今日係我嘅Last day(3)：FinTech工作人工前景佳，做唔落去只因...

今日係我嘅Last day。

原本我以為呢一份工可以做返三五七年，但原來一切都只係我一廂情願。到最後，竟然只係做咗兩年，連三年嘅目標都達唔到，唔好話五年、七年。

我以為做FinTech好好玩，點知，係畀人玩就真。

----

呢一份係我嘅第三份工，亦都係我正式踏入FinTech界嘅一個轉捩點。

近呢幾年好多人講FinTech呢個話題，連隔離陳師奶都可以同你講呢個係香港未來嘅大趨勢，但當你問佢FinTech係做乜，佢就未必識答你。所謂FinTech，其實即係Finance + Technology。例如以前啲人買股票唔方便，下下要搵著紅背心嘅股票經紀落場做買賣，又麻煩又慢，仲成日出錯；於是港交所就做啲嘢去令成個過程自動化，開始有自動對盤系統出現，而當年嘅紅背心交易就變成歷史。

到咗今時今日，整個金融行業都已經逐漸將Technology融入自己嘅業務，再加上好多人覺得FinTech係「一樣好賺錢嘅嘢」，一間阿豬阿狗嘅公司都可以話自己做FinTech，所以其實做FinTech並不一定等於待遇好，但至少一入呢行就好似頭頂多咗個光環咁，好多人都會羨慕你。於是，我懷住興奮嘅心情入到呢一間Vendor公司，準備大展拳腳，實踐抱負。

-----

第一年，所有嘢都好美好。我喺呢度得到嘅第一樣嘢，就係Finance嘅Knowledge。

相比之下，老實講，以前兩份工嘅所謂見識都只係皮毛。一般IT人點叻都好，最多咪只會識Technology。講到底，IT其實只係技術，唔能夠獨立存在，而係用嚟解決現實問題。但做FinTech就要連Finance都識埋，最好喺大學時已經係IT同Finance double major咁讀，但香港又有幾多個有咁嘅學歷？所以多數人都係邊做邊學。未開始做Project，我已經學識咗好多Finance嘢。而呢啲嘢我喺舊公司根本冇機會接觸到。

其實我覺得有啲嘢邊做邊學可能仲好，因為讀書還讀書，好多時讀書嘅內容同現實世界有好大差別。例如股票巿場咁，讀書嗰陣梗係會話Supply and demand就係控制股票嘅價格；但喺現實中，原來阿爺一句說話就可以令個巿大升，下一句說話就令個巿大跌，同Supply and demand有乜關係呢？

岔開咗話題添。講返份工……

-----

我喺呢度得到嘅第二樣嘢，係一個畀我發揮嘅空間。

咩意思呢？即係例如有次個Project係要Revamp個System，我可以選擇將佢拆做一舊舊又得，將佢合埋變一舊又得，用乜嘢Technology都可以，總之最終目的就係要令成套System容易Customize畀唔同嘅客人用。

聽落好難，但其實咁Challenging嘅嘢先有發揮空間。你諗下，叫你寫個Program去計1+1，可以有幾多種方法？但叫你寫個Program去處理股票交易，咁就大把方法做，人人做出嚟都唔同。咁先好玩。

好似又岔開咗話題。講返份工……

-----

所以，其實我頭一年喺呢間公司係做得幾開心。我同班兄弟做咗好多Project，個個Project都好成功，好有滿足感。但當踏入第二年，所有嘢就唔同晒；到最後，個個兄弟都認為非走不可。

問題出咗喺邊？問個PM啦。

IT呢一行好怕有啲唔識IT嘅人做主要嘅位置，而呢一位PM（Project Manager）正正就係唔識IT，但由佢負責同啲客傾Requirement。Well，傾還傾，唔好乜都話一定做到，好易做先得㗎。你有無問過落手落腳做嗰班人係咪真係做到？係咪真係咁易做？有無違反相對論同物理學定律？你以為個客叫你整個黑洞出嚟都做到？

最大嘅問題係，能者多勞，呢句說話永遠都冇錯；當一個員工越做到嘢，PM就會將越來越大嘅Workload分配畀佢。當班兄弟已經用咗120%嘅精力去做Project嘅時候，你再去應承人哋聽日畀到新嘢佢，咁呢啲嘢邊個做？你做呀？

喺呢兩年，我每日都係早上8點返到公司，晚上差唔多11點先走。一開始我真係發自內心，想將啲嘢做好啲；但慢慢就變成冇辦法唔咁做，因為啲嘢開始做唔切。班兄弟真係開始頂唔順，無論身心同家庭都無法兼顧。

最好笑嘅係，我哋做開FinTech，其實好多iBank都好Welcome我哋轉過去佢哋度做，人工三級跳。出面個世界真係好吸引，但係我唔捨得呢一班同我一齊趕Project死線，完成咗Project一齊去飲嘢慶功嘅兄弟；手頭上永遠有幾個Project喺手，我都唔想掉低佢哋一走了之。

可惜，呢度嘅高層唔會明。我解釋過好多次，咁大Workload，不停應承人哋畀嘢人，但又唔請多啲人，咁梗係個個都頂唔順啦。人工又唔係高過人，Bonus又冇我哋份，基本上等於趕我哋走。你估吓班高層點回應？

佢哋話：「一直以嚟，大大話話都走咗幾十個人，唔在乎再走多啲人，走咗就再請，就係咁簡單。」

好啦，咁我唯有過主。唔阻你哋發達。

------

今日係我嘅Last day。

心情好複雜。唔捨得，但又唔走唔得。下一份工會唔會又係咁？冇人知，只有自己親身去試吓先知。最唔捨得班日日出生入死嘅兄弟，所以我買散水餅都好重手，兄弟嘛，大家明啦，有機會嘅話喺出面再見。

小弟行先喇。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。