砌包食,好正!

艱辛指數:★★★★☆(無得坐,繁忙時間要一個人炸肉、砌包一條龍做晒)
快樂指數:★★★★☆(無人爭上位,識到真心朋友;不過新豬肉可能要捱吓鬧)
搵錢指數:★☆☆☆☆(人工低是常識吧)
學嘢指數:★★★☆☆(從此成為炸物高手)


【最心累】零售業售貨員:人肉摺衫機

[那些年]學生Part-time點評:識做一定係做……

當年網購仍未大行其道,零售業尤其是Fast fashion都提供唔少Part-time職位。有唔少大學生都試過係U乜、乜&乜時裝店打工,貪返工位置方便,買衫又有員工優惠。

不過做零售嘅辛酸真係不足為外人道,明明所有款都掛晒出來,啲客硬係要將摺好嘅衫打開嚟睇;尤其星期六、日,一個整整齊齊嘅衫架可以喺十分鐘後變到一座山咁,返工就係咁瘋狂摺衫。有間美國公司嘅時裝店仲搞笑,連Part-time都捽數,個阿頭會問:「下一個鐘可以賣到幾多條短褲?」聽到真係反晒白眼。

艱辛指數:★★★★★(聽講大部分人都係做幾個月就頂唔順)
快樂指數:★★☆☆☆(返工企足一日,除咗執貨仲要應付阿頭同客人)
搵錢指數:★★☆☆☆($3X/Hr,實在唔明點解當時會做)
學嘢指數:★★★☆☆(從此成為摺衫高手)


【最Hea爆】Event helper、推廣員:企喺度就有錢收

[那些年]學生Part-time點評:識做一定係做……

香港炒黃牛炒到出晒名,係紅館做演唱會Helper就最爽,開場之後就無咩嘢做,收$4x一個鐘,齋企喺度聽歌Hea到爆;小編又試過喺會展做珠寶展Helper,工作內容就係同個同事坐喺Reception位四日。如果有樣有身材就更加可以做Promoter,派吓試用品、幫人登記做品牌會員,就收百幾蚊一個鐘啦!

艱辛指數:★★☆☆☆(除非做書展要搬書,否則一般唔太辛苦)
快樂指數:★★★☆☆(Hea住返工,又識到朋友)
搵錢指數:★★★☆☆(比上不足,比下有餘啦)
學嘢指數:★★☆☆☆(短期工,無咩特別技能學到)


【最艱辛】地盤暑期工:日曬雨淋人情味濃

小編當年有個男同學Daddy係做判頭,某年暑假叫咗佢去地盤幫手、學吓嘢,到開Sem再見佢,成個人黑咗大隻咗,佬味出晒嚟。佢話雖然地盤大佬講嘢粗粗魯魯,但係其實好Nice、好有人情味,成日請佢食飯,見佢唔舒服又叫佢去睇醫生。雖然份工要日曬雨淋、搬搬抬抬,不過學到好多嘢,返得好開心咁話。不過呢類工通常都要有啲人際關係先入到!

艱辛指數:★★★★★(地盤始終污糟,又要搬重嘢,返工一個鐘已經熱到全身濕晒)
快樂指數:★★★★☆(地盤大佬十句入面有七句都係粗口,好盞鬼)
搵錢指數:★★★★☆($800-1,000一日,辛苦錢呀)
學嘢指數:★★★★☆(佢話增長咗唔少水喉工知識)


無論份工幾艱辛、幾Hea,都已經成為過去啦!正如大家而家去旅行都會想豪少少歎下,唔會再想住8人房Hostel一樣,以上嘅Part-time都未必會再做返。只係,那些年同一班後生同事柴娃娃式返工,嗰種青春獨有嘅快樂,係最令人回味!

 

延讀閱讀:

七月十四鬼門開 六大夜班工作小心撞鬼

返shift人的悲哀 斷六親、燃燒健康

地盤佬日誌:地盤貂蟬

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Marketing / Public Relations職位