面對無理殘酷評核,可以反擊嗎?

Appraisal

一年一度或兩度嘅員工評核,係打工仔收成績表嘅時候,升職加薪都好睇呢張成績表,上司如實將你嘅表現坦誠反映,當然要欣然接受;可是,若然上司別有用心地「寫花」你嘅評核報告,即評分同你平日嘅表現完全唔掛鈎,可以點反擊?

評核報告一般分為兩部分:一部分係記錄主要職責及工作事項,呢部分比較客觀;另一部分係就員工各方面嘅表現,例如時間觀念、創意、主動性、責任意識等範疇而給予評分,呢部分純粹基於上司對下屬表現嘅主觀感想。

第一步:記錄詳盡工作日程

雖然你無法參與第二部分嘅評分,但亦可以參與第一部分,即撰寫主要職責及工作事項。平日要勤力記錄每項工作事項嘅開始及完工日期、負責嘅細節、遇到咩問題及能否如期完成等,咁做不但可方便核對評核報告列出嘅職責及工作事項,亦有利於你平反第二部分。例如上司給予下屬「責任意職」過於低分的話,若然該下屬每項工作都能如期完成,這項記錄絕對可支持他/她平反呢一欄嘅評分。如評分反差太大,你又儲備「有力證據」,下一步點做呢?

第二步:影印評核報告並逐點反擊

上司通常會給予下屬一日時間閱讀評核報告,員工認同評分才簽名核實。曾有忌才上司「寫花」員工嘅評核報告,並要求下屬即時簽名,面對呢類「質人食死貓」嘅情況,切勿簽名,並要求影印報告。在影印本上,針對有問題嘅評分寫下平反實例,並附上實據支持,然後交予人事部,表明不認同評核結果。當然,行到呢一步,大前提係你認為評分同平日表現有很大出入;例如曾有上司抨擊員工唔願意承擔額外職務,該員工喺評核報告寫上平反意見:上司要求幫非自家公司嘅產品度宣傳口號,並附有電郵作證。上司獲悉後感到無比憤怒,卻又無話可說。

縱然上述建議有助維護個人權益,但謹記喺未進行自我檢討前亂咁平反,只會令上司下屬關係急劇惡化。因此,收到評核報告時應捫心自問,評價是否中肯。如了解自己嘅不足,應虛心接受批評,努力改進,下一份評核報告自然有更亮眼的表現。