面對麻煩隊友,保持鎮定不失大體

麻煩

相信好多喺職場闖蕩多年嘅打工仔,都會有同樣感想——逗份人工唔止要任勞任怨,仲要包埋受氣。往往遞信唔撈嘅員工,美其名係更上一層樓或者〈扮〉唔憂做抖抖,實則係對住同事上司受氣受到頂唔住。今日集中火力講講激到你腎上腺素升到爆標嘅同事,面對麻煩隊友,唔想發火失台型,或者輕易放棄,可以點做?

充當第三者,抽離自己

好多時之所以憤憤不平,皆因你太投入扮演「受害者」及「被」的角色。嘗試將靈魂抽離,假想你是旁觀者,當看到「自己」耗費無謂的精力發火,你越在意對方卻越得戚,你便會替「自己」抱不平,並醒覺發怒係極為愚蠢和無謂的行為。

逆向思考,用幽默心態降火

躁底麻煩友經常撩起你把火?不妨從幽默角度嘗試「自編自導」。假想職場係動物園:一隻莽撞的大灰熊,經常張牙舞爪面容扭曲;而你是溫馴的小企鵝,企定定欣賞牠間歇性的發神經「表演」,無論佢點作勢攻擊你,點解你從來冇穿冇爛?皆因灰熊在籠內,企鵝在籠外。當你睇得太認真,感覺就好似喺籠內俾灰熊圍攻;凡事放鬆啲,你會發現對方根本同你唔同level

利用手上的紙和筆

假如你在開會途中老闆係咁無理取鬧,同事冷嘲熱諷,你想行開又唔得,想喊就更失禮,點忍得住呢?喺呢啲場合,記事簿同筆是你的救星﹗當老闆開會時起勢咁鬧,你就耷低頭裝作記低重點,當你分心做其他事時,怒火或冤屈等負面情緒會稍為平伏下來,散會後冷靜下來從長計議,慢慢商討對策。

切勿以牙還牙

小時候有冇試過跟同伴打跤,永遠係打最尾嗰下先係贏家?但呢份孩子氣套用到職場上,就顯得幼稚兼乞人憎。即使對方說話句句「有骨」,切勿以牙還牙,例如話:「把口鬧人就叻,做嘢唔見你咁醒﹗」「你講到咁我冇嘢好講囉﹗」你一言,我一語,雙方都下唔到台,驚動到老闆來解決就唔好啦﹗對方越不知所謂,你越同佢保持距離先至係明智之舉。

工作環境要保持專業精神,無論是同事激嬲你,或你唔覺意激嬲同事,都要避免爆發負面情緒,發脾氣冇品互罵就一定輸了。