難逃惡魔上司魔爪?自保搵出路!

Horrible bosses

難頂嘅惡魔上司,每間公司梗有一個喺左近。有打工仔對住啲麻煩上司,就好似感染頑固病毒一樣,唔知幾時時運低纏上了,想擺脫又無能為力。面對以下三類典型魔鬼上司,你點樣應付先可以唔駛委曲亦可求存?

無定向飄忽型

呢類上司冇脾氣、冇牢騷、冇表情,咪以為咁樣就好perfect,因為佢神出鬼沒,諗法五時花六時變,永遠擺出一副冇所謂嘅表情,但當你完成工作後以為佢冇所謂就輕易過關,咁諗你就好弊﹗皆因佢會叫你改完又改,改到你連deadline都忘記得一乾二淨。遇著無定向上司,你要每日至少報告一次工作進度,經常徵詢佢嘅意見,目的係要花多些心思摸清佢嘅思路取向,磨合一段時間後,你或多或少都會揣摩到一些端倪。

破口大罵型

呢類係公認為最惡啃嘅上司——郁啲就黑面,有理冇理都破口大罵。面對脾氣剛烈躁底型嘅上司,除咗做足自己本份外,不妨趁佢心平氣和時,主動向佢提出提升工作效率的建議或創新方案,例如你做市場策劃,閒時多啲發掘更多新穎的品牌推廣策略,或多啲報告競爭對手嘅嶄新動向,做多啲準備功夫,俾佢知道你盡心投入工作,就算想發火都會少啲遷怒於賣力嘅下屬。若然佢成日對住你無理取鬧?謹記以柔制剛,幾唔妥佢都千祈咪反駁,專心聆聽,用溫和態度降火,冇人同佢單挑,佢鬧到攰晒自然會收聲。

A字卸膊型

自古以來,A字膊都係打不死的典型中之典型——有功自己領,有鑊下屬揹。偏偏呢類損人利己嘅惡菌存在感超強,地位仲穩如泰山,等佢收山你盞嘥心機。要應付A字膊型,當你執行一些重點項目時,嘗試透過傳閱方式讓他簽名認證,謹記不要用電郵傳閱,要打印hardcopy,外加一張印有相關同事名字的清單,請他們閱後逐一簽名。萬一有嚴重事故發生,簽咗個大名嘅上司,想卸膊都唔能夠卸得咁乾淨俐落。

任何工作關係都需要一段磨合期,就算你發現你同上司一直都水溝油,嘗試多積極溝通,不要吓吓撐到行,關係自然唔會惡化。駕御麻煩上司,就當對自己的耐力考驗,你捱得過的話相信冇嘢難到你 ﹗