黑心商店 ︰我的無腦同事

如果你係返緊朝九晚六嘅文職,咁Office 呢個地方大概就係你「第二個家」。而辦公室入面嘅眾生,可以係carry 你準時收工、並肩作戰嘅「神隊友」;亦都可以係令你返工慘過落地獄嘅「豬隊友」。所謂急急如律令!今日貧道嘅「Office 八卦鏡」一開,為大家照亮職場,各奇人異士通通現形,報上名來!!黑心商店-我的無腦同事

「我的無腦同事」

腦袋,佔咗人類身體嘅大約2%;然而,並唔係每個同事都配備一個腦袋返工。相信大家出嚟做嘢,都會遇過兩三個無腦嘅同事,佢哋嘅愚蠢唔單止會嚇你一跳,有時更加會帶嚟災難性嘅後果,情況一發不可收拾!510x120-v1

有種愚蠢是天生的……

唔好意思,得罪講句有種同事真係天生比較蠢同埋無知。曾經有個朋友做零售業back office,喺公司負責訓練新人。有次公司請咗個奇人,學嘢速度非常慢,同一個問題會問你三五七次……雖然佢蠢又唔代表佢懶喎,每次講解比佢聽,佢都一定會努力抄Notes。不過,可能真係天資問題,訓練咗一段時間都係搞唔掂,呢位奇人每晚都自願OT兩三個鐘先做得哂。雖然佢係勤力……但係你咁樣晚晚留法,負責鎖門嘅同事咪要陪你留低到最後一分鐘囉……陰公……又聽過另一個故仔,就係有公司請咗個三十幾歲嘅男員工返工,做啲簡單Admin work,但可能呢位朋友住喺深山太耐,個腦埋咗係泥土之下,對科技一無所知。佢會好驚訝點解其他同事見到Upload咗上Shared Drive 嘅文件、會對於大家睇到佢係Shared Calendar嘅改動嘖嘖稱奇!朋友!而家已經係2019年啦!歡迎你更新個腦袋再嚟返工!

▪辦公室小薯:好人有分真與假,真好人犯蠢也可怕

▪張晨:「出於對公司的善意,也許就是對其他同事的惡意。」

自作聰明?即係懶醒囉!

蠢,唔緊要,你肯學我肯教;最乞人憎嘅係唔聰明又要自作聰明!有朋友任職公司嘅會計部門,早就已經聽聞Sales Team 入位有位同事成日自吹自擂,歌頌自己好Talk 得又好Sell得、又吹話自己一個月揾好多之類,當然全公司上下都知道佢有幾多斤兩啦。有次會計同事幫佢睇報價單,發現呢位精明能幹嘅Sales將「85折」寫左做「85% off」;再細查就發然,原來同期每張有折頭嘅報價單都犯咗呢個錯誤!枉你仲話自己有幾叻有幾巴閉,作為Sales 竟然連銀碼折頭都搞錯哂,直接令自己同埋公司損失!會計同事當然急Call佢問話,呢位死要面嘅朋友,就有以下100分嘅解釋︰「唔係我錯呀,係Excel 條formula 錯咗咋!」大佬!你蠢都唔緊要啦﹗俾個機會你解釋都搵個醒少少嘅理由呀!成日對住同事懶醒,到你真係出事嘅時候咪個個都睇住你死囉!

▪我做Marketing:職場見到都眼冤嘅同事

▪【同理心去哪兒?】職場10大缺德騎呢劣行,挑戰同事的包容度﹗

心地同個腦一樣咁差!

蠢同懶醒嘅同事可能會激到你紮紮跳,但係蠢得嚟又要心地唔好嘅同事,先係真正會令大家曝露係危機之中嘅老鼠屎。話說有朋友曾經聽過,公司以前曾經發生過一件大單嘢。有次一位Sales 同事交internal文件,但係就攞漏咗上級嘅簽名。由於上級放緊大假,所以要等多一排先可以完成到張Form。最後呢位Sales 等唔切,夠膽死拎返上級以前簽過嘅文件,用老細嘅簽名進行「剪剪貼貼」,偽造左一份自以為天衣無縫嘅假文件。以為可以瞞天過海?呢件事好快就比細心嘅同事揭穿,而上級亦當然唔接受呢種違規又違法嘅行為,立即解僱呢個擅長手工藝嘅同事。根據香港法例《刑事罪行條例》,偽造罪行一經定罪係可處監禁14年㗎!所以大家蠢還蠢,千萬唔好走捷徑、行歪路,到最後以身試法又累己累人,咁又何苦呢?

結語︰一個蠢嘅同事,可以帶嚟各方面嘅破壞,例如令你七竅生煙、令你工作量大增;甚至可以令公司蝕錢,最嚴重真係可以陷入法律危機!所以遇到呢類愚蠢同事,一係就全方位監控住佢,加強培訓同檢查,令佢哋可以更快掌握工作技巧;如果真係腦袋空空如也,藥石無靈,我就建議大家要避之則吉啦……

黑心商店
香港90後,熱愛繪畫及恐怖片。於2016年創立Facebook Instagram 專頁《黑心商店》,以黑色幽默 + 香港文化的恐怖插畫,為忙碌的香港人帶來一點歡樂。#重口味 #喪屍 #妖魔鬼怪 #香港文化 #haksumshop

 

閱讀:

黑心商店︰「辦公室聯盟!衛生之戰!」

黑心商店 ︰縮骨精神,利己害人

黑心商店︰Office 八卦鏡,照住新年後辦公室班財神爺

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案