黑心商店︰「辦公室聯盟！衛生之戰！」

如果你係返緊朝九晚六嘅文職，咁Office 呢個地方大概就係你「第二個家」。而辦公室入面嘅眾生，可以係carry 你準時收工、並肩作戰嘅「神隊友」；亦都可以係令你返工慘過落地獄嘅「豬隊友」。所謂急急如律令！今日貧道嘅「Office 八卦鏡」一開，為大家照亮職場，各奇人異士統統現形，報上名來！！

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查，深入發掘他們對工作的期望。欲知更多香港打工仔的訴求，可參閱jobsDB引才法則 (Laws of Attraction) 互動網站的按需分析。

辦公室聯盟出動﹗

無論你係唔係fans，相信大家呢個月都被一股超級英雄氣氛包圍！但係劍拔弩張嘅攻防戰又點止局限係銀幕上？有啲同事天生就好似無「衛生常識」咁，鍾意將「愛與和平」仲有病菌同病毒佔領整個辦公室！為咗自己嘅健康、為咗自己嘅五臟六腑、辦公室嘅「個人衛生保衛戰」一！觸！即！發！

1. 恐怖視覺！身體組織來襲！

眼睛，就係人嘅靈魂之窗，亦係大家係衛生攻防戰上第一個會受害嘅地方。唔少朋友都報料，原來過往都有唔同同事不修邊幅，好似《千與千尋》入面嘅腐爛神咁周圍走，總之你見到佢嘅身影就要準備彈開！首先入圍嘅有「六月飛霜」嘅「雪花怪」！冬天乾燥，人就會容易產生頭皮；其實少少幾粒都真係無咩問題，屬人之常情，但係一年365日，每日嘅膊頭、衣領、衫袖都充滿白色點點，唔講仲以為當事人唱完〈Let it Go !〉自帶冰雪特效！結果細看之下，原來唔係普通頭皮，而係同事食完煙之後嘅煙灰！同事食完煙，不單成身煙味，更加帶走每粒煙灰返office，唔單止視覺上核突，唔覺意跌落同事個位，當事人真係非常無辜！又有朋友報料：有同事食完飯會撩牙，可能為咗記念每支服務過佢嘅牙籤，竟然會將每枝籤放係自己個Keyboard 到；平時行過都會見到一堆牙籤放咗係佢個位！其實牙籤清潔嘅係你牙齒污垢，帶有唔少口水同埋細菌，用完就扔左佢啦﹗ Let it go okay ?

▪我做Marketing：職場見到都眼冤嘅同事

▪【同理心去哪兒？】職場10大缺德騎呢劣行，挑戰同事的包容度﹗

2. 臭氣沖天！生化毒氣大軍！

「夏天，為大地帶嚟汗水」。無錯，夏天將至，你嘅好同事喺又熱又焗又多人嘅地鐵站衝上嚟，再喺幾十度嘅高溫下同時間競賽，白色嘅T Shirt 早已滿佈汗印。一踏入office，佢揮灑青春嘅汗水；而佢嘅汗味，亦都隨住大氣粒子，立即湧入你嘅鼻腔，繼而攻佔你成個人嘅嗅覺神經，每一個細胞都吸收晒佢嘅汗味精華！呢個情節，係每日嘅早上、Lunch time 後都會不停發生，直至夏天過去情況先會有所改善。

我相信同事身水身汗，佢自己都唔想，不過如果喺入office 之前噴下止汗劑，其實大家都會舒服啲。而以下呢個個案就唔係單純無心之失啦！話說我有朋友公司係Open office，同事之間嘅距離都好近。而當中有一位同事真係當office 係自己屋企，返到公司會除鞋，再將佢個對焗左半日嘅腳，放係另一位同事張櫈上面。聽到呢個個案，我真心講咗句粗口！有無搞錯呀大佬？你真係當正自己屋企？一來你係污染緊同事張櫈、二來其他在座嘅同事要忍受你難聞嘅臭腳味，係要幾厚面皮嘅人先做得出？如果大汗淋漓嘅同事係需要一支止汗劑，咁我相信呢位「臭腳獸」係需要返小學再上一次「德育堂」，重新學下做人啦！

▪我做Marketing：職場交叉點：同事犯錯，你會唔會出聲？

▪辦公桌與電腦desktop 同事性格睇真啲

3. 100%威脅！帶菌者絕對不設防！

嚟到終極打大佬！帶菌者！頭先講嘅視覺、嗅覺來襲，都只係令你一時難忍；但係真正嘅帶菌者係絕對會影響到你嘅人身安全！相信唔少朋友都係工作間會遇過一兩位人渣，即係個啲咳到肺癆咁款，但係死都唔請病假唔戴口罩，仲要對住你塊面咳嘅同事！

你知唔知道，簡單一個咳嗽嘅動作，背後原因可以係因為感冒、氣管炎、甚至係因為結核病？我唔係要製造恐慌，但係當你有病，就唔該載返個口罩，唔好拉你身邊嘅同事落水一齊受罪！而我本人就經歷過一場最可怕嘅帶菌風暴︰手足口病。話說有日返工，前老闆竟然舉起雙手，笑笑口同我講︰「我有手足口病。」我嗰下非常震驚，嚇到咩都講唔到；而我老闆就解釋，佢三歲嘅囝囝中左手足口病，亦都感染左老闆同佢家姐。我反問老闆，知唔知手足口病會傳染，佢好冷靜咁答我︰「知」，仲話會減少同大家接觸，去降低散播病毒嘅機會。喂大佬呀！！！你口罩又唔載，平時出入摸過哂啲文件、廁所鎖匙同門口，你知唔知你係一個流動計時炸彈呀？！個時仲要有同事準備去旅行、又有同事屋企有初生嬰兒，聽到都真係嬲到爆炸！大家知道呢個咁恐怖嘅消息後，都立刻叫老闆返去睇醫生同休息，過幾日先好再返工。

事件嘅結局……係非常荒謬，如果有機會再同大家細說。但我好衷心咁講一句：「老闆你有病就返屋企唔好累人累物啦，連咁簡單『有病留係屋企休息』嘅常識都缺乏，你不如睇醫生嘅時候順便驗下個腦先返工啦好唔好？」

▪美圖照「騙」橫行你認得出她嗎？從Social Media平台了解同事的另一面……

▪【有薪病假】試用期內、大病休養點計法？原來《僱傭條例》中只有一種合法有薪病假

結語︰返工啫~唔使搵命博嘅！其實好多公司平時都提供有薪病假、醫療福利、口罩同埋消毒用品等等，但係要打好呢場攻防戰，重點係在於大家要自律，注意個人衛生，咁先可以令到大家安心返工，唔使提心吊膽。