【開年職場攻守道】逗利是vs派利是﹗攻守兩方如何掌握大局

【開年職場攻守道】逗利是vs派利是﹗攻守兩方如何掌握大局巴打、絲打一日未脫單,一日都天經地義於「新正頭」農曆新年逗利是;但點樣至可以在「開工大吉」期間限定日子,向公司同事施展「恭喜發財,利是逗來」攻略?另一邊廂,已婚打工仔每年這期間都似要額外繳付人情稅一般向相熟或不相熟的同事爽手「發紅包」,既然要派錢,當然要派得其所,對不對?

▪[神級回應] 拜年遇上親戚問你搵幾錢人工

▪【長輩題】拜年親戚FAQ(工作版):「搵幾多錢?又轉工?你仲未搵到工?」

1.逗利是.攻:「Joke福」目標人物

過年想成功逗到同事利是,最入門級別又無本生利的方法,莫過於袋定一些對號入座賀年金句,向目標人物大派啱聽的祝賀說話,暖暖場,人家派利是時,也派得爽手啲。

職級上,彼此輩份差不多,大家都咁高咁大的同事,祝人家:「少勞多得」、「Bonus常滿」、「一年十二個月,月月健健康康」,通常穩穩陣陣;若然目標人物平時都鍾意搞吓gag,或跟你有一定交情,不妨送上:「長Hea長有」、「少啲OT,多啲HH」(”HH”者,Happy Hour是也)。

如果是女同事,「宇宙最靚」、「一年三百六十五日,幾時都『瘦』外慧中」、「凍齡到下十個豬年」之類與「靚」有關的賀詞,那封利是,應無走雞。如對方是媽媽群組組員之一,你甚至可以打埋「仔女牌」,補多句:「靚媽Cute B,豬年要乜有乜!」仔女是小學level以上的,當然要:「科科攞A」、「測驗考試無得輸!」

至於一向走實力派的同事、你上司、以及一眾老細級target,就最好穩打穩紮「打熟章」,例如,「心想事成」、「身體健康」、「笑口常開」……滿口流利的意頭好句之餘,附加個「四萬」咁嘅口,將無往而不「利」!

派利是.守:未婚老細、離婚同事,派唔派?

份屬同team的同事當然要大大方方去派,否則今年可能冇運行。但面對未婚老細又應唔應該派?答案是要的﹗事關意頭,利利是是。至於離婚人士,可以安心不用派,但切記要向對方拜年講幾句祝福語。派利是時要與對方有來有往,對住未婚上司就恭敬些少,祝:「數到功成﹗」﹔對住同輩同事,對方講甚麼,加句:「承你貴言。」再開心祝賀返對方便可以了。要記住如有同事家中有白事,則按傳統百日內都不可以派利是予對方。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析


2.逗利是.攻:退攻為守

有些打工仔比較怕羞或者怕主動逗利是會予人「cheap」的感覺,又有些心態相反,成朝坐在電腦前,廁所都唔敢去,就為了守候一群主動埋身的派利是人物。而多數會主動前來問候拜年兼奉上真銀的當然是自家人、老細級人馬或者銷售團隊的同事啦﹗這個策略雖然未必如主動出擊般收穫豐富,不過勝在可以坐定定扮老定﹐又可以避免向不相熟同事逗利事的尷尬感。 

派利是.守:派唔派?諗好先至派

面對笑得四萬咁口的唔相識/唔相熟同事同你講句:「恭喜發財﹗」目測對方手上未有婚戒,但唔肯定是否未婚人士,派定唔派?

唔派……住﹗建議先同對方講返祝賀說話,再友善問對方:「成咗家未呀?」如果對方表示「未」,而你不想派利是,可以跟對方講句:「唔好意思,我手上啲利是啱啱派晒嘞。」如果你覺得可以鬆手派,便大方發「紅包」吧﹗

▪男人唔可以窮?N個「29+1 」香港男性面對的財政壓力

▪總有啲同事喜歡在辦公室「公私不分」

3.逗利是.攻:擇日通識

派利是,是期間限定的事,所以,如你拿捏不好日子,就明年請早。

今年年初四不單止是正常上班日,更是專門研究屬豬屬狗屬蛇……嘅朋友嘅玄學大師,點名讚好的「開工吉日」;換句話說,信則有的「腦細」,一定係,除非唔係,會「建議」員工係吉日返工。

若然你諗住攞多日假(因年初四是星期五),就可連續hea多幾日的話,將會miss了公司最多人派利是的好時機。

▪大師指點2019豬年開工吉日吉時,襯定上班戰衣吸好運

派利是.守:請假避年

有打工仔呻新年派利是尤如被「劏一刀」,所以唔少人都會趁機請假避年,提提大家,按傳統正月十五前,利是都是要派的,但可限於相熟同事,跨部門或不同team的就大可skip。其實初七後office拜年氣氛已經轉淡,今年已婚打工仔好多都請埋初四即星期五,初七上班已可免去被拜年索利是的機率。

同場加映!

「尷」證實錄:向未婚甚至未「出Pool」同事,逗利是~

Lee種情況,很容易發生在入職時間不長、第一年在公司抱持「有殺錯、無放過」心理素質的初生之犢身上。因為在他們眼中,睇來睇去,對方無論外在與內在法相,理應是派利是「最佳候選人」。殊不知,適婚年齡人士唔代表一定是合資格派利是人士。

拆彈方法:

  • 千祈千祈千祈……要做好事前「收風」功課,才去單打獨鬥,問人攞利是;否則,萬一你惹上的是「一代盛女」,以為你正在採取「暗串」行動,而她又是有份寫你份appraisal報告的人,真的要睇你造化了。
  • 萬一你傻吓傻吓,已攤大手板,表明來意,問未婚同事要利是,而你也目測到,對方有少少黑面;應急下台階可以是:「XX姐(或XX哥),唔好意思,唔知原來阻住你做嘢~無呀,其實係來睇吓,有咩要幫手做?」
  • 如果初來埗到,最好做法是加入同team同事的團拜大軍,混雜在人堆之中免除被派利是者一臉黑人問號:「咦﹗小姐你邊位?」的突兀感。

溫提:雖然逗利是是開心事,但記得要節制不要無差別逗利是,兼職同事或茶水姐姐、清潔嬸嬸,甚至保安叔叔,祝賀說話要講,但利是就勿向他們逗了。

總言之,在職場上,「逗利是」與「派利是」,可以是一門PHD的博士級數學問,學無止境。

延讀閱讀:

【酒店兼職當旺】「418條款」約束工時 炒散人士願打多幾份工

全球最佳旅行時間表 日、韓、泰、東南亞、歐洲、美國最適合旅遊的時間

擇日遞信:揀定2019年辭職黃金期 縮短實際工作日

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案