黑心商店 :恐怖大王……你老細﹗(上)

如果你係返緊朝96嘅文職,咁office 呢個地方大概就係你「第二個家」。而辦公室入面芸芸眾生,可以係carry你準時收工、並肩作戰嘅「神隊友」;亦都可以係令你返工慘過落地獄嘅「豬隊友」。所謂急急如律令!今日貧道嘅「Office八卦鏡」一開,為大家照亮職場,各奇人異士統統現形,報上名來!!

恐怖大王︰你老細!(上)

過去一年,同大家介紹過office入面各種千奇百怪嘅人,但係無論佢哋有幾蠢、幾怪、幾黑心都好,佢哋好可能只係你喺辦公室入面嘅一位過客……但係今次介紹嘅呢位人物,佢可以主宰你嘅生死,開心嘅時候可以令到成間office 猶如上咗天堂,唔like 嘅時候可以令你哋一秒跌落無間地獄!呢位具備各種邪惡能力嘅恐怖大王……就係……你!老!細!

成日話工種會俾AI取代,其實另一面佢都幫緊大家製造就業機會,減沙人同工錯配機率﹗呢件事係點發生?去片解畫啦﹗

人肉天眼監察!全天候睇實下屬!

有人話過,返工就好似坐監一樣失去自由,而你最敬愛嘅老細就當然係呢個監獄嘅獄長。佢嘅首要職務就係全天候24小時,由左至右上至下咁睇實大家,務求令各位下屬嘅工作效率達至120%。同事之間不論係傾公事定閒聊私事,熱愛下屬嘅老闆都一定會細心偷聽;而我親身經歷就係有次入房同老闆傾嘢,發現佢嘅電腦熒幕顯示一封我send 畀另一位同事嘅email。由於email 內容係有紅色highlight,非常顯眼易認,所以我一眼就認得出係本人十分鐘前send 出嘅email。相信老闆一定係非常關心同事,所以就善用公司email system 嘅功能,將兩位同事之間嘅電郵一一細閱(無錯,有email system 係配備呢個mon post功能㗎!)。亦都曾經聽過,有公司派咗電話畀各位員工,而親愛嘅老闆就當然會用盡智能電話嘅功能,強制幫大家打開手機嘅GPS,再定時定候檢查所有員工嘅位置,確保大家無論去到港九新界18區,都可以係老闆嘅愛心監控下努力工作啦!

▪ 上司10大乞人憎行為:偏心、假民主、臨收工先嚟料 小薯怨聲停不了

▪ 你的「主子」如何,你的日子也必如何﹗了解上司性格將事半功倍

控制時間超能力!返工放工佢話事!

我哋偉大又至高無上嘅老闆,唔單止會貼心地監控員工動態,更加進化到可以操控時間,令到一日24小時都掌握喺佢手中,無論係返工定放工,問過老細你先好睇鐘!喺返工路程上,打工仔好可能因為惡劣天氣或者路面狀況而遲到,老細雖然無辦法去改變大環境,但係佢一聲令下,你死都要死返office!交通阻塞?唔緊要,老闆教你早啲起身,搵埋交通路線畀你,就算行路過海都要行返嚟!老闆無所不用其極,就係要令到大家嘅「9點鐘」同老闆嘅「9點鐘」一致,排除萬難都要全體人員準時工作,真係操控時間嘅最高境界!當你以為係公司扮工又辦工咁捱到放工?唔好意思,時間嘅掌控仍然喺老闆手上,佢覺得你未夠鐘放工喎!不如留喺到開個會,一齊 brainstorm下先啦!有朋友報料,話做晒嘢準備6點正走,第二日咪畀老闆關心點解咁準時呀?係唔係可以幫下其他同事手呢?體貼嘅老闆重新幫員工定義番咩係放工時間,再次顯示出老闆掌控時空嘅超能力,令公司上下非常佩服!

▪ 置地記者:「一味擴音的喇叭,累人累己知道嗎?」

▪ 【職場癌細胞】看old seafood如何點金成石,將人才變庸才

發惡開口!亂槍掃射!

所謂「愛之深,責之切」;老細既然咁愛錫下屬,又點會唔狠狠地訓勉大家呢?所以老闆金口一開,幾十枝機關槍、火箭炮就會萬箭齊發,無論你高位定低位都肯定受教!老細嘅責備可以分為持久力及火力去睇︰有種持久力特別強勁嘅,例如聽過有老闆會叫啲細嘅入房,然後就挑戰紅館演唱會嘅長度,用3個鐘頭去鬧下屬,鬧你表現唔好、鬧你唔到數、鬧你無上進心……然後講下自己嘅威水史、講下隔籬team 做得好過你幾多、講講下講埋自己屋企隻狗都醒目過你,呢種長時間嘅疲勞轟炸,絕對可以令你七孔流血,皮焦肉爛咁行返出去。唔好忘記,開完3個鐘會都要繼續努力工作㗎!Fighting!至於火力強勁嘅老闆,就講求「快、狠、準」;講嘢一針見血,務求一句說話就將你嘅尊嚴掃晒落地,要令你嘅玻璃心粉碎再粉碎,仲要用佢勝利嘅笑容將你嘅軀殼再次踐踏。例如有朋友被老闆喺眾人面前大聲問︰「你今個月meet 唔到target喎,咁我出唔出糧畀你好呀?」、指着同事個腦問︰「你個腦係唔係裝屎㗎?」之類;又有啲老細與時並進,踏入digital 年代已經唔需要開口講,可以配合「天眼監察」施展混合技,再用Skype 命令同事。又或者喺夜深人靜嘅時候,WhatsApp一篇又一篇千字文畀各位同事,令大家臨瞓前都可以攬着個枕頭痛哭,懷着悲痛心情迎接下一個工作天。

結語

老闆猶如我嘅再生父母,一直畀好多機會我學習,真係令我非常感恩。全能嘅老闆又點會淨係得「天眼監察」、「控制時間」同「口部亂槍」呢3個技能?下一期介紹埋老闆嘅各種大技畀大家,密切留意!

黑心商店
香港90後,熱愛繪畫及恐怖片。於2016年創立Facebook Instagram 專頁《黑心商店》,以黑色幽默 + 香港文化的恐怖插畫,為忙碌的香港人帶來一點歡樂。#重口味 #喪屍 #妖魔鬼怪 #香港文化 #haksumshop

閱讀:

黑心商店︰「嚇」人永遠是對的

黑心商店:職場毒舌風暴

如何處理公司員工的政治立場?保持中立、開放態度對待員工立場為上策

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。