近月來,相信大家都喺新聞入面,睇到唔少喺網上交友而遇到感情騙子嘅案件,例如:42歲金融女強人,7年被騙1,400萬;52歲公屋富婆,18個月被騙2,640萬;港男被美人計誘騙買倫敦金,半日被蒸發2球!警方指,今年上半年網上情緣騙案較去年同期飆升近2.5倍,損失金額達1.37億元,數字係咪好驚人?其實喺網上識人係咪就一定信唔過呢?
喺年初嘅情人節前夕,我哋就喺兩星期內,接咗五個同類嘅Case。呢幾個客人都係喺交友App識咗新朋友,光速發展,仲約咗喺情人節見面。不過不謀而合地,佢哋都係有經歴嘅人,實在唔想畀人呃,唔希望再受傷害,所以就委託我哋去查一查,睇吓新朋友喺網上同佢哋講嘅嘢係唔係真?
------
33歲嘅A小姐喺大公司做文職,不過佢個部門只有一、兩個男同事,仲要結埋婚,而A小姐嘅社交圈子又好細,所以決定上網識人。終於佢喺交友App度識咗個B先生。B先生自稱做IT,張相個樣黑黑實實,身高大約5呎10,話自己鍾意寧靜嘅家庭生活,放咗工就返屋企,得閒就煮吓飯仔,最想搵個女朋友同自己一齊鑽硏廚藝,仲話自己近來跟阿媽學整豉油雞添。聽落好「住家男人」,A小姐即時加晒分!
話說呢位B先生識咗A小姐無幾耐,已經日日WhatsApp啲溫馨Message,例如落雨提佢帶遮,叫佢要小心身體、飲多啲水等等,總之就超級暖男Feel,冧到A小姐暈得一陣陣。一個星期後,B先生就開始用「BB」嚟稱呼A小姐,話覺得兩個人好夾,自己好想成家立室,只係而家事業未有成,仲差少少資金先可以創業。然後,B先生問A小姐有冇諗過佢哋嘅將來?仲約A小姐喺情人節出嚟見面。
不過A小姐嘅前男友成日瞞住佢出去偷食,傷得佢好深,A小姐唔希望再受傷害,為咗安全至上,就決定搵我哋Check吓B先生。於是我哋根據A小姐提供嘅資料,每日都喺 B先生返工嘅大樓下面等佢放工。其實要喺放工嘅人潮入面搵出Target,一啲都唔容易,尤其我哋手頭上只有兩張唔太清楚嘅相,只能靠經驗,同埋認住Target嘅面容特徴。
經過連日金睛火眼嘅追蹤,我哋肯定B先生最愛嘅原來唔係「家庭生活」,而係「夜生活」!佢差唔多日日收工後都去酒吧,仲鍾意攬住女仔一齊劈酒,攬完一個又一個,非常主動出擊,令入埋酒吧扮酒客嘅我哋,好容易就影到好多「靚相靚片」。
結果,A小姐當然唔開心,初初都唔想相信B先生係賤男呢個事實,仲問我哋係咪認錯人?不過有圖有真相,A小姐最終都忍痛斬䌫。唉,早啲清醒,總好過傷多一次心。
------
40歲嘅D小姐係護士,長年要輪班工作,女同事又比男同事多好多,一直都唔容易識男仔,於是就把心一橫上交友App試下。D小姐睇咗好耐,同好多人傾過偈,結果有位自稱鍾意運動、做工程嘅H先生同佢最傾得埋。
H先生份人其實唔算多嘢講,唔會日日噓寒問暖,但佢同D小姐都鍾意去旅行,講起呢方面嘅嘢,都有啲話題。卒之由WhatsApp傾到講電話,最後H先生仲鼓起勇氣約D小姐喺情人節出嚟食飯。D小姐戀愛經驗唔多,好彩性格都幾理智,佢覺得H先生雖然唔靚仔,不過談吐都幾大方,都想試吓發展。之但係呢排有好多網上騙案,D小姐唔敢貿貿然投入一段感情,所以就決定搵我哋幫手。
我哋跟蹤咗H先生八日,每日都去佢公司樓下等,「接」佢放工,仲跟埋佢去健身中心。(我哋即刻入會試玩,貼身睇吓H先生同乜嘢人接觸!)結果發現H先生冇講大話:佢真係差唔多一星期做足七日Gym,自己一個猛咁舉鐵、跑步,勤力到你唔信!而且佢每次做完Gym,都會去同一間茶餐廳食個飯,然後返屋企,自律程度簡直可以媲美《死亡筆記》入面嘅魅上照。如果唔係影到H先生每日著嘅衫有唔同,D小姐可能會以為我哋偷懶,無跟足八日㖭。
所以,我哋同D小姐講,如果你唔嫌悶,H先生係OK嘅。D小姐果然係理智人,佢話做人邊可能日日都咁精彩,最緊要個男人錫自己又老實啫!
------
其實綜合我哋接嘅Case嚟講,網上識嘅人就同你日常識嘅人一樣,好壞參半。記得有客人問過我:「係咪男人有錢就會花心?」我以男人嘅角度答佢:「男人係咪有錢都好,如果佢係花心嘅,就都係會花心。」老土啲講,最緊要帶眼識人,睇真啲,Check真啲!
講真,好似A小姐個Case,B先生同佢素未謀面,就叫佢做BB,又講到好似想同人結婚咁,已經幾有問題。B先生仲講明自己差啲創業資金,先可以成家立室,呢個人真係相當有可疑!一個頂天立地嘅男人,係絕對唔會暗示或明示女人畀錢自己嘅。各位女士,唔好只係聽男人講啲乜,要睇佢做咗啲乜!甜言蜜語人人都識講,無Cost㗎!唔使急,睇定啲,時間會證明一切。
偵探Nic Li
由記者仔做起,累積經驗及人脈網絡,漸漸變得神通廣大,成為偵探社總監。查案時心思細密,明察秋毫,機警過人。閒時熱愛足球,活力十足。 |
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。