今日係我嘅Last day(1)：新仔Programmer篇

每份工作，都有驚喜與失望；每次轉工，都是困難的決定。作為一個香港IT人，回望成長路途上的喜怒哀樂，當中有甚麼體會？

今日係我嘅last day。

呢份工話長唔長，話短唔短，啱啱好做咗兩年。

畢業到而家，由乜都唔識，變咗識少少扮代表，再變成唔想再做井底之蛙。今日，終於到我last day喇。

其實呢份工唔係唔好，電訊業其實唔差，雖然競爭大，但係公司搵到錢，我哋呢啲programmer其實就唔驚裁員嘅。出面風高浪急，一份穩定嘅工作真係好重要，尤其係第一份工作。人工低唔緊要，最緊要學到嘢嘛，第一份工，都係儲經驗為主㗎啦。所以，雖然呢度做嚟做去都係同一樣嘅嘢——一開始就定咗個flow，要我跟住嚟做，例如debug完要加返comment，之後點樣test返，全部都係手板眼見功夫，基本上唔會有例外——悶係悶啲，但呢兩年以來其實都好少諗轉工。

直到上次發生咗呢件事……

------

嗰次我寫code寫漏咗幾行，嗰幾行code好重要，但喺development個場其實冇得test，所以我以為啲code冇問題。但估唔到上到UAT，我上司（Analyst Programmer）都冇test到，然後上Staging都同樣發現唔到問題。直到上埋Production，真係有一班客撞正個bug，結果成班客嘅身份證scan copy都冇落到database。聽落好似冇乜嘢，但其實如果冇keep到copy，audit就過唔到，而且萬一有客唔交月費，又冇留到身份證明的話，想追數都追唔返。

結果，件事差啲釀成關公災難。然後，我上司同我上司嘅上司，都比人捉咗入房。當然就係話點解dev場又試過，UAT場又試過，Staging又試過，都仲可以出事。而上司嘅上司當然唔會明白test一個改動其實都唔係咁簡單嘅事，有時仲要有hardware同真實data配合先試到。

不過，最後我竟然冇事。

第二日，我上司同我上司嘅上司，搵我「傾偈」。佢哋語氣真係好好，好到有啲陰森。佢哋「提醒」我每次寫code要做啲乜嘢test，要留意返乜嘢procedure；最後仲好強調話之前件事唔關我事，成team人都有責任，仲叫我唔好放喺心上面，好似平時咁做嘢就得㗎喇。

我知道，dev場冇得試，而UAT同Staging都唔係我可以掂到嘅嘢，所以其實真係大家都有責任。但係，嗰一刻我好自責，因為我寫嘅code有bug，而累到一大班人要同我執手尾。

------

呢件事發生喺半年前，而我呢半年不停咁諗返件事，覺得自己好廢，好冇用。

即使我唔需要為呢件事孭鑊都好，某程度上喺大家心目中，我寫嘅code已經係信唔過，而且根本冇機會比我洗底，所以我估計自己喺呢度已經冇乜發展空間。同埋，喺度做咗兩年井底之蛙，我真係好想出去睇下外面嘅世界係點，係咪真係咁風高浪急。我都好想知道除咗每日揼code之外，我嘅能力仲可以做到幾多嘢，同幾大型嘅project，而我相信呢啲嘢係呢個崗位比唔到我嘅。所以，我決定離開呢份做咗兩年嘅工作。

今日係我嘅last day，第一次轉工，的確有啲緊張，又有啲興奮，又有啲感慨。

希望下一份工會學到更多嘢啦。

（本故事純屬虛構，如有雷同，實屬巧合。）

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。