香港IT人：下一份IT工是天堂，還是地獄？

其實好多人對IT工有好大誤解。佢哋成日以為做IT好似打機咁好玩，然後就話好想做IT；又見到Google、Facebook嘅office咁靚，仲周圍都係娛樂設施同零食，以為只要入行做IT就爽過升仙。事實又係點？

外國的IT工

講真，好多好成功嘅IT公司都明白員工係佢哋最重要嘅資產，因為做IT靠嘅並唔係金融投資或買賣貨品，而係靠員工們嘅腦袋。所以好似Google、Facebook呢啲公司，最高管理層本身就係做IT，所以必然會好好善待班員工。

好到點？免費零食、無限手調咖啡、無限假期、office入面已經有無數娛樂。而且通常個office都會裝修到好colourful，去刺激員工創意。如果係美國等地，工作地點有室外地方的話，間公司亦會將呢啲室外空間佈置得好舒服，眼見之處全部都係草地，寬闊嘅行人路，仲有好多鮮豔嘅擺設。

喺Policy上，好多時公司都會俾員工反映意見，例如邊度做得唔好，可以點樣做得好啲，而且唔係齋講，係真係會有人跟進。總之，員工嘅舒適感絕對係排首位。就算只係佢哋喺香港嘅辦公室，你都會感覺到佢哋對員工有幾重視。

入到呢啲公司，睇嚟好似上天堂一樣，間直係夢寐以求嘅工作。咁你又知唔知如果唔係Google、Facebook呢類公司，工作環境又會係點？

香港的IT工

零食，冇。咖啡，自己沖。假期，跟勞工法例，即係一年有7日大假，就算perm位，比到15日你已經要謝主隆恩。Office裝修目標係放到多啲枱，所以人人都要坐「豬肉枱」，department head都一樣。想坐房？入meeting room開會嗰陣咪有房坐囉。娛樂設施？諗都唔好諗，你係嚟返工架。

仲有，你唔知你份糧係包咗「受氣」呢個item㗎咩？唔好以為你想點就點。你想反映意見咩？我諗到你遞信嗰日先有人願意聽，不過聽完都係馬照跑，舞照跳。日日OT不特止，返到屋企諗住可以休息？記住check WhatsApp，老細隨時都會搵你；有啲老細癲起上嚟仲會公器私用，叫你上佢屋企整電腦、裝router。

唔係天堂都算，好多IT人都只想留喺人間界，但好多時都跌咗落地獄。而且，轉工係改變唔到命運，好多時都係由一個地獄跳去另一個地獄，不停輪迴。你問我點解做咗咁多年，仲要喺呢個行業打滾？其實好多時都係為咗每次完成一個project嘅滿足感，呢種滿足感亦都係大部份IT人一直堅持喺地獄打滾落去嘅原動力。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。