要錢定要命?香港八個傷身職業

不少年輕打工仔覺得花開堪折,趁青春就要搏到盡;做咗廿幾年嘅前輩,反而會覺得後生時捱得太盡,搵到錢都用哂嚟醫病。健康同金錢,從來係一場微妙嘅角力,而某啲職業嘅性質,更係對人體極限嘅挑戰,必須時刻注意安全同休息,否則隨時做到一身傷。

如果閣下阿爸阿媽係從事以下職業養大你,記得要返去大聲啲同佢哋講句「多謝你」!


1. 建造業工人

近年「紮鐵」行業因為人手不足,薪酬水漲船高。但做呢行要長時間喺曝曬、空氣混濁、高噪音嘅戶外工作,工業意外更時有發生,輕則搬嘢扭親條腰,重則可以高空墮下致命。保障工友安全,僱主有責!

香港八個傷身職業


2. 廚師

唔講唔知,原來飲食業工傷數字喺過去十年一直高企,冠絕本港所有行業。廚房空間細,廚師揸刀會切親,揸鑊鏟會辣親,地下濕又會跣親。再加上工時長,唔夠精神就更容易出意外。

香港八個傷身職業


3. 牙醫及牙醫助護

眾所周知,牙醫係厭惡性行業,成日要睇住病人嘅爛牙、血同口水,仲要長期處於充滿病菌同污染物嘅環境,對心理同生理都係極大嘅挑戰。

香港八個傷身職業

 

4. 醫生及護士

公立醫院醫生、護士經常要值夜班,本身已經好辛苦,再加上近年人手流失嚴重,急症室及病房又不時爆滿,個個都做到叫苦連天。早前有大肚護士返夜更腦中風,令人痛心,希望人手問題可以早日解決!

香港八個傷身職業


5. Big 4會計師

入得Big 4,頭幾年預咗每日工作十五、六個鐘,peak season要做到喺公司睇日出。長期唔夠瞓,有啲人甚至壓力大到甩頭髮,打字打到勞損要睇跌打。不過Big 4嘅發展路徑清晰,辛苦得嚟都有回報。

香港八個傷身職業


6. Marketing / PR / Advertising Agency

同會計師一樣,做得呢行嘅agency都係要預咗晚晚做到深宵,最慘嘅係你越做得嘢,腦細越俾多啲job你跟。不過做agency可以幫你練就一身好武功,做兩年已經等於人哋in-house做幾年嘅經驗。

香港八個傷身職業

(Image by Lena Vasiljeva via flickr)
 

7. 空姐

空姐俾人嘅印象係可以自由自在周圍飛,又可以化個靚妝識飛機師。但喺光鮮表面嘅背後,其實佢哋要捱返shift、日夜顛倒嘅生活,又要著住高踭鞋做粗重工作,派餐嘅重覆動作會導致網球肘;搭飛機多輻射、紫外線,搞到眼乾面乾但係要逼住化妝、戴隱型眼鏡,真係咪話唔辛苦。

香港八個傷身職業

(Image by EthanChiang via flickr)
 

8. 司機

司機每日由朝揸車揸到晚,久坐會導致腰痛、痔瘡問題。巴士司機為咗趕班次,唔敢飲水去廁所;的士司機最怕遇上麻煩客、劏死牛;旅巴司機冇位泊車要喺條街不斷兜圈,得返幾分鐘食飯、去廁所;貨車司機又要做埋上落貨,隨時搬嘢搬到閃親腰,有時貨櫃場連廁所都冇……媽啊,搵食真係好艱難!

香港八個傷身職業

(Image by c-head via flickr)

 

延伸閱讀:

公司三文治——中層管理最抑鬱

你是工作狂嗎?

日本醫生機師不受女士歡迎

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案